Ku Aroma 8:1-39
8 Hino, aya ari mu rubatano na Kristu Djesu aazopaswi ndaa.
2 Ngokuti mutemo we mwiya unopasa upenyu mu rubatano na Kristu Djesu, wakamusudzunurai pa mutemo we citema no rufu.
3 Zviro zvaikonerhwa kuizwa nge Mutemo nge ndaa ye nyama isina simba, Mwari akazviita ngo kutuma Mwana wake wakaezana no munhu anoshaisha kuti abvise citema, uye opasa ndaa citema ciri mu nyama,
4 kuitira kuti zviro zve unatsi zvinodiwa nge Mutemo zvidzadzike katiri, isusu tisikahambi maererano no nyama, asi maererano no mwiya.
5 Ngokuti aya anorarama maererano no nyama anokanda ndangariro dzawo pa zviro zve kunyama, asi aya anorarama maererano no mwiya, anokanda ndangariro dzawo pa zviro zve kumwiya.
6 Ngokuti kugara tecirangarira zviro zve kunyama zvinoreya rufu, asi kugara tecirangarira zviro zve kumwiya zvinoreya upenyu uye runyararo;
7 ngokuti kugara tecirangarira zviro zve kunyama zvinoreya kuzondana na Mwari, ngokuti nyama aizwiri mutemo wa Mwari; zvezvirokwazvo, aitozvikwanisi.
8 Hino aya anorarama maererano no nyama aakwanisi kupfadza Mwari.
9 Kana mwiya wa Mwari wecigara mamuri, zvezvirokwazvo muri kuita maererano no mwiya, haiwa no nyama. Asi kana munhu asina mwiya wa Kristu, munhu iyena aaripi wa Kristu.
10 Asi kana Kristu ari mu rubatano pamwepo na imwimwi, mwiri wakafa nge ndaa ye citema, asi mwiya unopasa upenyu ngokuti muri anatsi.
11 Hino, kana mwiya wa uya akamutsa Djesu kubva ku akafa wecigara mamuri, iyena akamutsa Kristu Djesu kubva ku akafa, acaitawo kuti mwiri yenyu inofa igare ipenyu eciseenzesa mwiya wake unogara mamuri.
12 Hino hama, tino zvatinodikana kuita, haiwa kuzviitira nyama yedu kuti tirarame maererano no nyama;
13 ngokuti kana mecirarama maererano no nyama, zvezvirokwazvo mucafa; asi kudai mukauraya zviito zve mwiri yenyu meciseenzesa mwiya, mucararama.
14 Ngokuti ese anotungamirirhwa no mwiya wa Mwari zvezvirokwazvo ndiwona ana a Mwari.
15 Ngokuti imwimwi amuzi kutambira mwiya we uranda unomuitai kuti muthyezve, asi makatambira mwiya wakamuitisai kuti mugare ana a Mwari, uye mwiya iwona ndiwona unotiitisa kuti tidainzire kuti: “Abha,* Baba!”
16 Mwiya wa Mwari unotipupurira kuti isusu tiri ana a Mwari.
17 Hino kana tiri ana, tiri agariwo e nhaka ya Mwari. Tiri agari e nhaka ya Mwari pamwepo na Kristu, asi pakutanga isusu tinodikana kutambudzika pamwepo naye, kuti tizotambirewo rukudzo pamwepo naye.
18 Inini ndinoona kuti matambudziko e mazuwa ano aaezaniswi no rukudzo raticazopangidzwa.
19 Ngokuti zvisikwa zviri kuetsera no mwoyo wese kupangidzwa ke ana a Mwari.
20 Ngokuti zvisikwa zva Mwari zvakaizwa kuti zvigare zvisina zvazvinobetsera, haiwa ngokuda kazvo, asi ngokuda ka uya wakaita kuti zvidaro, peciseenzeswa kariro
21 yekuti zvisikwa zvicasudzunurhwawo pa uranda we kuora, zvogara no rusununguko rakakura re ana a Mwari.
22 Ngokuti tinoziya kuti zvisikwa zvese zviri kurumbwa zvecigomera uye zvecirhwadziwa dakara zvino.
23 Andizvopi zvega, asi isusuwo ekuti tino zvibereko zvokutanga, kureya mwiya, isusu pacedu tinogomera nge cemukati tecietsera no mwoyo wese kuti atitore kuti tigare ana a Mwari, tisudzunurhwe mu mwiri yedu no rusudzunuro.
24 Ngokuti takaponeswa mu kariro ii; asi kariro inooneka aikariropi, kodi munhu angaetsera ciro caari kuona here?
25 Asi kana tikaetsera ciro catisikaoni, tinorumbwa tecietsera no mwoyo wese tecishingirira.
26 Ngo mushobo umwewo, mwiya unotibetsera patinonga takaremba; ngokuti cinetso catinaco nge cekutama kuziya kukumbira zviro zvatinoda, asi mwiya unotikumbirira patinonga tecigomera tecikonerhwa kubudisa masoko.
27 Asi uya anopsvaka zviri mu mwoyo medu anoziya zvinorekethwa nge mwiya mucena, ngokuti iwona unokumbira maererano no kuda ka Mwari wecibetsera acena.
28 Isusu tinoziya kuti Mwari anoita kuti mabasa ake ese apindirane kuti abetsere aya anoda Mwari, akadainzwa kuti aite kuda kake;
29 ngokuti aya aakatanga kurangarira nge zvawo, akaagadza kuti aezane no Mwana wake, kuitira kuti Mwana wake agare dangwe pakati pe hama dzakawanda.
30 Kusiya izvona, aya aakagadza ndiwona aakadainza; uye aya aakadainza ndiwona aakati anatsi. Pakupedzesera aya aakati anatsi ndiwonawo aakakudza.
31 Hino toti kudini ngezve zviro izvi? Kana Mwari ari ku dii redu, ndiani acarhwisana na isusu?
32 Sezvo iyena aazi kutinyima Mwana wake kamare, asi akatipasa kuti afire isusu tese, hino angakonerhwa kutipasa zvimweni zvese, pamwepo naye here?
33 Ndiani anozopumha anhu akasanangurhwa na Mwari? Mwari ndiye anozoati anatsi.
34 Ndiani acaatonga? Kristu Djesu ndiena akafa, uye kupinda izvona, ndiena akamutswa, ogara ku moko kwawo wa Mwari uyewo ndiena anotikumbirirawo.
35 Ndiani acatiparadzanisa mu rudo ra Kristu? Kutambudzika here kana kurhwadziwa, kuteererhwa, nzara, kutama zvokupfeka, ngozi, kana supada here?
36 Hinga kutarhwa kazvakaizwa kuti: “Tiri kuuraiwa mazuwa ese nge ndaa yenyu; takazwi tiri mabira anodikana kuuraiwa.”
37 Asi zviro zvese izvi tiri kuzvinyisa tecibetserhwa na uya akatida.
38 Ngokuti ndino rugondo kuti kunyazi rufu, upenyu, ngirozi, utongi, zviro zviriyo zvino, zviro zvicauya, masimba,
39 kukwirira, kudzika, kana cisikwa cipi haco azvizokwanisi kutiparadzanisa mu rudo ra Mwari riri muna Kristu Djesu Tenzi wedu.
Masoko ari pasi
^ Iri i soko re Cihebheru kana kuti re Ciaramaiko rinoreya kuti “Baba!” Rinoseenzeswa no ana adoko ecidainza madzibaba awo.
