Kuna Firimoni 1:1-25
1 Pauro, musungwa nge ndaa ya Kristu Djesu, uye Timoti hama yedu, kuna Firimoni mudoni wedu we basa unodiwa,
2 kuna Afiya hanzvadzi yedu, kuna Arkipo mudoni wedu pa kurhwa ke Cikristu, uye ku ungano inoungana pamwepo na iwewe pa nyumba pako:
3 Nyasha no runyararo zvinobva kuna Mwari Baba edu na Tenzi wedu Djesu Kristu ngazvigare na imwimwi.
4 Nguwa dzese ndinogara ndecitenda Mwari pandinoreketa nge zvako mu minamato yangu,
5 ngokuti ndinorumbwa ndecizwa ngezve kutenda kako uye rudo raunaro kuna Tenzi Djesu uye ku acena ese.
6 Ndinonamata kuti kutenda katinako,* kukukohomedzese kuti uziye zviro zvese zvakanaka zvatakaona tecibetserhwa na Kristu.
7 Hama yangu, ndakapfara maningi uye ndakanyaradzwa nge kuzwa ngezve rudo rako, ngokuti wakatonhodza mwoyo ye acena.
8 Nge ndaa yazvo, kunyazi hazvo ndino rusudzunuko rakakura muna Kristu, rokukubvunza kuti uite zviro zvakanaka,
9 ndinoda hangu kureketa na iwewe ndeciita zvekukumbira mu rudo, ngokuti inini Pauro ndaa mwanarume wacena, uye zvino nditori musungwa nge ndaa ya Kristu Djesu.
10 Ndiri kukukumbira nge ndaa yo mwana wangu, Onezimo, wandakagara baba ake panguwa yandiri mu kadheya.*
11 Kareko iyena wainga asikabetseri kauri, asi pari zvino iyena waakubetsera katiri tese.
12 Ndiri kumuhwirinza kauri, iyena kamare, ndiena mwoyo wangu.
13 Ndaida kugara naye kuti andiseenzere pa mbuto yako pandinonga ndakasungwa nge ndaa ye masoko akanaka.
14 Asi apana candinoda kuita usikazi kuzvitendera, kuti usaite zviro zvakanaka weciita zvekubambidzirhwa, asi zvecibva pa mwoyo.
15 Pamweni ndizvona zvakaita kuti akusiye kecinguwa,* kuti azogarezve na iwewe nokusikaperi,
16 usamutambire hinga muranda, asi hinga hama inodiwa, maka-maka kandiri, unodikana kumuda kupinda inini, hinga hama ye kunyama uye muna Tenzi.
17 Hino kana wecindiona hinga shamwari,* mutambire zvakanaka hinga mushobo wawaizonditambira.
18 Asi kana pano caakakushaishira kana kuti uno magaa na iwewe, ndini ndicakuripa.
19 Inini Pauro, ndiri kuzvitara no nyara yangu kamare: Ndicazokuripa—ndisikareketi hangu kuti iwewe unogaa na inini re upenyu wako wene.
20 Hama yangu, ndibetserewo pa nyaya ii muna Tenzi; tonhodza mwoyo wangu muna Kristu.
21 Ndino rugondo rekuti ucadaira cikumbiro cangu, ndiyo ndaa ndiri kutara ndeciziya kuti ucaita zvakawanda kudarika zvandiri kureketa.
22 Asi kusiya izvona ndigadzirirewo pekugara, ngokuti ndino kariro yekuti ne minamato yenyu, ndicazohwirinzwa kamuri.
23 Epafra musungwa pamwepo na inini nge ndaa ya Kristu Djesu, uri kukutambisa.
24 Uri kutambiswawo ndi Marko, Aristarko, Dhema, uye Ruka, aseenzidoni angu.
25 Nyasha dza Tenzi Djesu Kristu, ngadziseenze pa maitiro enyu.
Masoko ari pasi
^ Kana kuti: “kubatanidzwawo kaunoita pakutenda.”
^ Cigrego: “mu makorenti.”
^ Cigrego: “nguwa imwe.”
^ Cigrego: “mudoni.”
