Akatarhwa na Juau 1:1-51
1 Pakutanga painga pano unodainzwa kuti Soko, uye Soko rainga rina Mwari, uye Soko rainga riri mwari.
2 Iyena ainga ari pamwepo na Mwari kubvira pakutanga.
3 Mwari akaseenzesa iyena kuti asike zviro zvese, apana ciro cakaoneka pasikazi kuseenzeswa iyena.
Upenyu wakaoneka
4 peciseenzeswa iyena, upenyu uu wainga uri ciedza co anhu.
5 Ciedza ciri kuvheneka mu cidima, asi cidima acizi kukwanisa kucikunda.
6 Kainga kuno mwanarume umweni wakatumwa hinga muimiriri wa Mwari; iyena waizwi Juau.
7 Mwanarume uu wakauya hinga mupupuri, kuitira kuti apase upupuri we ciedza, kuti anhu e madzinza ese atende peciseenzeswa iyena.
8 Iyena wainga asiripi ciedza icona, asi wakauya kuti apase upupuri ngezve ciedza icona.
9 Ciedza ce zvirokwazvo cainga caakuda kuuya pa nyika, kuti civheneke anhu e madzinza ese.
10 Iyena ainga ari mu nyika, uye nyika yakasikwa peciseenzeswa iyena, asi nyika aizi kumuziya.
11 Iyena akauya ku anhu e nyika yaakabarirhwa, asi awona aazi kumutambira.
12 Asi ku ese akamutambira, iyena akaapasa citenderhwa ce kugara ana a Mwari, ngokuti aitenda mu zina rake.
13 Uye awona aazi kubarhwa no ngazi, kana nge kuda ke nyama kana nge kuda ke anhu, asi nge kuda ka Mwari.
14 Hino Soko rakagara nyama uye rakagara pakati pedu, isusu takaona rukudzo rake, rukudzo rakaita hinga ro mwana akabarhwa ari umwe ega* kuna baba ake; iyena ainga akadzara no nyasha dza Mwari uye no cokwadi.
15 (Juau wakapasa upupuri nge zvake, honde, iyena wakakhuwa eciti: “Uu ndiye wandakareketa nge zvake ndeciti: ‘Uya ari kuuya sure kangu akanditangira, ngokuti iyena ainga aayo ndisati ndabarhwa.’”)
16 Ngokuti iyena ainga akadzara no nyasha dza Mwari. Tese isusu takatambirawo nyasha idzona.
17 Ngokuti Mutemo wakapaswa peciseenzeswa Mozesi, asi nyasha dza Mwari no cokwadi zvakaoneka peciseenzeswa Djesu Kristu.
18 Apana munhu akamboona Mwari; mwari akabarhwa ari umwe ega ari kudii ra Baba,* ndiye akapanganidza kuti Mwari ndiani kamare.
19 Uu ndiwo upupuri wakapaswa na Juau, Adjudha paakatuma apristi no Arevhi e ku Djerusarema kuti amubvunzise kuti: “Ndiwe ani?”
20 Iyena aazi kuramba kuadaira, zvezvirokwazvo wakatobhuya pamhene kuti: “Inini andinipi Kristu.”
21 Awona akamubvunzisa kuti: “Hino ndiwe ani? Ndiwe Eriya?” Iyena wakadaira kuti: “Andinipi.” “Ndiwe Muphorofita here?” Iyena wakadaira kuti: “Haiwa!”
22 Hino akamubvunzisa kuti: “Ndiwe ani?” Tibvunze, kuti tikwanise kuona cokudaira kuno aya atituma. Unotii nge zvako?”
23 Iyena wakati: “Ndiri izwi re munhu uri kudainzira ku renje* eciti: ‘Gadzirisai gwanza ra Djehovha,’* hinga zvakabhuiwa no muphorofita Isaya.”
24 Aya ainga atumwa aibva ku Afarisi.
25 Akamubvunzisazve kuti: “Hino ngei iwewe wecibhabhatidza nepoo auripi Kristu, kana Eriya, kana Muphorofita?”
26 Juau wakaadaira kuti: “Inini ndinobhabhatidza no mvura. Pakati penyu pano munhu wamusikazii,
27 uya ari kuuya sure kangu, uye inini andizi kusisira kuti ndikhumure masandarya ake.”
28 Zviro izvi zvakaitika ku Bhetanya ku n’ombera ko Djorodhani, ku mbuto yokuti Juau waibhabhatidzira anhu.
29 Pa zuwa rakazoteera, iyena wakaona Djesu eciuya kaari uye wakati: “Onai, Bira ra Mwari rinobvisa zvitema zve nyika!
30 Uu ndiye wandakareketa nge zvake ndeciti: ‘Uya ari kuuya sure kangu akanditangira, ngokuti iyena ainga aayo ndisati ndabarhwa.’
31 Ininiwo ndainga ndisikatomuzii, asi cakaita kuti ndiuye koobhabhatidza no mvura nge cekuti iyena aziikanwe mu Israeri.”
32 Juau wakapasawo upupuri wekuti: “Ndakaona mwiya mucena wecicita wecibva kudenga wakaita hinga njiwa, uye iwona wakarumbwa uri paari.
33 Inini ndainga ndisikatomuzii, asi Uya akandituma kuti ndibhabhatidze no mvura akandibvunza kuti: ‘Munhu waunoona mwiya mucena wecicita paari uye worumbwa uripo, iyena ndiye anobhabhatidza no mwiya mucena.’
34 Inini ndakatozviona uye ndakapa upupuri wekuti uu ndiye Mwana wa Mwari.”
35 Pa zuwa rakazoteera, Juau wainga aripozve no airi e afundi ake,
36 paakaona Djesu ecihamba, iyena wakati: “Onai Bira ra Mwari!”
37 Afundi airi aya paakamuzwa ecireketa izvi, awona akateera Djesu.
38 Djesu akatendeuka, uye eciona kuti afundi aya aimuteera, akaabvunzisa kuti: “Muri kupsvakei?” Awona akamudaira kuti: “Rabhi (kana zvikaturikirhwa zvinoreya kuti “Mufundisi”), muri kugarepi?”
39 Iyena akati: “Uyai muone.” Hino akaenda naye koona kaaigara, uye akagara naye pa zuwa irona; dzainga dzaa 16 dzo masikati.*
40 Andreya, hama ya Simoni Pedru, wainga ari umwe we afundi aya airi akazwa zvakarekethwa na Juau, oteera Djesu.
41 Iyena wakatanga kuona hama yake inozwi Simoni uye wakaibvunza kuti: “Taona Mesiya” (soko iri rinoreya kuti, “Kristu”),
42 hino Andreya wakamutora woenda naye kuna Djesu. Djesu paakamuringira, akamubvunza kuti: “Iwewe ndiwe Simoni, mwana wa Juau; iwewe ucadainzwa kuti Kefasi” (zina iri rinoreya kuti “Pedru”).
43 Pa zuwa rakazoteera, Djesu aida kuenda ku Garireya. Hino akasongana na Firipi uye akamubvunza kuti: “Gara muteeri wangu.”
44 Firipi wainga ari we ku Bhetisaidha, ku thaundi rakabarirhwa Andreya na Pedru.
45 Firipi wakasongana na Natanieri uye wakamubvunza kuti: “Taona uya wakatarhwa nge zvake na Mozesi mu Mutemo, uye no Aphorofita: Djesu mwana wa Zuzee, we ku Nazareta.”
46 Asi Natanieri wakamubvunzisa kuti: “Mu Nazareta mungabuda ciro cakanaka here?” Firipi wakamudaira kuti: “Uya uone.”
47 Djesu akaona Natanieri ecikhwedera uye akati nge zvake: “Uwo ndiye Muisraeri we zvirokwazvo, asina ucengedzi.”
48 Natanieri wakamubvunzisa kuti: “Mandiziya kudini?” Djesu akamudaira kuti: “Firipi asati akudainza, inini ndakuona pawainga uri pasi pe muonde.”
49 Natanieri wakamubvunza kuti: “Rabhi, imwimwi muri Mwana wa Mwari, muri Mambo we Israeri.”
50 Djesu akamudaira kuti: “Iwewe uri kutenda ngokuti ndakubvunza kuti ndakuona uri pasi pe muonde? Iwewe ucaona zviro zvakakura kudarika izvi.”
51 Hino iyena akamubvunza kuti: “Zvezvirokwazvo ndinomubvunzai kuti, imwimwi mucaona kudenga kakafunguka uye ngirozi dza Mwari dzecikwira no kucita dzeciuya ku Mwana we munhu.”
Masoko ari pasi
^ Izvi zvinoreya kuti mwana uu ndiye ega akasikwa na Mwari kamare.
^ Kureya kuti pa mbuto inoreremedzwa maningi.
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Cigrego: “nguwa yecigumi.”
