Akatarhwa na Juau 10:1-42
10 “Ndinomubvunzai zvirokwazvo kuti, wese uya asikapindi no pamusuwo pe danga ro mabira, asi anokwira no pa mbuto imweni ndi mbavha.
2 Asi uya anopinda no pamusuwo ndi muushi we mabira.
3 Murindi anomufungurira, uye mabira anozwa izwi rake. Iyena anoadainza nge zina rawo uye oatora obuda nawo kunza.
4 Mumasure me kubvisa mabira ake ese, iyena anoenda mberi kawo, uye awona anomuteera ngokuti anoziya izwi rake.
5 Awona aazoteeri munhu waasikazii, asi anomutiza, ngokuti aazii izwi ro anhu aasikazii.”
6 Djesu akaita muezaniso uu, asi awona aazi kuzwisisa zvaakabhuya.
7 Ndiyo ndaa, Djesu akaabvunzazve kuti: “Zvezvirokwazvo ndinomubvunzai kuti, inini ndiri musuwo we mabira.
8 Ese akauya pa mbuto pangu ndi mambavha; asi mabira aazi kuapurutana.
9 Inini ndiri musuwo; wese uya anopinda no pandiri acaponeswa, acapinda no kubuda uye acaona zvokurhya.
10 Mbavha inondouya kuti ibe, kuuraya no kutsakatisa. Inini ndakauya kuti mabira aone upenyu, upenyu usikaperi.
11 Inini ndiri muushi wakanaka; muushi wakanaka anopa upenyu* wake nge ndaa ye mabira.
12 Museenzi asiripi muushi uye asiripi muridzi we mabira, kana akaona mhumhi yeciguma, anosiya mabira wotiza, uye mhumhi inoaruma yoabararisa;
13 iyena anotiza ngokuti ndi museenzi uye aana basa no mabira.
14 Inini ndiri muushi wakanaka. Ndinoziya mabira angu uye mabira angu anondiziya,
15 kuita hinga Baba anondiziya, inini ndinoziyawo Baba; uye ndinopa upenyu* wangu nge ndaa ye mabira.
16 “Ndino mabira amweni asiripi e danga rino; inini ndinodikanawo kuuya nawo, uye acapurutana izwi rangu, ogara cikwata cimwe basi no muushi umwe basi.
17 Ndiyo ndaa Baba anondida, ngokuti ndinopa upenyu* wangu, kuti ndizoutambirezve.
18 Akuna munhu anonditorera upenyu wangu, asi inini ndinoupasa ngo kuda kangu. Ndino citenderhwa cokuupasa uye cokuutambirazve. Ndakatambira mutemo uu na Baba angu.”
19 Pakaonekazve kutama kupindirana pakati pe Adjudha nge ndaa yo masoko aya.
20 Akawanda awo aiti: “Iyena ano dhimoni uye waakupenga. Ngei imwimwi muri kumupurutana?”
21 Amweni aiti: “Aya amasokopi e munhu ano dhimoni. Kodi dhimoni ringaita here kuti madziso e mapofu afunguke?”
22 Mu Djerusarema makaizwa Mutambo we Kucenesa Tempro. Yainga iri nguwa yo kutonhora,
23 uye Djesu ainga ecihamba mu tempro mu mbuto inozwi Berere ra Soromoni.
24 Hino Adjudha akamutenderera uye akamubvunza kuti: “Ucarumbwa usikatidjekeseri dakara rini? Kana iwewe uri Kristu tibvunze pamhene.”
25 Djesu akaadaira kuti: “Inini ndakamubvunzai uye kunyazi zvakadaro imwimwi amutendi. Mabasa andinoita mu zina ra Baba angu, anopupurira nge zvangu.
26 Asi imwimwi amutenderi, ngokuti amuripi mabira angu.
27 Mabira angu anozwa izwi rangu, inini ndinoaziya, uye awona anonditeera.
28 Inini ndinoapasa upenyu usikaperi, uye awona aazotsakatiswi, uye apana acandibvukira mu nyara yangu.
29 Zvandapaswa na Baba angu zvakakura kudarika zviro zvese, uye apana angazvibvisa mu nyara ya Baba.
30 Inini na Baba tiri umwe.”*
31 Adjudha akanongazve mapuwe kuti amufure.
32 Hino Djesu akaabvunza kuti: “Inini ndakamupangidzai mabasa akanaka akawanda ecibva kuna Baba. Pa mabasa ese aya, munoda kundifura nge ndaa ye basa ripi?”
33 Adjudha akamudaira kuti: “Isusu atikufuri nge ndaa ye mabasa akanaka, asi nge ndaa ye kutuka Mwari; ngokuti iwewe, kunyazi uri munhu, unodziita mwari.”
34 Djesu akaadaira kuti: “Azvizi kutarhwa here mu Mutemo wenyu kuti: ‘Inini ndakati: “Imwimwi muri anamwari”’?
35 Kana iyena akadainza aya aishorhwa no soko ra Mwari kuti “anamwari,” uye Matarhwa aangacinjwi,
36 imwimwi muri kubvunza inini, wekuti Baba akacenesa uye akatuma pa nyika kuti: ‘Iwewe uri kutuka Mwari,’ ngokuti ndati: ‘Ndiri Mwana wa Mwari?
37 Kana ndisikaiti mabasa a Baba angu, musanditende.
38 Asi kana ndeciaita, kunyazi musikanditendi, tendai mu mabasa angu, kuitira kuti muziye uye mutende kuti Baba ari mu rubatano na inini uye inini ndiri mu rubatano na Baba.”
39 Hino akaedzazve kumusunga, asi iyena akanzvenga.
40 Iyena akabirazve kuenda ku n’ombera ke Djorodhani ku mbuto yaibhabhatidzira Juau pakutanga, uye akagara ikona.
41 Akawanda akaenda kaari uye aiti: “Juau aazi kuita cishamiso cipi haco, asi zviro zvese zvakareketa Juau ngezve mwanarume uu zvainga zvezvirokwazvo.”
42 Uye akawanda ipona akatenda maari.
Masoko ari pasi
^ Kana kuti: “mwiya.”
^ Kana kuti: “mwiya.”
^ Kana kuti: “mwiya.”
^ Kana kuti: “tiri mu rubatano.”
