Akatarhwa na Juau 11:1-57
11 Mwanarume umweni waizwi Razaro wainga ecirhwara; iyena wainga ari we ku mutanha we Bhetanya, mutanha waigara hanzvadzi dzake mbiri dzinozwi Mariya na Marta.
2 Uu ndiye Mariya uya wakakanda mafuta anonuhwirira pa tsoka dza Tenzi, wodzipukuta no tsitsi rake; Razaro wairhwara wainga ari hama yake.
3 Hino, hanzvadzi dzake dzakatumira masoko kuna Djesu dzeciti: “Tenzi, uya wamunoda ari kurhwara.”
4 Asi Djesu paakazvizwa, akati: “Kurhwara uku akuzoiti kuti iyena afe, asi kunozoita kuti Mwari akudzwe, kuitira kuti Mwana wa Mwari akudzwe nge ndaa yo nhenda ii.”
5 Djesu aida Marta, Mariya pamwepo na Razaro.
6 Asi paakazwa kuti Razaro wainga ecirhwara, iyena akarumbwa ari ku mbuto yaainga ari ke mazuwa mairi.
7 Pedzepo, iyena akati ku afundi ake: “Ngatiendezve ku Djudhiya.”
8 Afundi akamubvunza kuti: “Rabhi, pa nguwa doko yadarika yamakabva kweneyo, Adjudha aida kumufurai no mapuwe, uye imwimwi muri kuda kuhwirirazve kweneyo?”
9 Djesu akaadaira kuti: “Kunza akugari kakadjeka ke nguwa 12 here? Kana munhu ecihamba pa ciedza aakuhunyiki, ngokuti anoona ciedza ce nyika ino.
10 Asi kana munhu ecihamba cousiku, anokuhunyika ngokuti aana ciedza.”
11 Mumasure me kureketa izvi, iyena akatunhudzira eciti: “Razaro shamwari yedu yawata, asi inini ndiri kuenda ikona kuti ndimumutse.”
12 Hino afundi akamubvunza kuti: “Tenzi, kana iyena ari kuwata, acatamba.”
13 Djesu aireketa ngezve kufa kake. Asi awona airangarira kuti iyena aireketa ngezve kuwata kamare.
14 Hino Djesu akazoadjekesera eciti: “Razaro wafa;
15 uye nge ndaa yenyu inini ndiri kupfara ngokuti ndainga ndisiripi ikona, kuti imwimwi mutende. Asi ngatiende kweneyo.”
16 Tomaji, waidainzwawo kuti Manyambiri, wakati ku afundi amweni: “Ngatiende kuti tifewo naye.”
17 Djesu paakaguma, akaziya kuti Razaro wainga waamuguwa ke mazuwa marongomuna.
18 Bhetanya rainga riri dhuze no Djerusarema, ke mukuwo we makirometro matatu.*
19 Uye Adjudha akawanda akaenda koonyaradza Marta na Mariya nge ndaa yo hama yawo.
20 Marta paakazwa kuti Djesu ainga eciuya, wakaenda koosongana naye; asi Mariya wakasara kumba.
21 Hino Marta wakati kuna Djesu: “Tenzi, kudai mainga muri pano, hama yangu ingadai isikazi kufa.
22 Asi kunyazi zvino ndinozviziya kuti zvese zvamunokumbira kuna Mwari, Mwari anomupasai.”
23 Djesu akamubvunza kuti: “Hama yako icamuka.”
24 Marta wakamudaira kuti: “Ndinozviziya kuti iyena acamuka pa rumuko pa zuwa rokupedzesera.”
25 Djesu akamubvunza kuti: “Inini ndiri rumuko uye upenyu. Wese uya anopangidza kutenda mandiri, kunyazi kana akafa, acararamazve;
26 uye wese uya unorarama uye unopangidza kutenda mandiri aazofi. Iwewe unozvitendera here?”
27 Iyena wakamudaira kuti: “Honde Tenzi, inini ndinotenda kuti imwimwi muri Kristu, Mwana wa Mwari, uya waidikana kuuya mu nyika.”
28 Mumasure mazvo, Marta wakaenda koodainza Mariya hanzvadzi yake uye wakamubvunza pake ega kuti: “Mufundisi auya uye ari kukudainza.”
29 Paakazwa izvi, iyena wakamuka nokukasika uye wakaenda koosongana naye.
30 Djesu ainga asati apinda mu mutanhemo, asi ainga aciri pa mbuto yaakasongana na Marta.
31 Adjudha ainga ari pa nyumba ecinyaradza Mariya paakaona kuti iyena wainga wamuka uye wobuda nokukasika, awona akamuteera, ecirangarira kuti iyena wainga ari kuenda koocema ku guwa.*
32 Mariya paakaguma pa mbuto yainga ina Djesu uye paakamuona, wakahwarara pa tsoka dzake uye wakamubvunza kuti: “Tenzi, kudai mainga muri pano, hama yangu ingadai isikazi kufa.”
33 Paakaona Mariya no Adjudha ainga ecimuperekedza ecicema, Djesu akatsukwara maningi uye akarhwadziwa.
34 Iyena akabvunzisa kuti: “Mamukotsera kupi?” Awona akamubvunza kuti: “Tenzi, uyai muone.”
35 Uye Djesu akatanga kucema.
36 Ngokudaro, Adjudha akabhuya kuti: “Onai mushobo waaimuda!”
37 Asi amweni aiti: “Mwanarume uu akafungura madziso e bofu, hino ainga asikakwanisi kuita kuti Razaro asafe?”
38 Ngokudaro, Djesu akatsukwarazve maningi uye akaenda ku guwa.* Guwero rainga riri bako uye rainga rakafungwa no buwe.
39 Djesu akati: “Bvisai buweri.” Marta, hanzvadzi yo mwanarume wainga wafa, wakati: “Tenzi, pamweni iyena waakunuhwa, ngokuti padarika mazuwa marongomuna.”
40 Djesu akamudaira kuti: “Andizi kukubvunza kuti kana ukatenda waizoona rukudzo ra Mwari?”
41 Ngokudaro, akabvisa buwero. Hino Djesu akaringira kudenga uye akati: “Baba, ndinomutendai ngokuti mandizwa.
42 Zvezvirokwazvo, ndinoziya kuti imwimwi munogara mecindizwa; asi ndareketa izvi nge ndaa yo anhu akandiunganira pano, kuitira kuti atendere kuti imwimwi makandituma.”
43 Mumasure me kubhuya izvi, iyena akadainzira no izwi guru eciti: “Razaro, buda kunza!”
44 Mwanarume wainga wafa, wakabuda wakapomberedzwa moko no mirenje dzake, uye hope yake yainga yakapomberedzwa no djira. Djesu akati kaari: “Musudzunurei uye musiyei aende.”
45 Ngokudaro, Adjudha akawanda ainga aenda koona Mariya uye akaona zvainga zvaizwa na Djesu akatenda maari,
46 asi amweni awo akaenda koobvunza Afarisi zvainga zvaizwa na Djesu.
47 Hino, atungamiriri e apristi no Afarisi akaunganidza Sinedriyo uye akati: “Ticaitei, sezvo mwanarume uu ari kuita zvishamiso zvakawanda?
48 Kana tikamusiya ecirumbwa ecidaro, akawanda acatenda maari, uye Aroma acauya otitorera mbuto* yedu kutobatanidzawo no anhu edu.”
49 Hino, umwe wawo waizwi Kaifasi, wainga ari mupristi mukuru mu gore irona, wakaabvunza kuti: “Imwimwi amuzii ciro,
50 uye amutozi kurangarira kuti zvakamunakirai kuti munhu umwe afire anhu ese pane kuti anhu ese atsakatiswe.”
51 Asi iyena aazi kureketa izvi nge kuda kake, ngokuti wainga ari mupristi mukuru mu gore irona, wakaphorofita kuti Djesu aizofira dzinza irona,
52 haiwa basi dzinza irona, asi kuti abatanidzewo ana ese a Mwari ainga abarariswa kuti agare cikwata cimwe basi.
53 Hino, kubvira pa zuwa irona kuenda mberi akapangana kumuuraya.
54 Ndiyo ndaa, Djesu ainga asikacahambizve pamhene pakati pe Adjudha, asi akabuda oenda ku mutanha uri dhuze no ku renje, ku thaundi rinozwi Efraimu uye akagara ikona no afundi ake.
55 Paskwa yo Adjudha yainga yaadhuze, uye akawanda aibva ku mutanha aikwidza kuenda ku Djerusarema Paskwa isati yaizwa, kuitira kuti adzicenese maererano no mutemo.
56 Aipsvaka Djesu, uye mu tempro aibvunzisana pacawo eciti: “Munoonawo kudini? Kodi iyena aaui pa mutambo here?”
57 Asi atungamiriri e apristi no Afarisi ainga apasa mutemo kuti kana munhu akaziya kuna Djesu, aidikana kuabvunza kuti awona aende koomusunga.*
Masoko ari pasi
^ Cigrego: “maestadhiyo angakwana 15.” Onai Apendi. B14.
^ Kana kuti: “guwa re anoedzurirhwa.”
^ Kana kuti: “guwa re anoedzurirhwa.”
^ Kureya kuti tempro.
^ Kana kuti: “koomubata.”
