Akatarhwa na Juau 12:1-50
12 Mazuwa matanhatu Paskwa isati yaizwa, Djesu akaguma ku Bhetanya, ku mbuto yainga ina Razaro, uya wakamutswa na Djesu kubva ku akafa.
2 Akamubikira zvokurhya kuti ararire ikona, Marta waiunzisa zvokurhya uye Razaro wainga ari umwe we aya airhya* naye.
3 Mariya wakatora mafuta anonuhwirira angakwana hafu yo ritru e nardho yakanakisisa inodhura maningi, uye wakaadurura pa tsoka dza Djesu, odzipukuta no tsitsi rake. Nyumba yese yakadzara no munuhwi we mafuta anonuhwirira.
4 Asi Djudhasi Iskariyoti, umwe we afundi ake, uya waizomutengesa, wakati:
5 “Ngei mafuta aya anonuhwirira aazi kutengeswa nge mutengo we madhenariyo 300 uye mareyo yopaswa arombo?”
6 Zvezvirokwazvo, iyena aazi kubhuya izvi ngo kuda kubetsera arombo, asi wainga ari mbavha; iyena ndiye waionerera bhokisi ro mare uye waiba mare yaikandwa imona.
7 Hino Djesu akati: “Murekerei, kuitira kuti iyena aite izvi ecigadzirira zuwa ro kukotswa kangu.
8 Ngokuti arombo munawo nguwa dzese, asi amuzogari na inini nguwa dzese.”
9 Pa nguwa iyona, Adjudha akawanda paakaziya kuti Djesu ainga ari ku Bhetanya, awona akaendeyo, haiwa basi kuti aone Djesu, asi kuti aonewo Razaro, uya waainga amutsa kubva ku akafa.
10 Atungamiriri e apristi akaronga kuurayawo Razaro,
11 ngokuti Adjudha akawanda aienda ikona nge ndaa yake uye aitenda muna Djesu.
12 Pa zuwa rakazoteera, anhu akawanda ainga aenda ku mutambo akaziya kuti Djesu ainga eciguma mu Djerusarema.
13 Hino akatora nhai dze miti dze micindwe uye akaenda koosongana naye, uye akatanga kukhuwa eciti: “Tinomukumbirai kuti mumuponese! Akakomborerhwa uya anouya mu zina ra Djehovha,* akakomborerhwa Mambo we Israeri!”
14 Djesu akaona kamwana ke dhongi, okapakira, hinga zvainga zvakatarhwa kuti:
15 “Usathye mwana we mwanakadzi we Ziyoni. Ona! Mambo wako ari kuuya akapakira pa mwana we dhongi.”
16 Pakutanga, afundi aazi kuzvizwisisa, asi Djesu paakazokudzwa, awona akaedzurira kuti zviro izvi zvainga zvakatarhwa nge zvake uye kuti anhu akazviitira iyena.
17 Anhu ainga anaye paakadainza Razaro kuti abude mu guwa* uye paakamumutsa kubva ku akafa, airumbwa ecibvunza amweni nge zvazvo.
18 Ici ndico cakaitisawo kuti anhu aende koosongana naye, ngokuti akazwa kuti iyena ainga aita cishamiso icona.
19 Ngokudaro, Afarisi akabvunzana kuti: “Onai, apana catiri kukwanisa apa. Anhu ese ari kumuteera.”
20 Pakati pe anhu ainga aenda koonamata Mwari pa mutambo, painga pano Agrego anganani.
21 Awona akakhwederera Firipi, wainga uri we ku Bhetisaidha yo Garireya, uye akamukumbira kuti: “Tiri kukumbirawo kuona Djesu.”
22 Firipi wakaenda koozvibvunza Andreya. Hino Andreya na Firipi akaenda kooreketa na Djesu.
23 Asi Djesu akaadaira kuti: “Yaguma nguwa yekuti Mwana we munhu akudzwe.
24 Zvezvirokwazvo ndinomubvunzai kuti: Kana tsangu yo trigu ikatama kumbwera pa mataka uye yotama kufa, icarumbwa indori tsangu; asi kana ikafa, iyona inobara zvibereko zvakawanda.
25 Uya anoda upenyu* wake acauruza,* asi uya anozonda upenyu* wake mu nyika ino acaucengeta kuti azoone upenyu usikaperi.
26 Kana munhu ecida kundiseenzera, ngaanditeere, uye pandinonga ndiri, museenzi wangu unonga uripoo. Kana munhu ecida kundiseenzera, Baba acamukudza.
27 Zvino ndakatsukwara* maningi, uye ndicabhuyei? Baba, ndiponesei pa nguwa ii. Asi, ndakauira nguwa ii.
28 Baba, kudzai zina renyu.” Hino kakazwika izwi kudenga reciti: “Inini ndakarikudza uye ndicarikudzazve.”
29 Anhu ainga ari ipona paakazwa izvi, akatanga kubhuya kuti kainga katinhira. Amweni akabhuya kuti: “Ngirozi yareketa naye.”
30 Djesu akadaira kuti: “Izwi iri arizi kuuya nge ndaa yangu, asi nge ndaa yenyu.
31 Zvino, nyika ino iri kutongwa; mutongi we nyika ino ucadzingirhwa.
32 Asi kana ndikakhomerhwa pa mutanda, ndicaita kuti anhu akasiyana-siyana auye kandiri.”
33 Zvezvirokwazvo, iyena aireketa izvi kuti apangidze mushobo waaizofa.
34 Hino anhu akamudaira kuti: “Takazwa mu Mutemo kuti Kristu anorarama nokusikaperi. Hino ngei wecibhuya kuti Mwana we munhu anodikana kukhomerhwa pa mutanda? Mwana we munhuwo ndiani?”
35 Hino Djesu akaabvunza kuti: “Ciedza cicagarazve na imwimwi ke nguwa doko. Hambai pamunonga mucino ciedza, kuti cidima cisamukundei; munhu anohamba mu cidima aakuzii kaari kuenda.
36 Pamunonga muno ciedza, pangidzai kutenda mu ciedza, kuitira kuti mugare ana e ciedza.”
Mumasure me kubhuya zviro izvi, Djesu akabudepo uye akaenda koofindara.
37 Kunyazi hazvo iyena akaita zvishamiso zvakawanda pamberi pawo, awona aazi kutenda maari,
38 kuti adzadzike masoko e muphorofita Isaya okuti: “Djehovha,* ndiani wakatenda mu zvatakabhuya?* Ndiani wakapangidzwa moko wa Djehovha?”*
39 Isaya wakabhuyawo cikonzero caizoita kuti awona asatende, eciti:
40 “Iyena akaafunga madziso uye akaomesa mwoyo yawo, kuitira kuti asaone no madziso uye asazwisise no mwoyo, atendeuke uye inini ndiaporese.”
41 Isaya wakareketa izvi ngokuti wakaona rukudzo rake, uye wakareketa nge zvake.
42 Kunyazi zvakadaro, atungamiriri akawanda e Adjudha aitotendawo maari, asi nge ndaa yo Afarisi, awona ainga asikazvibhuyi pamhene, kuitira kuti asadzingirhwe mu sinagoga;
43 ngokuti aida maningi kukudzwa no anhu kudarika kukudzwa na Mwari.
44 Asi Djesu akati no izwi guru: “Uya anotenda mandiri aatendi basi mandiri, asi anotendawo uya akandituma;
45 uye uya anondiona anoonawo Uya akandituma.
46 Inini ndakauya hinga ciedza mu nyika, kuitira kuti wese uya anotenda mandiri asarumbwe ari mu cidima.
47 Asi munhu anozwa masoko angu otama kuzviita, inini andimutongi; ngokuti andizi kuuya kootonga nyika, asi kuiponesa.
48 Munhu wese anondiramba uye asikatendi masoko angu, ariyo anomutonga. Masoko andabhuya ndiwo acamutonga pa zuwa rokupedzesera.
49 Ngokuti andizi kubhuya zviro zvo musoro mangu, asi Baba, aya akandituma, ndiwo akandibvunza zviro zvandinodikana kureketa no kufundisa.
50 Uye inini ndinozviziya kuti mutemo wawo unopasa upenyu usikaperi. Hino zvese zvandinoreketa, ndinoreketa ngo mushobo wandakabvunzwa na Baba angu.”
Masoko ari pasi
^ Kana kuti: “ainga ari pa meza.”
^ Onai pakazwi Kupanganidzwa ke Masoko.
^ Kana kuti: “guwa re anoedzurirhwa.”
^ Kana kuti: “mwiya.”
^ Cigrego: “acautsakatisa.”
^ Kana kuti: “mwiya.”
^ Kana kuti: “mwiya wangu wakatsukwara.”
^ Onai pakazwi Kupanganidzwa ke Masoko.
^ Cigrego: “mu zviro zvaakazwa kubva katiri.”
^ Onai pakazwi Kupanganidzwa ke Masoko.
