Akatarhwa na Juau 13:1-38
13 Mutambo we Paskwa usati waizwa, Djesu aizviziya kuti nguwa ye kusiya nyika ino uye yo kuenda kuna Baba yainga yaguma. Sezvo aida ateeri ake ainga ari pa nyika, akarumbwa eciada dakara ku mugumo.
2 Awona ainga ecirhya* uye Dhiyabhurosi wainga wakanda nzero ye kutengesa Djesu mu mwoyo ma Djudhasi Iskariyoti, mwana wa Simoni.
3 Djesu aizviziya kuti Baba ainga akanda zviro zvese mu nyara dzake uye kuti iyena ainga abva kuna Mwari uye kuti aienda kuna Mwari,
4 hino iyena akamuka paairhyira uye akakhumura djira rake ro kunza. Akatora tuwarya uye akaisungira mu cihunu.
5 Pedzepo, akakanda mvura mu basiya uye akatanga kusuka tsoka dze afundi uye ecidzipukuta no tuwarya yaainga asunga mu cihunu.
6 Hino akaguma pana Simoni Pedru. Iyena wakamubvunzisa kuti: “Tenzi, muri kuda kusuka tsoka dzangu?”
7 Djesu akamudaira kuti: “Zvandiri kuita auzvizwisisi zvino, asi ucazvizwisisa mumasure me zviro izvi.”
8 Pedru wakamubvunza kuti: “Azviiti kuti musuke tsoka dzangu.” Hino Djesu akamubvunza kuti: “Kana ndikatama kusuka tsoka dzako, auripi umwe we anhu angu.”
9 Simoni Pedru wakamudaira kuti: “Hino Tenzi, musasuke tsoka dzangu basi, asi sukaiwo moko dzangu no musoro wangu.”
10 Djesu akamubvunza kuti: “Munhu anonga asamba anodikana kusuka tsoka basi, ngokuti mwiri unonga wakacena. Uye imwimwi makacena, asi andimwipi mwese.”
11 Ngokuti iyena aizviziya kuti ndiani ari kumutengesa. Ndiyo ndaa akabhuya kuti: “Andimwipi mwese makacena.”
12 Hino, mumasure me kusuka tsoka dzawo uye kusimira djira rake re kunza, iyena akagarazve pa meza uye akaabvunza kuti: “Mazwisisa here zvandamuitirai?
13 Imwimwi munondidainza kuti ‘Mufundisi’ uye ‘Tenzi’, uye muri mu gwanza, ngokuti ndizvo zvandiri.
14 Hino, kana inini, Tenzi uye Mufundisi, ndasuka tsoka dzenyu, imwimwi munodikanawo kusuka tsoka dze umwe na umwe wenyu.
15 Ngokuti ndamusiirai muezaniso, kuitira kuti hingana zvandamuitirai, imwimwi muitewo zvimwezvo.
16 Ndinomubvunzai zvirokwazvo kuti, muranda amukurupi kupinda tenzi wake, uye mutumwa amukurupi kupinda uya akamutuma.
17 Kana imwimwi meciziya zviro izvi, mucapfara kana mukazviita.
18 Andiripi kubhuya ngezve mwese imwimwi; ndinoziya andakasanangura. Kuti adzadzike Matarhwa anoti: ‘Uya akarhya pau yangu akandipandukira.’*
19 Ndinomubvunzai zviro izvi zvino, zvisati zvaitika, kuti kana zvikaitika, mutende kuti ndini ani.
20 Ndinomubvunzai zvirokwazvo kuti: Munhu wese anotambira kunyazi umwe wenyu wandinotuma, anonditambirawo, uye wese anonditambira anotambirawo Uya akandituma.”
21 Mumasure me kubhuya izvi, Djesu akatsukwara maningi, uye akabhuya kuti:* “Zvezvirokwazvo ndinomubvunzai kuti, umwe wenyu ucanditengesa.”
22 Afundi akatanga kuringisana, asikazvizii kuti iyena aibhuya nge zvaani.
23 Umwe we afundi ake, uya waidiwa maningi na Djesu, wainga ari padhuze* na Djesu.
24 Hino, Simoni Pedru wakadainzira no musoro mufundiwo uye wakamubvunza kuti: “Tibvunze kuti iyena ari kureketa nge zvaani.”
25 Hino mufundiwo wakatsamira pa diti ra Djesu uye wakamubvunzisa kuti: “Tenzi, munhuwo ndiani?”
26 Djesu akadaira kuti: “Ndi uya wandicapasa kadimbu ke pau kandicaseya mu tijera.” Hino mumasure me kuseya no pau, iyena akaipasa Djudhasi, mwana wa Simoni Iskariyoti.
27 Mumasure mekuti Djudhasi watambira pau, Sathani wakapinda maari. Hino Djesu akamubvunza kuti: “Kasika kuita zvauri kuita.”
28 Asi apana kana umwe wainga ari pa meza wakazwisisa kuti ngei iyena ainga amubvunza izvona.
29 Ngokuti Djudhasi waionerera bhokisi ro mare, amweni airangarira kuti Djesu ainga ecibhuya kuti: “Tenga zvinodikanwa kuseenzeswa pa mutambo,” kana kuti waidikana kupasa ciro arombo.
30 Hino, mumasure me kutambira dimbu ro pau, Djudhasi wakabuda ciriporipoco. Wainga uri usiku.
31 Ngokudaro, mumasure mekuti iyena wabuda, Djesu akati: “Zvino Mwana we munhu akudzwa, uye Mwari akudzwawo peciseenzeswa iyena.
32 Mwari pacake acamukudza, uye acamukudza nokukasika.
33 Ana angu anodiwa, ndicange ndinemwizve ke nguwa doko. Imwimwi mucandipsvaka; uye hingana zvandakabvunza Adjudha, zvino ndiri kumubvunzaiwo kuti: ‘Kandinoenda imwimwi amungakwanisi kuendeyo.
34 Ndiri kumupasai mutemo mupsva, dananai; hinga mushobo wandamudai, dananaiwo.
35 Mukaita kudaro, ese acaziya kuti muri afundi angu, kana mukagara no rudo pakati penyu.”
36 Simoni Pedru wakamubvunzisa kuti: “Tenzi, muri kuda kuendepi?” Djesu akadaira kuti: “Kandiri kuda kuenda, aungakwanisi kunditeera zvino, asi ucazonditeera.”
37 Pedru wakamubvunza kuti: “Tenzi, ngei andingakwanisi kumuteerai zvino? Inini ndicapasa upenyu* wangu nge ndaa yenyu.”
38 Djesu akadaira kuti: “Iwewe ucapasa upenyu* wako nge ndaa yangu? Zvezvirokwazvo ndinokubvunza kuti: Djongwe arizoriri dakara iwewe wandiramba katatu.”
Masoko ari pasi
^ Kana kuti: “ecirhya paskwa.”
^ Cigrego: “andimutsira cisisino cake.”
^ Kana kuti: “akapupurira eciti.”
^ Cigrego: “pa dii ra.”
^ Kana kuti: “mwiya.”
^ Kana kuti: “mwiya.”
