Akatarhwa na Juau 14:1-31
14 “Musanetseke mu mwoyo. Pangidzai kutenda muna Mwari; pangidzaiwo kutenda mandiri.
2 Kumba ka Baba angu kuno mbuto dzakawanda dzo kugara. Kudai zvisiripi izvona, ndaida kumubvunzai, ngokuti ndiri kuenda koomugadzirirai mbuto yo kugara.
3 Uyewo, mumasure mekuti ndaenda koomugadzirirai mbuto, ndicauyazve koomutorai, kuitira kuti pandinonga ndiri, imwimwi mugarepoo.
4 Imwimwi munoziya gwanza ro kandiri kuenda.”
5 Tomaji wakamubvunza kuti: “Tenzi, atikuzii kamuri kuenda. Hino tingaziya kudini gwanza rakhona?”
6 Djesu akamubvunza kuti: “Inini ndini gwanza, cokwadi, uye upenyu. Apana anouya kuna Baba asikazi kupinda nge pandiri.
7 Kudai imwimwi maindiziya, maizoziyawo Baba angu; kubvira zvino kuenda mberi imwimwi maakuaziya uye munosoaona.”
8 Firipi wakamubvunza kuti: “Tenzi, tipangidzei Baba, uye izvona zvinokwana katiri.”
9 Djesu akamudaira kuti: “Taano nguwa yakawanda tiri tese, uye iwewe ausati wandiziya Firipi? Uya anondiona anoonawo Baba. Hino ngei uri kubhuya kuti: ‘Tipangidzei Baba’?
10 Iwewe autenderi kuti inini ndiri mu rubatano na Baba uye Baba ari mu rubatano na inini? Zvandinobhuya azvibvi kandiri, asi Baba anorumbwa ari mu rubatano na inini ari kuita mabasa awo.
11 Tenderai pandinobhuya kuti inini ndiri mu rubatano na Baba uye Baba ari mu rubatano na inini; kana musikatenderi izvona, tenderai nge ndaa yo mabasewo basi.
12 Ndinomubvunzai zvirokwazvo kuti: Uya anopangidza kutenda mandiri, acaita mabasa andinoita; uye acaita mabasa makuru kudarika aya, ngokuti ndiri kuenda kuna Baba.
13 Uyewo, zvese zvamunokumbira mu zina rangu, inini ndicazviita, kuitira kuti Baba akudzwe peciseenzeswa Mwana.
14 Zviro zvese zvamucakumbira mu zina rangu, ndicazviita.
15 “Kana imwimwi mecindida, mucazwira mitemo yangu.
16 Inini ndicakumbira Baba uye awona acamupasai mubetseri* umweni kuti agare na imwimwi nokusikaperi,
17 iwona ndi mwiya we cokwadi, wekuti nyika aingautambiri, ngokuti aiuoni uye aiuzii. Imwimwi munouziya, ngokuti unorumbwa una imwimwi uye uri mukati menyu.
18 Andizomusii muri mwega.* Inini ndicauya kamuri.
19 Mbai-mbai pano nyika aizondionizve, asi imwimwi mucandiona, ngokuti inini ndino upenyu uye imwimwi mucagarawo no upenyu.
20 Mu zuwa irona imwimwi mucaziya kuti inini ndiri mu rubatano na Baba uye inini ndiri mu rubatano na imwimwi uyewo imwimwi muri mu rubatano na inini.
21 Munhu wese anocengeta mitemo yangu ndiyena anondida. Uye wese anondida acadiwa na Baba angu, inini ndicamuda uye ndicanyasa kudzipangidza kaari.”
22 Djudhasi, haiwa Djudhasi Iskariyoti, wakamubvunzisa kuti: “Tenzi, cinyi caitika kuti imwimwi mude kudzipangidza katiri, pane kudzipangidza ku nyika?”
23 Djesu akamudaira kuti: “Kana munhu akandida, acazwira masoko angu, uye Baba acamuda, uye ticauya kaari togara naye.
24 Uya asikandidi aazwiri masoko angu. Uye soko rauri kuzwa arangupi, asi nge ra Baba akandituma.
25 “Inini ndiri kumubvunzai zviro izvi pandinonga ndiciri na imwimwi.
26 Asi mubetseri, mwiya mucena, ucatumwa na Baba mu zina rangu, ucamufundisai zviro zvese uye ucaita kuti muedzurire zviro zvese zvandakamubvunzai.
27 Ndinomusiirai runyararo; ndinomupasai runyararo rangu. Andimupasii hinga mushobo unopasa nyika, musagare mecinetseka mu mwoyo uye mecithya.
28 Makazwa zvandakamubvunzai kuti: ‘Ndiri kuenda uye ndicahwirira kamuri.’ Kudai maindida, maizopfara ngokuti ndiri kuenda kuna Baba, ngokuti Baba akuru kudarika inini.
29 Inini ndamubvunzai zviro izvi zvisati zvaitika, kuitira kuti kana zvikaitika, imwimwi muzvitendere.
30 Andicareketizve zvakawanda na imwimwi, ngokuti mutongi we nyika ari kuguma, uye iyena aana simba pandiri.
31 Asi kuitira kuti nyika iziye kuti inini ndinoda Baba, ndinoita zviro hinga zvandakabvunzwa na Baba. Mukai, ngatibude pano.
