Akatarhwa na Juau 15:1-27
15 “Inini ndiri muuvha we zvirokwazvo, uye Baba angu ndiwo murimi.
2 Awona anobvisa nhai dzese mandiri dzisikabari micero, uye anocenesa nhai dzese dzinobara micero, kuti dzibare micero dzakawanda.
3 Imwimwi maceneswa nge ndaa ye masoko andamubvunzai.
4 Rumbwai muri mu rubatano na inini, uye inini ndicarumbwa ndiri mu rubatano na imwimwi. Kuita hingana nhai isikakwanisi kubara micero kana isiripi pa muuvha, imwimwiwo amukwanisi kubara micero kana mukatama kurumbwa muri mu rubatano na inini.
5 Inini ndiri muuvha; imwimwi ndimwi nhai. Uya anorumbwa ari mu rubatano na inini uye inini mu rubatano naye, iyena anobara micero yakawanda; ngokuti apana camunokwanisa kuita kana musiripi mu rubatano na inini.
6 Kana munhu akatama kurumbwa ari mu rubatano na inini, iyena acakhandirhwa kunza hinga nhai uye yooma. Nhai idzona dzicaunganidzwa, dzokhandirhwa pa muriro uye dzopsva.
7 Kana imwimwi mukarumbwa muri mu rubatano na inini uye masoko angu orumbwa ari mamuri, kumbirai zvese zvamuri kuda uye zvicamuitikirai.
8 Izvi zvinokudza Baba angu, kuti murumbwe mecibara micero dzakawanda uye mopangidza kuti muri afundi angu.
9 Kuita hingana Baba anondida, inini ndinomudai; rumbwai muri mu rudo rangu.
10 Kana imwimwi mukazwira mitemo yangu, mucarumbwa muri mu rudo rangu, kuitawo hinga inini ndinozwira mitemo ya Baba angu uye ndinorumbwa ndiri mu rudo rawo.
11 “Inini ndamubvunzai zviro izvi, kuti imwimwi muzwewo mupfaro umwewo wandiri kuzwa uye kuti mupfaro wenyu unyase kudzadzika.
12 Uu ndiwo mutemo wangu: Dananai, hinga mushobo wandakamudai.
13 Apana munhu ano rudo rakakura kudarika uya anopasa upenyu* wake nge ndaa ye shamwari dzake.
14 Imwimwi ndimwi shamwari dzangu kana mukaita zvandinomubvunzai.
15 Andicamudainziizve aranda, ngokuti muranda aazvizii zvinoizwa na tenzi wake. Asi ndinomudainzai shamwari, ngokuti ndamuziisai zvese zvandakazwa na Baba angu.
16 Imwimwi amuzi kundisanangura, asi inini ndini ndakamusanangurai, uye ndakamupasai basa re kuenda uye kurumbwa mecibara zvibereko, zvibereko zvinorumbwa zviripo, kuitira kuti zvese zvamunokumbira Baba mu zina rangu, amupasei.
17 “Inini ndiri kumubvunzai zviro izvi kuti mudanane.
18 Kana nyika yecimuzondai, imwimwi munozviziya kuti yakatanga kundizonda isati yamuzondai.
19 Kudai imwimwi maiita dii re nyika, nyika yaizomudai ngokuti muri e nyika. Zvino, sezvo amuiti dii re nyika, asi inini ndakamusanangurai mu nyika, ndiyo ndaa nyika inomuzondai.
20 Edzurirai zvandamubvunzai: Muranda amukurupi kudarika tenzi wake. Kana akateerera inini, acateererawo imwimwi; kana akazwira masoko angu, acazwirawo masoko enyu.
21 Asi acamuitirai zviro zvese izvi nge ndaa ye zina rangu, ngokuti aazii Uya akandituma.
22 Kudai ndisikazi kuuya uye ndoreketa nawo, angadai asina ndaa yo citema cawo. Asi zvino, awona aana marambire aangaita citema cawo.
23 Uya anondizonda, anozondawo Baba angu.
24 Kudai ndainga ndisikazi kuita mabasa pakati pawo okuti apanazve umweni akamboaita, angadai asina ndaa yo citema; asi zvino awona akaona ndeciaita uye akazonda inini na Baba angu.
25 Asi izvi zvaitika kuti adzadzike masoko akatarhwa mu mutemo wawo ekuti: ‘Akandizonda pasina cikonzero.’
26 Panozoguma mubetseri wandicamutumirai kubva kuna Baba, mwiya we cokwadi, unobva kuna Baba, iwona ndiwo ucandipupurira;
27 uye imwimwi mucapupurirawo, ngokuti makagara na inini kubvira pakutanga.
Masoko ari pasi
^ Kana kuti: “mwiya.”
