Akatarhwa na Juau 16:1-33
16 “Inini ndamubvunzai zviro izvi kuti imwimwi musakuhunyike.*
2 Anhu acamudzingirai mu masinagoga. Zvezvirokwazvo, iri kuuya nguwa yekuti aya acamuurayai acarangarira kuti ari kuitira Mwari basa rakacena.
3 Asi awona acaita izvona ngokuti aazii Baba uye aatoziiwo inini.
4 Hino inini ndamubvunzai zviro izvi kuitira kuti kana ikaguma nguwa yekuti izvona zviitike, imwimwi muedzurire zvandamubvunzai.
“Andizi kumubvunzai pakutanga ngokuti ndainga ndinemwi.
5 Asi zvino ndiri kuenda kuno Uya akandituma; kunyazi zvakadaro, apana kana umwe wenyu ari kundibvunzisa kuti: ‘Tenzi, muri kuendepi?’
6 Pane kudaro, mwoyo yenyu yakatsukwara maningi ngokuti ndamubvunzai zviro izvi.
7 Kunyazi zvakadaro, ndinomubvunzai zvirokwazvo kuti, ndiri kuenda kuti mubetsereke. Ngokuti kana ndikatama kuenda, mubetseri aazouyi kamuri; asi kana ndikaenda, ndicamutumira kamuri.
8 Uye kana iyena akauya, acapa upupuri unogutsa panocokuita no citema, unatsi uye kutonga:
9 Kutanga, panocokuita no citema, ngokuti awona aapangidzi kutenda mandiri;
10 mumasure mazvo, panocokuita no unatsi, ngokuti ndiri kuenda kuna Baba uye imwimwi amucandionizve;
11 pedzepo, panocokuita no kutonga, ngokuti mutungamiriri we nyika ino watongwa.
12 “Ndicino zviro zvakawanda zvekumubvunzai, asi zvino imwimwi amukwanisi kuzvizwisisa.
13 Asi kana iyena* akauya, mwiya we cokwadi, acamutungamirirai mu cokwadi cese, ngokuti aazoreketi nge kuda kake, asi acareketa zviya zvaakazwa, uye acamuziisai zviro zvicauya.
14 Iyena anozondikudza, ngokuti anozomuziisai zviro zvaacatambira kubva kandiri.
15 Zviro zvese zva Baba nge zvangu. Ndiyo ndaa ndamubvunzai kuti iyena anozomuziisai zviro zvaacatambira kubva kandiri.
16 Mbai-mbai pano amucandionizve; asi mbai-mbai pano mucandionazve.”
17 Ngokudaro, anganani e afundi ake akatanga kubvunzisana kuti: “Iyena ari kuda kubhuyei no masoko okuti: ‘Mbai-mbai pano amucandionizve; asi mbai-mbai pano mucandionazve,’ uye, ‘ngokuti ndiri kuenda kuna Baba’?”
18 Awona aibhuya kuti: “Ari kuda bhuyei no masoko okuti: ‘Mbai-mbai pano’? Atizvizii zvaari kureketa.”
19 Djesu aizviziya kuti awona aida kumuita mibvunzo, ndiyo ndaa akaabvunza kuti: “Imwimwi muri kubvunzisana pacenyu kuti ndaida kubhuyei no masoko okuti: ‘Mbai-mbai pano amucandionizve; asi mbai-mbai pano mucandionazve?’
20 Zvezvirokwazvo ndinomubvunzai kuti, imwimwi mucacema uye mucatsumba, asi nyika icapfara; imwimwi mucatsukwara, asi kutsukwara kenyu kucacinjwa kogara mupfaro.
21 Mwanakadzi paanonga ecibara, iyena anoshuphika ngokuti nguwa yake inonga yaguma, asi kana akabara mwana wake, iyena aacaedzuririzve kutambudzika kake nge ndaa ye mupfaro wekuti munhu wauya mu nyika.
22 Nge mushobo umwewo, zvino imwimwi makatsukwara; asi inini ndicamuonaizve, uye mwoyo yenyu icapfara, uye apana acamutorerai mupfaro wenyu.
23 Pa zuwa irona, imwimwi amuzondiiti kunyazi mubvunzo umwe. Zvezvirokwazvo ndinomubvunzai kuti, kana mukakumbira Baba ciro cipi haco mu zina rangu, awona acamupasai.
24 Dakara zvino apana kana ciro cimwe haco camakumbira mu zina rangu. Kumbirai uye mucapaswa, kuitira kuti mupfaro wenyu udzadzike.
25 “Inini ndamubvunzai zviro izvi ndeciseenzesa miezaniso. Icakwana nguwa yekuti ndicabhuya na imwimwi ndisikaseenzesi miezaniso, asi ndicamudjekeserai zvinocokuita na Baba.
26 Mu zuwa irona imwimwi mucakumbira Baba mu zina rangu; pandiri kureketa izvi, andiripi kureya kuti ndini ndicamukumbirirai.
27 Baba anomudai, ngokuti imwimwi munondida uye munotenda kuti ndakauya hinga muimiriri wa Mwari.
28 Ndakauya mu nyika hinga muimiriri wa Baba. Parizvino ndiri kusiya nyika uye ndiri kuenda kuna Baba.”
29 Afundi ake akabhuya kuti: “Zvino taakukwanisa kuzwisisa ngokuti muri kureketa zvakadjeka uye amuripi kuseenzesa miezaniso.
30 Zvino taakuzviziya kuti imwimwi munoziya zviro zvese uye amudikani kubvunziswa. Ndiyo ndaa tinotendera kuti imwimwi makabva kuna Mwari.”
31 Djesu akaadaira kuti: “Maakutendera zvino?
32 Izwai! Iri kuuya nguwa, uye zvino yatoguma, yekuti imwimwi mucabarariswa, umwe na umwe woenda kumba kake uye mucandisiya ndega. Asi inini andiripi ndega, ngokuti Baba aneni.
33 Inini ndamubvunzai zviro izvi kuitira kuti peciseenzeswa inini, imwimwi mugare mu runyararo. Mu nyika mucasongana no matambudziko, asi shingai! Inini ndakunda nyika.”
Masoko ari pasi
^ Kana kuti: “musaruze kutenda kenyu.”
^ Soko rokuti “iyena” mu mavhersikuro 13 na 14, rinoda kubhuya ngezve mubetseri anorekethwa mu vhersikuro 7. Djesu akaseenzesa soko rekuti “mubetseri” ecireketa ngezve mwiya mucena, simba risiripi munhu. Soko iri mu Cigrego rinonga recireketa ngezve ciro haiwa munhu.
