Akatarhwa na Juau 17:1-26
17 Djesu akareketa izvi, uye akaringira kudenga obhuya kuti: “Baba, nguwa yaguma. Kudzai mwana wenyu, kuti mwana wenyu amukudzeiwo,
2 sezvo makamupasa simba pamusoro pe anhu ese,* kuti iyena apase upenyu usikaperi ku anhu ese amakamupasa.
3 Kuti aone upenyu usikaperi, anodikana kuziya imwimwi, Mwari umwe basi we zvirokwazvo, no uya wamakatuma, Djesu Kristu.
4 Ndakamukudzai pa nyika, uye ndakapedza basa ramakandipasa kuti ndiite.
5 Uye zvino, Baba, ndikudzei pa dii renyu no rukudzo randainga ndinaro pandainga ndinemwi nyika isati yasikwa.
6 “Ndakaita kuti anhu amakandipasa pa nyika aziye zina renyu. Awona ainga ari enyu, imwimwi makandipasa, uye akazwira soko renyu.
7 Zvino awona anozviziya kuti zviro zvese zvamakandipasa zvinobva kamuri;
8 ngokuti inini ndakaaziisa masoko amakandipasa, awona akaatenda uye zvezvirokwazvo anozviziya kuti ndakauya hinga muimiriri wenyu, uye anotenda kuti imwimwi makandituma.
9 Ndinoakumbirira; andiripi kukumbirira nyika, asi ndiri kukumbirira aya amakandipasa, ngokuti nge enyu;
10 zviro zvangu zvese nge zvenyu, zviro zvenyu nge zvangu, uye inini ndakakudzwa pakati pawo.
11 “Andiciripizve mu nyika, asi awona ari mu nyika, uye inini ndiri kuuya kamuri. Baba Akacena, aonererei nge ndaa yo zina renyu, zina ramakandipasa, kuti awona agare umwe,* hinga isusu tiri umwe.*
12 Pandainga ndinawo, ndaiaonerera nge ndaa yo zina renyu, zina ramakandipasa; inini ndakaadziirira, uye apana umwe wawo wakapsveteka, kunza ke mwana we kutsakatiswa, kuitira kuti Matarhwa adzadzike.
13 Asi zvino ndiri kuuya kamuri, uye ndiri kureketa zviro izvi mu nyika, kuitira kuti awona apfare maningi ngo mupfaro wangu.
14 Inini ndaapasa soko renyu, asi nyika inoazonda, ngokuti awona aaiti dii ro nyika, hinga inini ndisikaiti dii ro nyika.
15 “Andiripi kukumbira kuti muabvise mu nyika, asi kuti muaonerere nge ndaa yo Wakashata.
16 Awona aaiti dii ro nyika, hinga inini ndisikaiti dii ro nyika.
17 Acenesei meciseenzesa cokwadi, soko renyu i cokwadi.
18 Kuita hingana kundituma kamakandiita mu nyika, inini ndakaatumawo mu nyika.
19 Inini ndinodzicenesa kuti awona abetsereke, kuitira kuti awona aceneswewo peciseenzeswa cokwadi.
20 “Andikumbiriri aya basi, asi ndinokumbirirawo aya anopangidza no masoko awo kuti anotenda mandiri,
21 kuti ese agare umwe, hinga imwimwi Baba, muri mu rubatano na inini uye inini ndiri mu rubatano na imwimwi, kuitira kuti awona agarewo mu rubatano na isusu, kuti nyika itende kuti imwimwi makandituma.
22 Inini ndakaapasa rukudzo ramakandipasa, kuitira kuti awona agare umwe, hinga isusu tiri umwe.
23 Inini mu rubatano nawo, uye imwimwi mu rubatano na inini, kuitira kuti agare akanyasa kubatana, kuti nyika iziye kuti imwimwi makandituma uye kuti makaada, hinga kuda kamakandiita.
24 Baba, ndinoda kuti aya amakandipasa agare na inini pandinonga ndiri, kuti awona aone rukudzo ramakandipasa, ngokuti makandida nyika isati yasikwa.
25 Baba Munatsi, nyika aitomuzii, asi inini ndinomuziyai, uye aya anozviziya kuti imwimwi makandituma.
26 Ndakaaziisa zina renyu uye ndicariziisa, kuti rudo ramakandida naro rigare maari uye inini ndigare mu rubatano nawo.”
