Akatarhwa na Juau 18:1-40
18 Mumasure me kubhuya izvi, Djesu no afundi ake akaenda ku n’ombera ke bani* ro Sedroni, kweneyo kainga kuno munda umweni, uye iyena pamwepo no afundi ake akapindemo.
2 Djudhasi, uya waimutengesa waiiziyawo mbuto iyona, ngokuti Djesu akaendeyo kakawanda no afundi ake.
3 Hino Djudhasi wakaendeyo no cikwata ce masurudado uye no arindi* ainga atumwa no atungamiriri e apristi uye Afarisi, akagumeyo no zvitsa zvokuvhekera nazvo, zvibani no zvokurhwa nazvo.
4 Djesu eciziya zvese zvaida kumuitikira, akaenda mberi oabvunzisa kuti: “Muri kupsvaka ani?”
5 Awona akamudaira kuti: “Djesu we ku Nazareta.” Iyena akaabvunza kuti: “Ndini.” Mutengesi Djudhasi, wainga ari pamwepo nawo.
6 Asi Djesu paakaabvunza kuti: “Ndini,” awona akahwirira sure uye akambwera pasi.
7 Hino iyena akaabvunzisazve kuti: “Muri kupsvaka ani?” Awona akamubvunza kuti: “Djesu we ku Nazareta.”
8 Djesu akaadaira kuti: “Inini ndamubvunzai kuti ndini. Hino kana muri kupsvaka inini, siyai kuti anarume aya aende.”
9 Izvi zvakaitika kuti zvidzadzike zvaainga abhuya: “Andizi kuruza kunyazi umwe we aya amakandipasa.”
10 Hino Simoni Pedru, wainga ano supada imwe, iyena wakaivhorora uye wakagura nzee yo moko kwawo yo muranda we mupristi mukuru. Murandewo waizwi Mariko.
11 Asi Djesu akati kuna Pedru: “Kanda supada pa mbuto yayo. Kodi andidikani here kumwira mu kopo yandakapaswa na Baba?”
12 Masurudado, mutungamiri we masurudado no arindi e Adjudha, akabata Djesu uye omusunga.
13 Awona akamutora otanga kuenda naye kuna Anasi, ngokuti wainga ari amukweguru a Kaifasi. Kaifasi wainga ari mupristi mukuru mu gore irona.
14 Kaifasi ndiye wainga abvunza Adjudha kuti zvaizobetsera kuti munhu umwe afire anhu ese.
15 Simoni Pedru no mufundi umweni, aiteera Djesu. Mufundi uu waiziikanwa no mupristi mukuru, uye wakapinda na Djesu pa ruwanze ro mupristi mukuru,
16 asi Pedru wakasara kunza padhuze no pa musuwo. Ngokudaro, mufundi uya waiziikanwa no mupristi mukuru, wakabuda, woreketa no museenzi we mwanakadzi waionerera pa musuwo uye wakatora Pedru wopinda naye.
17 Hino museenziwo* wakabvunzisa Pedru kuti: “Iwewe auripiwo umwe we afundi e mwanarume uu?” Iyena wakadaira kuti: “Haiwa.”
18 Aranda no arindi ainga ecigota muriro waainga abatidza, ngokuti kainga kecitonhora. Pedru wainga ecigotawo muriro nawo.
19 Hino mutungamiriri we apristi wakabvunzisa Djesu ngezve afundi ake uye nge zviya zvaaifundisa.
20 Djesu akamudaira kuti: “Ndakafundisa pamberi pe anhu akawanda. Ndaigara ndecifundisa mu masinagoga no mu tempro munoungana Adjudha ese, uye apana candakabhuya mu cifise-fise.
21 Ngei mecindiita mibvunzo? Bvunzisai aya akazwa zvandakaabvunza. Zvezvirokwazvo awona anozviziya zvandakabhuya.”
22 Mumasure mekuti Djesu abhuya izvi, musurudado umweni wainga ari ipona wakamuponda mbama uye wakamubvunza kuti: “Ngei uri kudaira kudaro mutungamiriri we apristi?”
23 Djesu akamudaira kuti: “Kana inini ndabhuya ciro cakashata, bhuya kuti cinyi candabhuya cakashata; asi kana inini ndabhuya zviri mugwanza, ngei iwewe wandiponda?”
24 Hino Anasi wakamutumira akasungwa kuna Kaifasi, mupristi mukuru.
25 Simoni Pedru wainga ari ipona uye waigota muriro. Hino anhu akamubvunzisa kuti: “Iwewewo auripi umwe we afundi ake?” Iyena wakarambira eciti: “Haiwa.”
26 Umwe we aranda e mupristi mukuru, nyaukama we uya wakagurhwa nzee na Pedru, wakamubvunzisa kuti: “Andizi kukuona iwewe pamwepo naye mu munda uya?”
27 Asi Pedru wakarambirazve, uye ciriporipoco djongwe rakarira.
28 Hino akabva na Djesu kuna Kaifasi oenda naye ku nyumba ya govhernadhori. Kainga kaa macibesi-besi. Asi awona aazi kupinda pa ruwanze pe govhernadhori, kuti asasvipiswe kuitira kuti azorhye Paskwa.
29 Pirato wakabuda woenda kaainga ari uye wakaabvunzisa kuti: “Munhu uu muri kumupumha ndaa yei?”
30 Awona akamudaira kuti: “Kudai mwanarume uu ainga asina ndaa,* kudai tisikazi kumuunzisa kamuri.”
31 Hino Pirato wakaabvunza kuti: “Mutorei uye mutongei maererano no mutemo wenyu.” Adjudha akamubvunza kuti: “Atitenderhwi kuuraya munhu.”
32 Izvi zvakaitika kuti adzadzike masoko akabhuya Djesu ecipangidza mushobo waaizofa.
33 Hino Pirato wakapindazve mumba ma govhernadhori, wakadainza Djesu uye wakamubvunzisa kuti: “Iwewe ndiwe Mambo we Adjudha here?”
34 Djesu akabhuya kuti: “Imwimwi muri kundibvunzisa ngokuti munorangarira kudaro, kana kuti pano munhu wamubvunzai nge zvangu?”
35 Pirato wakadaira kuti: “Kodi ndiri Mudjudha here inini? Anhu e dzinza rako no atungamiriri e apristi akuunzisa kandiri. Zvinyi zvawaita?”
36 Djesu akadaira kuti: “Umambo wangu auiti dii re nyika ino. Kudai Umambo wangu wainga uri we nyika ino, ateeri angu angadai arhwisa kuti Adjudha asandisunge. Asi zvirokwazvo nge zvekuti, Umambo wangu auiti dii re nyika ino.”
37 Ngokudaro, Pirato wakamubvunzisa kuti: “Hino iwewe uri mambo?” Djesu akadaira kuti: “Imwimwi ndimwi muri kuzvibhuya kuti ndiri mambo. Ndizvo zvandakabarirhwa, uye zvandakauira mu nyika, kuti ndipase upupuri we cokwadi. Wese uya ari ku dii ro cokwadi anozwa izwi rangu.”
38 Pirato wakamubvunzisa kuti: “Cinyi cinozwi cokwadi?”
Mumasure me kubhuya izvi, iyena wakaendazve kuno Adjudha uye woabvunza kuti: “Andiripi kuona cikonzero ce kumupumha.
39 Kusiya izvona, imwimwi muno musambo wo kukumbira kuti ndisudzunure munhu umwe pa mutambo we Paskwa. Hino munoda kuti ndisudzunure Mambo we Adjudha here?”
40 Awona akakhuwazve eciti: “Atidi kuti mwanarume uu asudzunurhwe, tinoda Bharabhaa!” Bharabhaa wakhona wainga ari bhinya.
Masoko ari pasi
^ Kana kuti: “murambo we Sedroni.”
^ Kana kuti: “arindi e tempro.”
^ Kana kuti: “mwanakadziwo.”
^ Kana kuti: “asiripi mushaishi.”
