Akatarhwa na Juau 19:1-42
19 Pirato wakatora Djesu uye wakaita kuti apondwe.
2 Masurudado akaruka korowa yo minzwa oikanda mu musoro make uye akamupfekedza djira rokupsvuka.
3 Awona aimukhwederera uye aimubvunza kuti: “Mucaita wani Mambo we Adjudha!” Awona aimupondawo mbama.
4 Pirato wakabudazve uye wakati ku anhu: “Izwai! Ndicamuunzisa kunza kuno kuitira kuti muziye kuti andiripi kuona cikonzero ce kumupumha.”
5 Hino Djesu akabuda, akapfeka korowa yo minzwa no djira rokupsvuka. Pirato wakaabvunza kuti: “Uri pano uu!”
6 Asi atungamiriri e apristi no arindi* paakamuona, akakhuwa eciti: “Ngaakhomerhwe pa mutanda! Ngaakhomerhwe pa mutanda!” Pirato wakaabvunza kuti: “Mutorei mumuuraye ndimwi, ngokuti andiripi kuona cikonzero ce kumupumha.”
7 Adjudha akamudaira kuti: “Tino mutemo uye maererano no mutemo uwona iyena anodikana kufa, ngokuti adziita mwana wa Mwari.”
8 Pirato paakazwa zvaaireketa, wakabambirira kuthya;
9 iyena wakapindazve mumba ma govhernadhori uye wakabvunzisa Djesu kuti: “Uri we kupi?” Asi Djesu aazi kumudaira ciro.
10 Ndiyo ndaa, Pirato wakamubvunzisa kuti: “Iwewe audi kureketa na inini? Auzvizii kuti ndino simba ro kukusudzunura uye ndino simba ro kukutongera rufu?”
11 Djesu akamudaira kuti: “Imwimwi mungadai musina simba pandiri kudai musikazi kuripaswa recibva kudenga. Ndiyo ndaa munhu andikanda mu nyara dzenyu uno citema cakakura.”
12 Ndiyo ndaa, Pirato waipsvaka mukana we kumusudzunura, asi Adjudha aikhuwa eciti: “Kana imwimwi mukasudzunura mwanarume uu, amuripi shamwari ya Sezari. Wese uya anodziita mambo anopesana na Sezari.”
13 Hino, mumasure me kuzwa masoko aya, Pirato wakatora Djesu woenda naye kunza, uye wakagara pa tribhunari, pa mbuto inozwi Mbuto Yakagadzirhwa no Mapuwe, mu Cihebheru inozwi Gabhata.
14 Rainga riri zuwa ro kugadzirira Paskwa;* pa nguwa dzinokwana kuita 12 dzo masikati.* Iyena wakati ku Adjudha: “Uri pano mambo wenyu uu!”
15 Asi awona akakhuwa eciti: “Muurayei! Muurayei! Ngaakhomerhwe pa mutanda!” Pirato wakaabvunzisa kuti: “Ndinodikana kuuraya mambo wenyu?” Atungamiriri e apristi akadaira kuti: “Atina mambo umweni kunza ka Sezari.”
16 Ngokudaro, Pirato wakamukanda mu nyara dzawo kuti amuuraye pa mutanda.
Kubvira pa nguwa iyona, Djesu ainga aa mu nyara dzawo.
17 Ecithwara ega mutanda,* Djesu akaenda ku mbuto inozwi Mbuto yo Dehenya, mu Cihebheru inodainzwa kuti Gorokota.
18 Kweneyo awona akamukhomera pa mutanda pakati pe anarume airi, umwe ku dii rimwe, umweni ku dii rimweni uye Djesu ainga ari pakati.
19 Pirato wakatara masoko uye woakanda pa mutanda.* Ipona painga pakatarhwa kuti: “Djesu we ku Nazareta, Mambo we Adjudha.”
20 Adjudha akawanda akaerenga masoko awona, ngokuti mbuto yakakhomerhwa Djesu pa mutanda yainga iri dhuze no thaundi, uye masoko awona ainga akatarhwa mu Cihebheru, mu Ciratim, no Cigrego.
21 Atungamiriri e apristi e Adjudha akabvunza Pirato kuti: “Musatare kuti: ‘Mambo we Adjudha,’ asi tarai kuti iyena wakabhuya kuti: ‘Inini ndiri Mambo we Adjudha.’”
22 Pirato wakadaira kuti: “Zvandatara, ndatara.”
23 Hino, mumasure me kukhomera Djesu pa mutanda, masurudado akakoanisana macira ake ke matii marongomuna, musurudado umwe na umwe wakatora dii rake, uyewo akatorawo djira rake rokunza. Asi djirero rainga risikazi kusonwa, ngokuti rainga rakarukwa kubvira pasi dakara mudenga.
24 Nge ndaa yazvo, awona akabvunzana kuti: “Ngatisarimwese, asi ngatikhandire mudjenya kuti tione kuti ricapaswa ani. Izvona zvakaitika kuitira kuti adzadzike Matarhwa ekuti: “Awona akagawana macira angu, uye akakhandira mudjenya ngo pamusoro pe djira rangu ro kunza.” Uye ndizvo kamare zvakaizwa no masurudado.
25 Padhuze no pa mutanda* wainga wakakhomerhwa Djesu, painga pano mai ake no hanzvadzi yawo; Mariya mukadzi wa Kropa, pamwepo na Mariya Madharena.
26 Hino Djesu paakaona kuti mai ake no mufundi waaida ainga ari padhuzepo, iyena akati kuna mai ake: “Uu ndiye mwana wenyu!”
27 Pedzepo akati ku mufundi uya: “Aya ndiwo mai ako!” Uye kubvira ipona kuenda mberi, mufundiwo wakaatora woenda nawo kumba kake.
28 Mumasure mazvo, Djesu akaziya kuti zviro zvese zvainga zvaitika, hino kuti adzadzise Matarhwa iyena akati: “Ndino mukaha.”
29 Ipona painga pano jaro yakadzara no vhinyu inojaja. Hino akatora ciponja cakadzara no vhinyu inojaja ocikanda pa gonje ro isopo uye orimutsa ocikanda pa muromo wake.
30 Mumasure me kuraira vhinyu inojaja, Djesu akati: “Zvaitika!” Iyena akasikisira, pedzepo akafa.*
31 Sezvo rainga riri zuwa re Kugadzirira, Adjudha akakumbira Pirato kuti anarume aya agurhwe-gurhwe mirenje dzawo uye mitumbi dzawo dzibviswe, kuti dzisagare pa mitanda* pa zuwa re Sabudu (ngokuti Sabudu irona rainga riri Sabudu guru).
32 Ngokudaro, masurudado akaenda uye akagura-gura mirenje dzo mwanarume wekutanga uye dzo mwanarume wainga ari ku dii rimweni.
33 Asi paakaguma pana Djesu, akaona kuti iyena ainga afa, nge ndaa yazvo aazi kugura-gura mirenje dzake.
34 Asi musurudado wakamubora pa muceto pake no pfumo, uye ciriporipoco pakabuda ngazi no mvura.
35 Uya wakaona izvi anopa upupuri uye upupuri wake nge we zvirokwazvo uye iyena anozviziya kuti anoreketa zvirokwazvo, kuitira kuti imwimwi mutendere.
36 Zvezvirokwazvo, zviro izvi zvakaitika kuti adzadzike Matarhwa anoti: “Apana kana godo rimwe rake ricagurhwa.”*
37 Uye Matarhwa amweni anoti: “Acaringira uya waakabora.”
38 Mumasure me zviro izvi, Zuzee we ku Arimateya, wainga ari mufundi wa Djesu asi mucifise-fise ngokuti waithya Adjudha, wakabvunzisa Pirato kuti zvaiita here kubvisa mutumbi wa Djesu, uye Pirato wakamutendera. Ngokudaro, iyena wakaenda koobvisa mutumbiwo.
39 Nikodhemo, mwanarume uya wainga waenda koocedza na Djesu ke kutanga cousiku, wakaendawo, uye wakatora mubatanidzwa we mira no bhabhoza, izvona zvairema makiru angakwana kuita 33.*
40 Awona akatora mutumbi wa Djesu uye akauputiridza no djira pamwepo no mafuta anonuhwirira, maererano no tsika dzo Adjudha dzo kugadzirira mutumbi kuti ukotswe.
41 Pa mbuto yainga yakhomerhwa* Djesu, painga pano munda umweni uye painga pano guwa* ripsva rokuti rainga risati rakambokotserhwa munhu.
42 Ngokuti rainga riri zuwa ro Kugadzirira re Adjudha uye guwa rainga riri padhuze, akakanda Djesu imona.
Masoko ari pasi
^ Kana kuti: “arindi e tempro.”
^ Soko rekuti Paskwa pa vhersikuro ii, riri kuda kureya ngezve sumana yo Paskwa, inobatanidza mutambo we Pau Dzisina Mbiriso.
^ Cigrego: “nguwa yocitanhatu.”
^ Kana kuti: “mutanda we kutambudzikira.” Onai pakazwi Kupanganidzwa ke Masoko.
^ Kana kuti: “mutanda we kutambudzikira.” Onai pakazwi Kupanganidzwa ke Masoko.
^ Kana kuti: “mutanda we kutambudzikira.” Onai pakazwi Kupanganidzwa ke Masoko.
^ Kana kuti: “akafema kekupedzesera.”
^ Kana kuti: “mitanda dze kutambudzikira.” Onai pakazwi Kupanganidzwa ke Masoko.
^ Kana kuti: “kudzengenyesa.”
^ Kana kuti: maribra 100, aya ndi maribra e Ciroma. Onai Apendi. B14.
^ Kana kuti: “yaurairhwa.”
^ Kana kuti: “guwa re anoedzurirhwa.”
