Akatarhwa na Juau 2:1-25
2 Pa zuwa rocitatu, kakaizwa mabiko e mucato ku Kanaa yo Garireya, uye mai a Djesu ainga ari ikona.
2 Djesu no afundi ake akapikwawo ku mabiko e mucato iwona.
3 Vhinyu payainga yecipera, mai a Djesu akamubvunza kuti: “Awona aacina vhinyu.”
4 Asi Djesu akaadaira kuti: “Tinei nazvo isusu? Nguwa yangu aisati yakwana.”
5 Mai ake akati ku aya aiseenza pa mucato: “Itai zvese zvaanomubvunzai.”
6 Ipona painga pano hari 6 dze buwe dzo kukandira mvura maererano no zvaikumbirhwa no mutemo we kudzicenesa we Adjudha, hari imwe na imwe yaipinda maritru angakwana 44 kana 66.
7 Djesu akaabvunza kuti: “Dzadzai hari dzese no mvura.” Uye awona akadzidzadza dakara pa muromo.
8 Iyena akaabvunza kuti: “Cerai padoko muende koopasa mutungamiriri we mabiko.” Uye awona akazviita.
9 Mutungamiriri we mabiko e mucato paakaraira mvura yainga yacinjwa kuita vhinyu, asikazvizii kuti vhinyuyo yainga yabva kupi (kunyazi hazvo aseenzi e mucato ainga acera mvura ecizviziya), mutungamiriri we mabiko e mucato wakadainza mwanarume waicata
10 uye wakamubvuza kuti: “Anhu ese anotanga kubudisa vhinyu yakanaka, uye kana anhu akararadza, anozobudisa isikazi kunyasa kunaka. Iwewe wacengeta vhinyu yakanaka dakara zvino.”
11 Djesu akaita izvi ku Kanaa yo Garireya hinga kutanga ke zvishamiso zvake, iyena akapangidza rukudzo rake, uye afundi ake akatenda maari.
12 Pedzepo, iyena, mai ake, hama dzake no afundi ake akateredza ku Kafarnau, asi aazi kugara ikona ke mazuwa akawanda.
13 Paskwa yo Adjudha yainga yaapadhuze uye Djesu akakwidza ku Djerusarema.
14 Paakapinda mu tempro, iyena akagumira anhu aitengesa n’ombe, mabira no njiwa, uye anhu aicinja mare ainga akagara pa mbuto dzawo.
15 Ngokudaro, mumasure me kugadzira mushamu we mapote, akadzingira anhu ese mu tempro, mabira no n’ombe, akabararisa mare yo anocinja mare uye akaminura mameza awo.
16 Uye akati ku anhu aitengesa njiwa: “Bvisai zviro izvi pano! Imai kuseenzesa nyumba ya Baba angu hinga mbuto ye kutengesera zviro!”*
17 Afundi ake akaedzurira zvainga zvakatarhwa kuti: “Rudo randinaro no nyumba yenyu raizoita hinga muriro uri kubaka mu mwoyo mangu.”
18 Ngokudaro, Adjudha akamubvunzisa kuti: “Cipangidzo cipi caungatipasa cinopangidza kuti uno citenderhwa cokuita zviro izvi?”
19 Djesu akaadaira kuti: “Phwanyai tempro ii, uye inini ndicaiwaka ke mazuwa matatu.”
20 Hino Adjudha akamubvunza kuti: “Tempro ii yakapedza makore 46 yeciwakwa, iwewe ndiwe ucaiwaka ke mazuwa matatu?”
21 Asi tempro yaaireketa wainga uri mwiri wake.
22 Iyena paakamutswa kubva ku akafa, afundi ake akaedzurira kuti iyena aigara ecibhuya zviro izvi, uye akatenda zviri mu Matarhwa no zvakarekethwa na Djesu.
23 Asi, paainga ari mu Djerusarema pa mutambo we Paskwa, anhu akawanda akatenda mu zina rake paaiona zvishamiso zvaaiita.
24 Asi Djesu ainga asikanyasi kuathemba ngokuti aiaziya ese
25 uye ainga asikadikani kupanganidzirhwa zvakaita anhu, ngokuti iyena aiziya zviri mu mwoyo me anhu.
Masoko ari pasi
^ Kana kuti: “bazari; yokuitira bhizi.”
