Akatarhwa na Juau 20:1-31
20 Pa zuwa rokutanga re sumana, Mariya Madharena wakaguma ku guwa* comacibesi-besi, kucakasvipa, uye wakaona kuti buwe rainga riri pa guwa* rainga rabviswa.
2 Ngokudaro, iyena wakaenda ecigogoma kuna Simoni Pedru uye ku mufundi waidiwa na Djesu, uye wakaabvunza kuti: “Abvisa Tenzi mu guwa, uye atizvizii kuti amukandepi.”
3 Hino Pedru no mufundi umweni uya, akabuda ecienda ku guwa.
4 Ari airi akatanga kugogoma pamwepo, asi mufundi umweni uya wakagogoma maningi kudarika Pedru uye ndiye wakatanga kuguma ku guwa.
5 Iyena wakadongorira, uye wakaona macira ainga asiiwa imona, asi aazi kupindemo.
6 Pedzepo, Simoni Pedru, uya wainga ecimuteera, wakagumawo, iyena wakapinda mu guwa. Uye wakaona macira ainga asiiwemo.
7 Djira rainga rakapomberedzwa mu musoro make rainga risiripizve ipona pamwepo no macira amweni, asi rainga rakapomberedzwa pa muceto.
8 Hino mufundi umweni uya wakatanga kuguma pa guwa, wakapindawo, wakaona uye wakatendera.
9 Ngokuti awona ainga asati azwisisa Matarhwa anobhuya kuti iyena aidikana kumutswa kubva ku akafa.
10 Ngokudaro, afundi akahwirira kumba.
11 Asi Mariya wakasara kunza ecicema, padhuze no guwa. Paainga ecicema, iyena wakadongorira kuti aone mukati mo guwa,
12 Uye wakaona ngirozi mbiri dzakapfeka macira ekucena dzakagara pa mbuto yainga yakaradzikwa mutumbi wa Djesu, imwe yainga iri kainga kuno musoro wake uye imweni yainga iri kainga kuno mirenje dzake.
13 Idzona dzakamubvunzisa kuti: “Yaya, muri kucemei?” Iyena wakadzidaira kuti: “Atora Tenzi wangu, uye andizvizii kuti amukandepi.”
14 Mumasure me kubhuya izvi, iyena wakatendeuka uye wakaona Djesu akaima ipona, asi aazi kuzvibata kuti ainga ari Djesu.
15 Djesu akamubvunzisa kuti: “Yaya, muri kucemei? Muri kupsvaka ani?” Ecirangarira kuti wainga ari museenzi we munda, iyena wakamubvunza kuti: “Kana ndimwi mamutora, ndibvunzei kamamukanda uye ndicamutora ndoenda naye.”
16 Djesu akati kaari: “Mariya!” Paakaringira sure, iyena wakabhuya mu Cihebheru kuti: “Rabhoni (zvinoreya kuti “Mufundisi!”)
17 Djesu akamubvunza kuti: “Usarumbwe wecindibata, ngokuti andisati ndakwira kuenda kuna Baba. Asi enda koobvunza hama dzangu kuti: “Ndiri kukwira kuenda kuna Baba angu uye Baba enyu, Mwari wangu uye Mwari wenyu.’”
18 Mariya Madharena wakaenda uye wakaziisa masoko ku afundi eciti: “Inini ndaona Tenzi!” Uye wakaabvunza zvaainga abvunzwa.
19 Kainga kadoka pa zuwa irona, zuwa rokutanga ro sumana, uye misuwo ye mbuto yainga ino afundi yainga yakafungwa ngokuti aithya Adjudha. Hino Djesu akauya pakati pawo uye oabvunza kuti: “Runyararo ngarigare na imwimwi.”
20 Mumasure me kureketa zviro izvi, iyena akaapangidza nyara dzake no dii rake. Hino afundi akapfara paakaona Tenzi.
21 Djesu akaabvunzazve kuti: “Runyararo ngarigare na imwimwi. Kuita hinga Baba akandituma, inini ndiri kumutumaiwo.”
22 Mumasure me kureketa masoko aya, iyena akaafuridzira uye akaabvunza kuti: “Tambirai mwiya mucena.
23 Kana imwimwi mukarekerera zvitema zve munhu, izvona zvinonga zvarekererhwa; kana mukatama kuzvirekerera, izvona zvinonga zvisikazi kurekererhwa.”
24 Asi Tomaji, umwe we afundi 12, unodainzwa kuti Manyambiri, wainga asiripi nawo Djesu paakaguma pakati pawo.
25 Hino afundi amweni akamubvunza kuti: “Isusu taona Tenzi!” Asi iyena wakaabvunza kuti: “Kana ndikatama kuona mu nyara dzake paakakhomerhwa maperegu, ndotama kukanda cikunwe cangu pa mbuto yainga ino maperegu uye ndotama kukanda nyara yangu pa dii rake, andizozvitenderi.”
26 Mumasure me mazuwa 8, afundi ake ainga akaunganazve, uye Tomaji ainga ari pamwepo nawo. Kunyazi misuwo dzainga dzakafungwa, Djesu akaguma pakati pawo uye akati: “Runyararo ngarigare na imwimwi.”
27 Mumasure mazvo, akabvunza Tomaji kuti: “Kanda cikunwe cako apa, uye ona nyara dzangu; tambanudza nyara yako uye ikande pa dii rangu. Ima kutama kugara no cokwadi uye tenda.”
28 Tomaji wakamudaira eciti: “Tenzi wangu, Mwari wangu!”
29 Djesu akamubvunza kuti: “Iwewe watenda ngokuti wandiona? Anopfara aya asikazi kuona, asi kunyazi zvakadaro anotenda.”
30 Zvezvirokwazvo, Djesu akaita zvishamiso zvakawanda pamberi pe afundi ake, asi azvizi kutarhwa mu mupumburu uu.
31 Asi izvi zvakatarhwa kuti imwimwi mutende kuti Djesu ndi Kristu, Mwana wa Mwari, uye kuti nge ndaa yake imwimwi muone upenyu peciseenzeswa zina rake.
