Akatarhwa na Juau 21:1-25
21 Mumasure mazvo, Djesu akadzipangidzazve ku afundi ake, ku bahari ro Tibheriadhi. Iyena akadzipangidza ngo mushobo uu:
2 Simoni Pedru, Tomaji (waidainzwawo Manyambiri), Natanieri we ku Kanaa yo Garireya, ana a Zebhedheu ainga ari pamwepo kutobatanidzawo no afundi akezve airi.
3 Simoni Pedru wakaabvunza kuti: “Ndiri kuenda kooedza howe.” Awona akamubvunza kuti: “Ngatiende tese.” Ngokudaro, akaenda opakira mu bharko, asi pausiku uwona aazi kukwanisa kubata ciro.
4 Pakainga kooedza, Djesu ainga ari mu muceto me bahari, asi afundi aazi kumuziya kuti ainga ari Djesu.
5 Hino Djesu akaabvunzisa kuti: “Ana angu, muno zvokurhya* here?” Awona akadaira kuti: “Atina!”
6 Iyena akaabvunza kuti: “Khandirai maricera ku dii ro moko kwawo wo bharko uye mucabata.” Hino awona akaakhandira, asi aazi kukwanisa kuakweya nge ndaa ye kuwanda ke howe.
7 Mufundi waidiwa na Djesu wakati kuna Pedru: “Ndi Tenzi!” Paakazwa kuti ainga ari Tenzi, Simoni Pedru wakapfeka* macira ngokuti wainga asikazi kupfeka,* uye wakadzvikira mu bahari.
8 Asi afundi amweni akauya ari mu bharko doko, ecikweya maricera akadzara no howe, ngokuti ainga asiripi kure no kumuceto ke bahari, painga pano mukuwo ungakwana mametro 90 basi.*
9 Paakaguma ku muceto ke bahari, akaona kuti ipona painga pano muriro, pa muriropo painga pano howe no pau.
10 Djesu akaabvunza kuti: “Unzisai howe dzinganani dzamabva kubata.”
11 Simoni Pedru wakakwira mu bharko uye wakakweera maricera ku muceto ke bahari, awona ainga akadzara no howe dzakakura dzinokwana kuita 153. Kunyazi mainga muno howe dzakawanda, maricera aazi kumweka.
12 Djesu akaabvunza kuti: “Uyai murhye.” Apana kana mufundi umwe wakagara no ushingi we kumubvunzisa kuti iyena ainga ari ani, ngokuti aizviziya kuti ainga ari Tenzi.
13 Djesu akakhwedera kaari, akatora pau no howe, oapasa.
14 Kudzionesa ka Djesu uku ku afundi ake, kainga kuri kecitatu mumasure me kumutswa kubva ku akafa.
15 Paakapera kurhya, Djesu akati kuna Simoni Pedru: “Simoni mwana wa Juau, iwewe unondida kudarika idzi?” Iyena wakadaira kuti: “Honde Tenzi, munozviziya kuti ndinomudai.” Iyena akati kaari: “Pasa zvokurhya mabira angu.”
16 Iyena akamubvunzisazve kecipiri eciti: “Simoni mwana wa Juau, iwewe unondida?” Iyena wakamudaira kuti: “Honde Tenzi, munozviziya kuti inini ndinomudai.” Djesu akamubvunza kuti: “Usha zvimabira zvangu.”
17 Iyena akamubvunzisa kecitatu eciti: “Simoni mwana wa Juau, iwewe unondida?” Pedru wakatsukwara ngokuti iyena akamubvunzisa kecitatu eciti: “Iwewe unondida?” Ndiyo ndaa iyena wakati: “Tenzi, imwimwi munoziya zviro zvese; munozviziya kuti ndinomudai.” Djesu akamubvunza kuti: “Pasa zvokurhya zvimabira zvangu.
18 Zvezvirokwazvo ndinoti kauri, pawainga uciri murumbwana, waipfeka uye waienda kawaida. Asi kana ukacembera, ucatambanudza nyara dzako uye munhu umweni ucakupfekedza uye ucakutora oenda na iwewe kausikadi.”
19 Akabhuya izvi kuti apangidze mushobo we rufu waaizokudza nawo Mwari. Mumasure me kubhuya izvi, iyena akati: “Rumbwa wecinditeera.”
20 Pedru wakaringira sure uye wakaona mufundi waidiwa na Djesu eciateera, mufundi uu ndiye wainga wakatsamira pa diti ra Djesu paainga ecirhya uye omubvunzisa kuti: “Tenzi, ndiani ari kumutengesai?”
21 Hino paakamuona, Pedru wakabvunzisa Djesu kuti: “Tenzi, cinyi cicaitika no mwanarume uu?”
22 Djesu akamubvunza kuti: “Kana ndikada kuti iyena arumbwe aripo dakara ndauya, unei nazvo? Iwewe rumbwa wecinditeera.”
23 Ngokudaro, pakabararika masoko pakati pe hama ekuti mufundi uya wainga asikazofi. Asi Djesu ainga asikazi kubhuya kuti mufundiwo wainga asikazofi, asi akabhuya kuti: “Kana ndikada kuti iyena arumbwe aripo dakara ndauya, unei nazvo?”
24 Uu ndiye mufundi unopa upupuri we zviro izvi, uye wakatara zviro izvi, isusu tinozviziya kuti upupuri wake ngewe zvirokwazvo.
25 Zvezvirokwazvo, pano zviro zvimweni zvakawanda zvakaizwa na Djesu, zvekuti kudai zvakatarhwa zvese cimwe no cimwe, ndinorangarira kuti mabhuku akhona ainga asikazokwani mu nyika.
Masoko ari pasi
^ Kana kuti: “howe dzinganani.”
^ Kana kuti: “wakasimira.”
^ Kana kuti: “kunyasa kupfeka.”
^ Cigrego: “ungakwana makubhiti 200.”
