Akatarhwa na Juau 3:1-36
3 Kainga kuno Mufarisi umweni waizwi Nikodhemo, iyena wainga ari umwe we atungamiriri e Adjudha.
2 Iyena wakaenda kuna Djesu cousiku uye wakamubvunza kuti: “Rabhi, tinozviziya kuti imwimwi muri mufundisi wakabva kuna Mwari, ngokuti apana unokwanisa kuita zvishamiso zvamuri kuita asikabetserhwi na Mwari.”
3 Djesu akamudaira kuti: “Zvezvirokwazvo ndinomubvunzai kuti, kana munhu akatama kubarhwazve,* aangaoni Umambo wa Mwari.”
4 Nikodhemo wakamudaira kuti: “Munhu ungabarhwazve kudini nepoo wakura? Iyena ungakwanisazve kuhwirira mu ndani ma mai ake here?”
5 Djesu akamudaira kuti: “Zvezvirokwazvo ndinomubvunzai kuti, kana munhu akatama kubarhwa no mvura uye no mwiya, aangakwanisi kupinda mu Umambo wa Mwari.
6 Uya akabarhwa no nyama i nyama, uya akabarhwa no mwiya i mwiya.
7 Musashamisike ngokuti ndamubvunzai kuti: Munodikana kubarhwazve.
8 Mhepo inoenda kainoda, uye inozika kuvhuvhuta kayo, asi azviziikani kainobva no kainoenda. Izvi ndizvo zvinoitika no wese uya anobarhwa no mwiya.”
9 Nikodhemo wakamubvunzisa kuti: “Zviro izvi zvingaitika kudini?”
10 Djesu akamudaira kuti: “Imwimwi muri mufundisi we Israeri, hino ngei musikazii zviro izvi?
11 Zvezvirokwazvo ndinomubvunzai kuti, tinoreketa zvatinoziya uye tinopasa upupuri we zviro zvatakaona, asi imwimwi amutendi upupuri watinopasa.
12 Kana ndamubvunzai zviro zve pa nyika asi amuzi kuzvitendera, mungazotendera kudini kana ndikamubvunzai ngezve zviro zve kudenga?
13 Uyezve, apana munhu akakwira kudenga kunza ke uya akacita kubva kudenga, Mwana we munhu.
14 Kuita hingana Mozesi wakaturika nyoka ku renje, Mwana we munhu acaturikwawo,
15 kuitira kuti wese uya anotenda maari azoone upenyu usikaperi.
16 “Ngokuti Mwari akada maningi nyika, zvekuti akapasa Mwana wake akabarhwa ari umwe ega, kuti wese uya anopangidza kutenda maari asatsakatiswe, asi aone upenyu usikaperi.
17 Ngokuti Mwari aazi kutuma Mwana wake mu nyika kuti iyena atonge nyika, asi kuti nyika iponeswe peciseenzeswa iyena.
18 Uya anopangidza kutenda maari aazotongwi. Uya asikatendi maari unonga watotongwa kare, ngokuti aazi kutenda mu Mwana akabarhwa ari umwe ega wa Mwari.
19 Hino kutongwa kunotsamira pa izvi: Ciedza cakauya mu nyika, asi anhu akada cidima pane kuda ciedza, ngokuti mabasa awo ainga akashata.
20 Uya anoita zviro zvakashata anozonda ciedza, iyena aauyi ku ciedza kuti mabasa ake asaoneke.*
21 Asi uya anoita zviro zvecokwadi anouya ku ciedza, kuitira kuti mabasa ake aoneke kuti ari kuizwa maererano no kuda ka Mwari.”
22 Mumasure mazvo, Djesu no afundi ake akaenda ku mutanha we Djudhiya, ikona iyena akagara nawo ke cinguwa uye aibhabhatidza.
23 Asi Juau waibhabhatidzawo ku Enoni dhuze no Sarimi, ngokuti kweneyo kainga kuno mvura yakawanda, uye anhu akawanda aienda kaari kuti abhabhatidzwe;
24 pa nguwa ii, Juau wainga asati akandwa mu kadheya.
25 Afundi a Juau akareketedzana no Mudjudha umweni ngezve ruceneso.
26 Uye awona akaenda kuna Juau omubvunza kuti: “Rabhi, mwanarume uya wamainga munaye ku dii rimweni ro Djorodhani, uya wamakapasa upupuri nge zvake ari kubhabhatidza, uye anhu ese ari kuenda kaari.”
27 Juau wakadaira kuti: “Apana munhu anotambira kunyazi ciro cimwe haco kana asikazi kucipaswa cecibva kudenga.
28 Imwimwi kamare mutori apupuri e zviya zvandakabhuya kuti: ‘Inini andinipi Kristu, asi ndakatumwa mberi kake.’
29 Ano mwanakadzi ari kuda kucata ndi mwanarume ari kuda kucata. Asi kana shamwari ye mwanarume ari kuda kucata iri padhuze uye yozwa izwi rake, inopfara maningi nge ndaa yekuzwa izwi re mwanarume ari kuda kucata. Ndiyo ndaa, mupfaro wangu wadzadzika.
30 Mabasa ake anodikana kurumbwa ecitunhudzirika, asi angu anodikana kurumbwa ecipunguka.”
31 Uya anobva kudenga ari pamusoro pe anhu ese. Uya we pa nyika ngewe pa nyika uye anoreketa zviro zve pa nyika. Uya anobva kudenga ari pamusoro pe anhu ese.
32 Iyena anopasa upupuri we zviya zvaakaona no kuzwa, asi apana unotenda upupuri wake.
33 Uya anotenda upupuri wake anotenda kuti Mwari ngewe zvirokwazvo.
34 Ngokuti uya akatumwa na Mwari anoreketa masoko a Mwari, ngokuti Iyena aapasi mwiya mucena zvokutsunurira.*
35 Baba anoda Mwana uye akakanda zviro zvese mu nyara dzake.
36 Uya anopangidza kutenda mu Mwana ano upenyu usikaperi; uya asikapurutani Mwana aazooni upenyu, asi shungu dza Mwari dzinorumbwa dziri paari.
Masoko ari pasi
^ Mabhaibheri amweni anoti: “kubarhwa ecibva kumusoro.”
^ Kana kuti: “asabude pamhene.”
^ Kana kuti: “aaiti zvokupima.”
