Akatarhwa na Juau 4:1-54
4 Djesu paakaziya kuti Afarisi ainga azwa kuti iyena ainga eciita no kubhabhatidza afundi akawanda kudarika Juau,
2 kunyazi hazvo Djesu ainga asikabhabhatidzi anhu, asi afundi ake ndiwo aibhabhatidza,
3 iyena akabuda mu Djudhiya uye akaendazve ku Garireya.
4 Asi iyena aidikana kupinda ngo ku Samariya.
5 Ngokudaro, iyena akaguma mu thaundi ro Samariya rinozwi Sikari, dhuze no munda wa Djakobo waakapasa mwana wake Zuzee.
6 Zvezvirokwazvo, ipona ndipo painga pano cimbo ca Djakobo. Uye ngokuti Djesu ainga aremba nge rhwendo, iyena ainga akagara pa cimbopo. Dzainga dziri 12 dze masikati.*
7 Pakaguma mwanakadzi umweni we ku Samariya kuti acere mvura. Djesu akamubvunza kuti: “Ndiri kukumbirawo mvura ye kumwa.”
8 (Afundi ake ainga aenda ku thaundi kootenga zvokurhya.)
9 Ngokudaro, Musamariyewo wakamubvunza kuti: “Imwimwi muri Mudjudha, hino ngei mecindikumbira mvura sezvo ndiri Musamariya? (Ngokuti Adjudha aapindirani no Asamariya.)
10 Djesu akamudaira kuti: “Kudai waiciziya cipo ca Mwari no uya ari kukubvunza kuti: ‘Ndiri kukumbirawo mvura ye kumwa,’ kudai wamukumbira kuti iyena akupase mvura ye upenyu.”
11 Mwanakadziwo wakamubvunza kuti: “Imwimwi amutona muthepu kuti mucere mvura, uye cimbo ici cakadzika. Hino mvura ye upenyu yamuri kubhuya nge zvayo munoicerepi?
12 Imwimwi muri mukuru here kudarika tsekuru edu Djakobo? Awona akatipasa cimbo ici uye awona akamwa mvura yaco no ana awo pamwepo no zvipfuyo zvawo.”
13 Hino Djesu akamudaira kuti: “Wese uya anomwa mvura ii acagarazve no mukaha.
14 Munhu anomwa mvura yandinomupasa aazogarizve no mukaha, asi mvura yandinomupasa inozogara manyuko e mvura inopopoma mukati make kuti ipase upenyu usikaperi.”
15 Mwanakadziwo wakati: “Tenzi, ndipasei mvura iyona, kuti ndisagarezve no mukaha uye kuti ndisauyezve kuno koocera mvura.”
16 Iyena akamubvunza kuti: “Enda koodainza mwamuna wako kuti uuye naye pano.”
17 Mwanakadziwo wakadaira kuti: “Andina mwamuna.” Djesu akamubvunza kuti: “Uri kureketa zvirokwazvo ngo kubhuya kuti: ‘Andina mwamuna.’
18 Ngokuti wakambowakwa no anarume ashanu, uye mwanarume waunaye zvino amwamuna wakopi. Iwewe wareketa zvirokwazvo.”
19 Mwanakadziwo wakamubvunza kuti: “Ndiri kuona kuti imwimwi muri muphorofita.
20 Madzitsekuru edu akanamata Mwari mu dunhu rino, asi imwimwi munobhuya kuti anhu anodikana kuenda koonamata Mwari ku Djerusarema.”
21 Djesu akabhuya kuti: “Yaya, ndiri kumubvunzai zvirokwazvo kuti, iri kuuya nguwa yekuti imwimwi amuzonamati Baba mu dunhu iri kana ku Djerusarema.
22 Imwimwi munonamata camusikazii; isusu tinonamata catinoziya, ngokuti ruponeso rinobva ku Adjudha.*
23 Kunyazi zvakadaro, nguwa iri kuuya, uye yatoguma, yekuti anamati e zvirokwazvo acanamata Baba mu mwiya no mu cokwadi, uye zvezvirokwazvo, Baba ari kupsvaka anhu akadaro kuti aanamate.
24 Mwari i Mwiya, uye aya anomunamata anodikana kumunamata mu mwiya uye mu cokwadi.”
25 Mwanakadziwo wakamubvunza kuti: “Ndinozviziya kuti kuri kuuya Mesiya, anodainzwa Kristu. Kana iyena akauya acanyasa kutipanganidzira zviro zvese.”
26 Djesu akamubvunza kuti: “Inini ndiri kubhuya na iwewe, ndini iyena.”
27 Pa nguwa iyona kamare, afundi ake akaguma uye akashamisika, ngokuti iyena ainga ecicedza no mwanakadzi. Asi apana wakamubvunzisa kuti: “Muri kupsvakei?” Kana kuti “Ngei muri kureketa no mwanakadzi uu?”
28 Hino mwanakadziwo wakasiya hari yake yo mvura, wakaenda ku thaundi uye wakati ku anhu:
29 “Uyai muone mwanarume wandibvunza zvese zvandakaita. Iyena andiepi Kristu here?”
30 Anhuwo akabuda mu thaundi uye akaenda kuna Djesu.
31 Anhu paainga eciuya, afundi aimubvunza kuti: “Rabhi, irhyai.”
32 Asi iyena akaabvunza kuti: “Ndino zvokurhya zvamusikazii.”
33 Ngokudaro, afundi akatanga kubvunzisana eciti: “Pano munhu waunzisira Tenzi zvokurhya here?”
34 Djesu akati kaari: “Zvokurhya zvangu ndi kuita kuda ka uya akandituma uye kupedzesa basa rake.
35 Amuripi kubhuya kuti kasara mwedzi mirongomuna kuti nguwa yo kukorora igume? Izwai basi zvandinomubvunzai: Mutsai musoro muone minda, kuti zvirimwa zvaibva kuti zvikororhwe. Kubvira zvino
36 mukorori uri kutambira mubairo wake uye uri kuunganidza zvibereko zve upenyu usikaperi, kuti musimi no mukorori apfare pamwepo.
37 Ngokuti mu nyaya ii, masoko aya ngee zvirokwazvo: Umwe ndi musimi uye umweni ndi mukorori.
38 Inini ndamutumai kuti mukorore zviya zvamusikazi kuseenzera. Amweni ndiwo akaseenza, uye imwimwi muri kubetsereka no basa raakaita.”
39 Asamariya akawanda e thaundi irona akatenda maari nge ndaa ye upupuri we mwanakadzi uya, paakati: “Iyena andibvunza zvese zvandakaita.”
40 Hino Asamariya paakauya kaari, akamukumbira kuti agare nawo, uye Djesu akagara ikona ke mazuwa mairi.
41 Ngokudaro, anhu akawanda akatenda nge ndaa yo zvaakabhuya,
42 uye akabvunza mwanakadziwo kuti: “Aticiripi kutenda nge ndaa yo zviro zvawakatibvunza basi; ngokuti isusu kamare tamuzwa uye tinoziya kuti mwanarume uu zvezvirokwazvo ndiye muponesi we nyika.”
43 Mumasure me mazuwa aya mairi, iyena akaenda ku Garireya.
44 Djesu kamare aibhuya kuti, muphorofita aareremedzwi mu nyika yaakabarirhwa.
45 Asi paakaguma ku Garireya, Agarireya akamutambira zvakanaka, ngokuti awona ainga aona zvese zvainga zvaizwa na Djesu pa mutambo ku Djerusarema, awona ainga aendawo ku mutambo uwona.
46 Iyena akaendazve ku Kanaa yo Garireya, kuya kaainga acinja mvura kuita vhinyu. Uye kweneyo kainga kuno museenzi we pa nyumba ya mambo wainga uno mwana wairhwara ku Kafarnau.
47 Mwanarumewo paakazwa kuti Djesu ainga abuda ku Djudhiya kuenda ku Garireya, wakaenda kaari uye wakamukumbira kuti ateredze naye kuti aporese mwana wake, ngokuti mwanewo wainga waakuda kufa.
48 Asi Djesu akamubvunza kuti: “Kana mukatama kuona zvipangidzo no zvishamiso, imwimwi amuzotendi.”
49 Asi museenzi uya we pa nyumba ya mambo wakati: “Tenzi, uyai mwana wangu asati afa.”
50 Djesu akamubvunza kuti: “Enda hako; mwana wako ari mupenyu.” Mwanarumewo wakatenda zvainga zvabhuiwa na Djesu, uye wakaenda.
51 Paainga ecienda, aranda ake akauya koosongana naye kuti amubvunze kuti mwana wake wainga ari mupenyu.*
52 Hino iyena wakaabvunzisa kuti mwanewo wainga wapora nguwai. Awona akamudaira kuti: “Iyena wakapora zuro padzaiita 13 dzo masikati.”*
53 Babewo akazvibata kuti izvi zvakaitika panguwa iyona kamare yaakabvunzwa na Djesu kuti: “Mwana wako ari mupenyu.” Uye iyena pamwepo no ese o pa nyumba pake akatenda.
54 Ici ndi cishamiso cocipiri cakaizwa na Djesu mumasure me kubuda ku Djudhiya kuenda ku Garireya.
Masoko ari pasi
^ Kana kuti: “nguwa yocitanhatu.”
^ Kana kuti: “ruponeso rinotanga no Adjudha.”
^ Kana kuti: “wainga waa nani.”
^ Kana kuti: “nguwa yocinomwe.”
