Akatarhwa na Juau 5:1-47
5 Mumasure mazvo, kainga kuno mutambo we Adjudha, uye Djesu akakwidza ku Djerusarema.
2 Ku Djerusarema dhuze no Pamusuwo we Mabira painga pano dziya rino maberere mashanu, mu Cihebheru rinodainzwa kuti Bhetizata.
3 Mu mbuto iyona mainga muno anhu akawanda akawata airhwara, mapofu, aikhabinya, no anhu ainga ano mirenje no moko dzakaremara.*
4— —
5 Uye ipona painga pano mwanarume wairhwara ke makore 38.
6 Paakaona mwanarume uya wakawata uye eciziya kuti iyena wainga ano nguwa yakareba ecirhwara, Djesu akamubvunzisa kuti: “Unoda kupora here?”
7 Mwanarumewo wakadaira kuti: “Tenzi, andina munhu anondikanda mudziya kana mvura ikatekenyeka, asi pandinonga ndiri kuendeyo, munhu umweni unoenda mberi kangu wopindemo.”
8 Djesu akamubvunza kuti: “Muka! Tora bonde* rako uende.”
9 Uye ciriporipoco mwanarumewo wakapora, wotora bonde* rake uye wakatanga kuhamba.
Zuwa irona rainga riri Sabudu.
10 Ndiyo ndaa, Adjudha akatanga kubvunza mwanarume wainga waporeswa kuti: “Nyamasi i Sabudu, azvitenderhwi kuti uthware bonde.”*
11 Asi iyena wakaadaira kuti: “Mwanarume wandiporesa ndiye wandibvunza kuti: ‘Tora bonde rako uhambe.’”
12 Awona akamubvunzisa kuti: “Ndiani wakubvunza kuti: ‘Tora bonde* rako uhambe’?”
13 Asi mwanarumewo wainga asikazii kuti uya wamuporesa ndiani, ngokuti Djesu ainga angara-ngara pakati pe anhu ainga ari ipona.
14 Djesu akasongana no mwanarume uya mu tempro uye akamubvunza kuti: “Ona, iwewe wapora. Usashaishezve, kuitira kuti zvisazoitikezve na iwewe zviro zvakashata kudarika izvi.”
15 Mwanarumewo wakaenda uye wakabvunza Adjudha kuti Djesu ndiye ainga amuporesa.
16 Ndiyo ndaa, Adjudha aizonda Djesu ngokuti iyena aiita zviro izvi mu Sabudu.
17 Hino iyena akaabvunza kuti: “Baba angu ari kuseenza dakara zvino, uye inini ndiri kuseenzawo.”
18 Ndiyo ndaa, Adjudha akatotunhudzira kupsvaka mukana we kumuuraya, ngokuti iyena ainga asikaposhi basi mutemo we Sabudu, asi aitodainzawo Mwari kuti Baba ake, ecidziita hinga akaezana na Mwari.
19 Ngokudaro, Djesu akabhuya kuti: “Zvezvirokwazvo ndinomubvunzai kuti, Mwana aangaiti kunyazi ciro cimwe haco ngo kuda kake, asi anondoita zviya zvaanoona Baba ake ecizviita. Ngokuti zvese zvaanoita, Mwana anozviitawo ngo mushobo umwewo.
20 Ngokuti Baba anoda Mwana uye anomupangidza zviro zvese zvaanoita, uye acatomupangidza mabasa makuru kudarika aya, kuti mushamiswe.
21 Ngokuti kuitawo hingana Baba anomutsa akafa uye oapasa upenyu, Mwana anopasa upenyu aya aanoda.
22 Ngokuti Baba aatongi munhu, asi akapasa Mwana basa rese re kutonga,
23 kuti anhu ese areremedze Mwana, hinga kureremedza kaanoita Baba. Uya asikareremedzi Mwana aareremedziwo Baba akatuma Mwana.
24 Zvezvirokwazvo ndinomubvunzai kuti, uya anozwa masoko angu uye otenda Uya akandituma ano upenyu usikaperi, uye aazotongwi ngokuti anonga abva mu rufu ecienda ku upenyu.
25 “Zvezvirokwazvo ndinomubvunzai kuti, iri kuuya nguwa, uye yatoguma, yekuti aya akafa acazwa izwi ro Mwana wa Mwari, uye aya akanyasa kupurutana acararama.
26 Ngokuti Baba ano upenyu maari,* ndiyo ndaa akaitawo kuti Mwana agare no upenyu maari.
27 Uye akamupasa ubaba we kutonga, ngokuti iyena ndiye Mwana we munhu.
28 Musashamiswe no izvi, ngokuti iri kuuya nguwa yekuti ese aya ari mumakuwa e anoedzurirhwa acazwa izwi rake
29 uye obuda, aya akaita zvakanaka acamutsirhwa upenyu, uye aya akaita zvakashata acamutsirhwa kutongwa.
30 Andingaiti kunyazi ciro cimwe haco no kuda kangu. Ndinotonga maererano no zvandakabvunzwa na Baba angu, uye kutonga kangu ngeke unatsi, ngokuti andipsvaki kuita kuda kangu, asi ndinopsvaka kuita kuda ka uya akandituma.
31 “Kana ndikadzipupurira ndega, upupuri wangu unonga usiripi we zvirokwazvo.
32 Pano umweni anopupurira nge zvangu, uye ndinoziya kuti upupuri waanoita nge zvangu ngewe zvirokwazvo.
33 Imwimwi makatumira anhu kuna Juau, uye iyena wakapa upupuri we zvirokwazvo nge zvangu.
34 Kunyazi zvakadaro, inini andidi kuti munhu andipupurire, asi ndareketa zviro izvi kuti imwimwi muponeswe.
35 Mwanarume uya wainga ari ciedza cakabaka uye cainyetukira, uye ke cinguwa cidoko imwimwi mainga makagadzirira kuti mupfare pa ciedza cake.
36 Asi ndino upupuri wakakura kudarika wa Juau, ngokuti mabasa andakapaswa na Baba angu kuti ndiite, mabasa aya andiri kuita, anopasa upupuri wekuti Baba ndiwo akandituma.
37 Uye Babewo kamare akandituma, akandipupurira. Imwimwi amusati makambozwa izwi rawo uye amusati makamboona kuti akaita kudini,
38 uye soko rawo arigari mamuri, ngokuti imwimwi amutendi uya aakatuma.
39 “Imwimwi munoongorora Matarhwa ngokuti munorangarira kuti awona acaita kuti mugare no upenyu usikaperi; asi Matarhwa ndiwo anotopasa upupuri nge zvangu.
40 Asi imwimwi amudi kuuya kandiri kuti muone upenyu.
41 Inini andidi rukudzo re anhu,
42 asi inini ndinonyasa kuziya kuti imwimwi amuna rudo ra* Mwari mukati menyu.
43 Ndakauya mu zina ra Baba angu, asi imwimwi amuzi kunditambira. Kudai munhu umweni akauya mu zina rake ega, maizomutambira.
44 Mungatenda kudini, kana mecitambira rukudzo ro umwe na umwe wenyu, asi musikapsvaki rukudzo re uya akatumwa na Mwari umwe basi?
45 Musarangarire kuti ndicamupumhai pamberi pa Baba; uriyo unomupumhai: Mozesi, wamakakanda kariro yenyu paari.
46 Zvezvirokwazvo, kudai maitenda muna Mozesi, maizonditendawo, ngokuti iyena wakatara nge zvangu.
47 Asi kana musikatendi zvaakatara, mungatenda kudini zvandinobhuya?”
Masoko ari pasi
^ Kana kuti: “dzakaoma.”
^ Kana kuti: “makha.”
^ Kana kuti: “makha.”
^ Kana kuti: “makha.”
^ Kana kuti: “makha.”
^ Kana kuti: “ano cipo ce upenyu maari.”
^ Kana kuti: “kuna.”
