Akatarhwa na Juau 6:1-71
6 Pedzepo, Djesu akaenda ku n’ombera ke bahari ro Garireya, kunozwi Tibheriadhi.
2 Uye anhu akawanda airumbwa ecimuteera, ngokuti aiona zvishamiso zvaaiita, eciporesa airhwara.
3 Ngokudaro, Djesu akakwira mu dunhu rimweni uye akagara pasi no afundi ake.
4 Mutambo we Adjudha unozwi Paskwa wainga waapadhuze.
5 Djesu paakaringira uye oona anhu akawanda aikhwedera kaari, akabvunzisa Firipi kuti: “Ticatengepi pau kuti anhu aya arhye?”
6 Asi akabhuya izvi kuti amuedze, ngokuti aizviziya zvaaida kuita.
7 Firipi wakamudaira kuti: “Pau dze mutengo we madhenaryo 200 adzitokwani kuti munhu umwe na umwe arhye padoko.”
8 Umwe we afundi ake unozwi Andreya, hama ya Simoni Pedru, wakamubvunza kuti:
9 “Pano murumbwana umweni pano uno pau shanu no zvihowe zviiri. Asi izvi zvinokwanei ku anhu akawanda kudai?”
10 Djesu akabhuya kuti: “Bvunzai anhu kuti agare pasi.” Ipona painga pano shango rakawanda, ngokudaro, anarume anokwana kuita 5000 akagara pasi.
11 Djesu akatora pau, uye mumasure me kuita munamato wokutenda, akadzipasa anhu ainga akagara ipona; iyena akaitawo zvimwezvo no zvihowe, uye awona akarhya oguta.
12 Asi paakarhya oguta, iyena akabvunza afundi ake kuti: “Unganidzai zvimatimbu zvasara, kuti zvisapsvethwe.”
13 Ngokudaro, awona akaunganidza uye odzadza zvitengu 12 no zvainga zvasiiwa no anhu paakarhya pau shanu.
14 Anhu paakaona cishamiso caainga aita, akatanga kubhuya kuti: “Zvezvirokwazvo uu ndiye Muphorofita waidikana kuuya mu nyika.”
15 Hino Djesu paakaziya kuti ainga ari kuda kumugadza hinga mambo, iyena akabuda oendazve mu dunhu ari ega.
16 Pakainga kadoka, afundi ake akateredza oenda ku bahari,
17 awona akakwira bharko oenda, akabira bahari ecienda ku Kafarnau. Kainga kadoka, uye Djesu ainga asati aenda kaari.
18 Uye mu bahari makatanga kuita mafungu, ngokuti mhepo yaivhuvhuta.
19 Asi mumasure me kucapa ke makirometro 5 kana 6, akaona Djesu ecihamba pamusoro pe mvura ecikhwedera kuno bharko, uye afundi akathya.
20 Asi iyena akaabvunza kuti: “Ndini, musathye!”
21 Hino awona akamukwidza mu bharko, uye bharko rakaguma kaaienda.
22 Mangwana akhona, anhu ainga asara ku n’ombera ko bahari, akaona kuti ipona painga pasara kabharko kamwe kadoko, uye kuti Djesu ainga asikazi kuenda mu bharko pamwepo no afundi ake, asi kuti afundi ainga aenda oga.
23 Ngokudaro, mabharko e Tibheriadhi akaguma dhuze no mbuto iya yaakarhyira pau, mumasure mekuti Tenzi aita munamato.
24 Anhu paakaona kuti Djesu kutobatanidzawo afundi ake ainga asiripi ipona, akakwira mu mabharko awo uye oenda ku Kafarnau koopsvaka Djesu.
25 Paakaona Djesu ku n’ombera ke bahari, akamubvunzisa kuti: “Rabhi, maguma rini kuno?”
26 Djesu akaadaira kuti: “Zvezvirokwazvo ndinomubvunzai kuti, imwimwi muri kundipsvaka, haiwa ngokuti makaona zvishamiso, asi ngokuti makarhya pau uye moguta.
27 Musaseenzere zvokurhya zvinopera, asi seenzerai zvokurhya zvinorumbwa zviripo ke upenyu usikaperi, zvicapaswa no Mwana we munhu; ngokuti Baba, Mwari kamare, akakanda cigondeso cawo paari cinopangidza kuti anomupfarira.”
28 Hino akamubvunzisa kuti: “Tinodikana kuitei kuti tiite mabasa a Mwari?”
29 Djesu akaadaira kuti: “Basa ra Mwari ndi iri, kuti mutende uya waakatuma.”
30 Hino awona akamubvunza kuti: “Cishamiso cipi camucaita kuti tione uye titende mamuri? Basa ripi ramucaita?
31 Madzitsekuru edu akarhya manaa ku renje, hinga zvakatarhwa kuti: ‘Iyena akaapasa pau inobva kudenga kuti arhye.’”
32 Hino Djesu akaabvunza kuti: “Zvezvirokwazvo ndinomubvunzai kuti, Mozesi aazi kumupasai pau inobva kudenga, asi Baba angu ari kumupasai pau yo zvirokwazvo ye kudenga.
33 Ngokuti pau ya Mwari ndi uya anocita kubva kudenga uye opasa upenyu ku anhu.”
34 Ngokudaro, akamubvunza kuti: “Tenzi, tipasei pau iyona nguwa dzese.”
35 Djesu akaabvunza kuti: “Inini ndiri pau yo upenyu. Uya anouya kandiri aazogarizve no nzara, uye uya anopangidza kutenda mandiri aazogarizve no mukaha.
36 Asi hinga zvandamubvunzai, imwimwi mandiona, asi kunyazi zvakadaro amutendi.
37 Ese andinopaswa na Baba anouya kandiri, uye inini andizorambi uya anouya kandiri;
38 ngokuti ndakabva kudenga, haiwa kuti ndiite kuda kangu, asi ndiite kuda ke uya akandituma.
39 Uku ndiko kuda ke uya akandituma, kuti ndisaruze kunyazi umwe hake we ese aakandipasa, asi kuti ndizoamutse pa zuwa rokupedzesera.
40 Ngokuti uku ndiko kuda ka Baba angu, kuti wese uya anotambira Mwana uye opangidza kuti anotenda maari aone upenyu usikaperi, uye inini ndicamumutsa pa zuwa rokupedzesera.”
41 Hino Adjudha akatanga kumugurungutira, ngokuti iyena ainga ati: “Inini ndiri pau yakabva kudenga.”
42 Uye awona akatanga kubhuya kuti: “Uu andiepi Djesu mwana wa Zuzee, atiazii baba na mai ake here? Hino ngei zvino iyena ari kubhuya kuti: ‘Ndakabva kudenga’?”
43 Djesu akaadaira kuti: “Musagurungute.
44 Apana munhu angauya kandiri, kana Baba akandituma asikazi kumuunzisa kandiri, uye inini ndicamumutsa pa zuwa rokupedzesera.
45 Zvakatarhwa no Aphorofita kuti: ‘Ese awona acafundiswa na Djehovha.’* Wese uya anopurutana Baba uye ofundira anouya kandiri.
46 Apana munhu akamboona Baba, kunza ke uya akabva kuna Mwari. Iyena akaona Baba.
47 Zvezvirokwazvo ndinomubvunzai kuti, uya anotenda ano upenyu usikaperi.
48 “Inini ndiri pau yo upenyu.
49 Madzitsekuru enyu akarhya manaa ku renje, asi akazofa.
50 Ii ndiyo pau inobva kudenga, kuti munhu wese anoirhya asafe.
51 Inini ndiri pau yo upenyu yakacita kubva kudenga. Kana munhu akarhya pau ii acararama nokusikaperi; pau yandicapasa ndi mwiri wangu kuti nyika ione upenyu.”
52 Hino Adjudha akatanga kureketedzana pacawo eciti: “Mwanarume uu angatipasa kudini nyama yake kuti tirhye?”
53 Ngokudaro, Djesu akaabvunza kuti: “Zvezvirokwazvo ndinomubvunzai kuti, kana mukatama kurhya nyama yo Mwana we munhu no kumwa ngazi yake, imwimwi amuna upenyu mamuri.
54 Uya anorhya nyama yangu no kumwa ngazi yangu ano upenyu usikaperi, uye inini ndicamumutsa pa zuwa rokupedzesera;
55 ngokuti nyama yangu ndi zvokurhya zvezvirokwazvo uye ngazi yangu ndi zvokumwa zvezvirokwazvo.
56 Uya anorhya nyama yangu no kumwa ngazi yangu anorumbwa ari mu rubatano na inini, uye inini ndicarumbwa ndiri mu rubatano naye.
57 Kuita hinga Baba akandituma anorarama uye inini ndinorarama nge ndaa ya Baba, uya anorhya nyama yangu acararamawo nge ndaa yangu.
58 Ii ndiyo pau yakabva kudenga. Iyona yakasiyana no yakarhyiwa no madzitsekuru enyu uye akazofa. Wese uya anorhya pau ii acararama nokusikaperi.”
59 Iyena akareketa izvi paainga ecifundisa mu sinagoga rimweni ku Kafarnau.
60 Paakazwa izvi, akawanda e afundi ake akati: “Masoko aya anothyisa; ndiani angaapurutana?”
61 Asi paakaziya kuti afundi ake ainga ecigurunguta nge zvazvo, Djesu akaabvunza kuti: “Izvi zvinomukuhunyisai here?
62 Hino cinyi caizoitika kana mukaona Mwana we munhu ecikwira kaainga ari?
63 Mwiya ndiwo unopa upenyu; nyama apana cainokwanisa. Masoko andamubvunzai nge e mwiya uye anopa upenyu.
64 Asi amweni enyu aatendi.” Ngokuti Djesu aizviziya kubvira kare kuti ndiani wainga asikatendi uye kuti ndiani waizomutengesa.
65 Iyena akatunhudzira eciti: “Ndiyo ndaa ndamubvunzai kuti, apana unouya kandiri kana Baba asikazi kuzvitendera.”
66 Nge ndaa yazvo, akawanda e afundi ake akahwirirazve ku zviro zvaainga asiya sure uye ainga asikahambizve naye.
67 Ngokudaro, Djesu akati ku aphostori 12: “Imwimwi muri kudawo kuenda?”
68 Simoni Pedru wakamudaira kuti: “Tenzi, ticaenda kuna ani? Imwimwi ndimwi muno masoko e upenyu usikaperi.
69 Isusu tinotenda uye tinozviziya kuti imwimwi muri Mucena Wakatumwa na Mwari.”
70 Djesu akaadaira kuti: “Andinipi ndakamusanangurai mwese 12? Asi umwe wenyu ndi mureyi.”*
71 Zvezvirokwazvo, iyena ainga ecireketa ngezva Djudhasi mwana wa Simoni Iskariyoti, ngokuti iyena waizomutengesa, kunyazi hazvo iyena wainga ari umwe we afundi 12.
