Akatarhwa na Juau 7:1-52
7 Mumasure mazvo, Djesu akarumbwa ecihambira ku Garireya, iyena ainga asikadi kuhambira ku Djudhiya ngokuti Adjudha aipsvaka kumuuraya.
2 Asi Mutambo we Adjudha we Zvitumba wainga waapadhuze.
3 Hino anukuna ake akamubvunza kuti: “Buda muno uende ku Djudhiya, kuti afundi ako aone mabasa auri kuita.
4 Ngokuti kana munhu ecipsvaka kuziikanwa aaiti zviro mucifise-fise. Kana iwewe weciita zviro izvi, dzipangidze ku anhu ese.”
5 Zvezvirokwazvo, anukuna ake ainga asikatendi maari.
6 Ngokudaro, Djesu akaabvunza kuti: “Nguwa yangu aisati yaguma, asi kamuri nguwa yese yakanaka.
7 Nyika aina cikonzero co kumuzondai, asi inondizonda, ngokuti ndinopupurira nge zvayo kuti mabasa ayo akashata.
8 Imwimwi endai ku mutambo; inini andiendi zvino ku mutambo uu, ngokuti nguwa yangu aisati yaguma.”
9 Ngokudaro, mumasure me kureketa zviro izvi, iyena akasara mu Garireya.
10 Asi mumasure mekuti hama dzake dzaenda ku mutambo, iyena akaendawo, asi mucifise-fise.
11 Nge ndaa yazvo, Adjudha akatanga kumupsvaka pa mutambo uye aiti: “Mwanarume uya uripi?”
12 Anhu akawanda aicedza nge zvake muciwewee.* Amweni aiti: “Iyena ndi munhu akanaka.” Amweniwo aiti: “Haiwa, iyena ari kucengedzera anhu.”
13 Apana waireketa nge zvake pakawanda anhu, ngokuti aithya Adjudha.
14 Mutambo pawainga waapakati, Djesu akapinda mu tempro uye akatanga kufundisa.
15 Adjudha akashamiswa uye aiti: “Mwanarume uu anoziya kudini zvese izvi ngezve Matarhwa nepoo iyena aazi kufunda mu zvikora?”*
16 Hino Djesu akaadaira kuti: “Zvandinofundisa azvangupi, asi ngezve uya akandituma.
17 Kana munhu ecida kuita kuda ka Mwari, acazviziya kuti zvandiri kufundisa zvinobva kuna Mwari kana kuti ndiri kubhuya zviro zvo musoro mangu.
18 Uya anoreketa zvo musoro make ari kupsvaka rukudzo rake pacake; asi uya anopsvaka rukudzo re uya wakamutuma ngewe zvirokwazvo uye maari amuna zviro zvisina unatsi.
19 Mozesi wakamupasai Mutemo, andizvopi? Asi apana kana umwe wenyu anozwira Mutemo. Ngei muri kupsvaka kundiuraya?”
20 Anhu akamudaira kuti: “Iwewe uno dhimoni. Ndiani ari kupsvaka kukuuraya?
21 Djesu akaadaira kuti: “Ndaita cishamiso cimwe basi, uye mwese imwimwi mashamisika.
22 Hino onai:* Mozesi wakamupasai mutemo wo kuita ucekeri (haiwa kuti mutemo uu wakabva kuna Mozesi, asi ku madzitsekuru), uye imwimwi munoita munhu ucekeri mu Sabudu.
23 Kana munhu eciizwa ucekeri mu Sabudu kuti Mutemo wa Mozesi usaposhwe, hino ngei imwimwi muri kundinyangadzwira maningi ngokuti inini ndaporesa munhu mu Sabudu?
24 Imai kutonga nge zvamunoona nge cekunza, asi tongai no unatsi.”
25 Hino anhu anganani e ku Djerusarema akatanga kuti: “Kodi andiepi here munhu uu waari kupsvaka kuuraya?
26 Asi onai! Iyena ari pano ecireketa pakawanda anhu, uye apana ari kumubvunza ciro. Kodi atungamiriri edu ari kurangarira kuti iyena ndi Kristu here?
27 Isusu tinokuziya kunobva munhu uu; asi Kristu paanozouya, apana unozokuziya kaanobva.”
28 Hino Djesu paainga ecifundisa mu tempro, akati no izwi rinozwika: “Imwimwi munondiziya uye munoziya kandinobva. Inini andizi kuuya no kuda kangu, asi Uya akandituma ariyo zvezvirokwazvo, uye imwimwi amumuzii.
29 Inini ndinomuziya, ngokuti ndiri muimiriri wake, uye Iyena akandituma.”
30 Ndiyo ndaa akapsvaka kumusunga, asi akuna waikwanisa kumubata, ngokuti nguwa yake yainga isati yakwana.
31 Kunyazi zvakadaro, anhu akawanda akatenda maari, uye aiti: “Kana Kristu akauya, acaita here zvishamiso zvinodarika zvaizwa no mwanarume uu?”
32 Afarisi paakazwa anhu ecireketa zviro izvi muciwewee ngezva Djesu, atungamiriri e apristi no Afarisi akatuma arindi* kuti amusunge.*
33 Hino Djesu akati: “Ndicagarazve na imwimwi padoko, ndisati ndaenda kuno Uya akandituma.
34 Imwimwi mucandipsvaka, asi amuzondioni, uye kandinoenda, imwimwi amuzokwanisi kuendeyo.”
35 Hino Adjudha akatanga kubvunzana pacawo eciti: “Munhu uu ari kuda kuendepi, zvokuti atizokwanisi kumuona? Kodi ari kuda kuenda ku Adjuda akabararika pakati pe Agrego uye ofundisa Agrego here?
36 Iyena ari kuda kureyei no masoko okuti: ‘Imwimwi mucandipsvaka, asi amuzondioni, uye kandinoenda, imwimwi amuzokwanisi kuendeyo’?”
37 Pa zuwa rokupedzesera, zuwa guru re mutambo, Djesu akapurumuka uye akadainzira eciti: “Kana munhu ano mukaha, ngaauye kandiri kuti amwe.
38 Uya anotenda mandiri, hinga zvinorekethwa no Matarhwa kuti: ‘Mukati make mucapopoma mvura yo upenyu.’”
39 Asi paaireketa izvi iyena aireketa ngezve mwiya mucena, waizopaswa aya ainga ano kutenda; ngokuti dakara pa nguwa iyona, awona ainga asati autambira, ngokuti Djesu ainga asati akudzwa.
40 Anhu anganani ainga ari ipona paakazwa masoko aya akatanga kuti: “Zvezvirokwazvo uu ndi Muphorofita.”
41 Amweni aiti: “Uu ndi Kristu.” Asi amweniwo aiti: “Kodi Kristu anobva ku Garireya here?
42 Matarhwa aabhuyi here kuti Kristu aizobva mu dzinza ra Dhavhidhi uye ku Bheterehema mu mutanha waigara Dhavhidhi?”
43 Ndiyo ndaa, anhu akatanga kutama kupindirana nge ndaa yake.
44 Ngokudaro, amweni awo aida kumusunga,* asi apana wakakwanisa kumubata.
45 Hino arindi akahwirira ku atungamiriri e apristi no Afarisi, uye awona akaabvunzisa kuti: “Ngei amuzi kuuya naye kuno?”
46 Arindi akadaira kuti: “Apana munhu akamboreketa hingana iyena.”
47 Hino Afarisi akati: “Kodi imwimwi macengedzwawo here?
48 Pano umwe we atungamiriri edu kana we Afarisi akatendawo maari here?
49 Asi anhu aya asikazii Mutemo ndi anhu akatukwa.”
50 Nikodhemo wainga wakamboenda kooreketa na Djesu uye wainga ari umwe wawo, wakati kaari:
51 “Mutemo wedu unotonga munhu here tisati tambomuzwa no kuziya zvaari kuita?”
52 Awona akamudaira kuti: “Kodi iwewe uri we ku Garireya here? Psvakisisa uye ona kuti apana muphorofita unozobva ku Garireya.”*
Masoko ari pasi
^ Kana kuti: “muciwere-were.”
^ Kureya kuti, kufunda ku zvikora zve anarabhi.
^ Kana kuti: “Ndiyo ndaa.”
^ Kana kuti: “arindi e tempro.”
^ Kana kuti: “amubate.”
^ Kana kuti: “kumubata.”
^ Matarhwa akawanda e kare anogondeka, aana mavhersikuro 53 dakara kapituro 8 vhersikuro 11.
