Akatarhwa na Juau 8:12-59
8 12 Hino Djesu akaabvunzazve kuti: “Inini ndiri ciedza co nyika. Munhu anonditeera aazogari mu cidima, asi acagara no ciedza co upenyu.”
13 Ngokudaro, Afarisi akamubvunza kuti: “Iwewe unodzipupurira wega; upupuri wako ngewe manyepo.”
14 Djesu akaadaira kuti: “Kunyazi ndecidzipupurira ndega, upupuri wangu ngewe zvirokwazvo, ngokuti inini ndinokuziya kandakabva uye kandiri kuenda. Asi imwimwi amukuzii kandakabva no kandiri kuenda.
15 Imwimwi munotonga munhu maererano no nyama;* asi inini anditongi munhu.
16 Asi kunyazi ndikatonga, kutonga kangu ngeke zvirokwazvo, ngokuti andiripi ndega, asi Baba akandituma aneni.
17 Uyezve, mu Mutemo wenyu makatarhwa kuti: ‘Upupuri we anhu airi ngewe zvirokwazvo.’
18 Inini ndiri kudzipupurira ndega, uye Baba akandituma ari kupupurirawo nge zvangu.”
19 Hino awona akamubvunzisa kuti: “Baba ako aripi?” Djesu akaadaira kuti: “Imwimwi amundizii uye amuziiwo Baba angu. Kudai maindiziya, maizoziyawo Baba angu.”
20 Iyena akabhuya masoko aya pa mbuto yaigara midziyo ye kukandira mare paainga ecifundisa mu tempro. Asi apana akamusunga, ngokuti nguwa yake yainga isati yaguma.
21 Iyena akaabvunzazve kuti: “Inini ndiri kuenda, uye imwimwi mucandipsvaka, asi mucafa mu zvitema zvenyu. Kandiri kuenda, imwimwi amungakwanisi kuendeyo.”
22 Hino Adjudha akatanga kuti: “Kodi iyena ari kuda kudziuraya kani? Ngokuti iyena ari kuti: ‘Kandiri kuenda, imwimwi amungakwanisi kuendeyo.’”
23 Uye iyena akatunhudzira eciti: “Imwimwi muri e pasi pano; inini ndiri we kudenga. Imwimwi muri we nyika ino; inini andiripi we nyika ino.
24 Ndiyo ndaa, inini ndamubvunzai kuti: Imwimwi mucafa mu zvitema zvenyu. Ngokuti kana mukatama kutenda kuti ndiri ani, mucafa mu zvitema zvenyu.”
25 Hino akamubvunzisa kuti: “Ndiwe ani?” Djesu akadaira kuti: “Ngei inini ndiri kureketa na imwimwi?
26 Ndino zviro zvakawanda zve kureketa nge zvenyu uye zve kutonga. Zvezvirokwazvo, Uya akandituma ngewe zvirokwazvo, uye zviya zvandakazwa naye ndinozvibvunza nyika.”
27 Awona aazi kuzvizwisisa kuti iyena ainga ecireketa ngezva Baba.
28 Hino Djesu akaabvunza kuti: “Mumasure me kuturika Mwana we munhu, imwimwi mucaziya kuti inini ndiri iyena uye kuti inini andiiti kana ciro cipi haco nge kuda kangu; asi ndinoreketa zviya basi zvandakafundiswa na Baba.
29 Uya akandituma aneni; uye aazi kumbondisiya ndiri ndega, ngokuti ndinoita nguwa dzese zvinomupfadza.”
30 Iyena paakabhuya zviro izvi, anhu akawanda akatenda maari.
31 Hino Djesu akati ku Adjudha ainga atenda maari: “Kana imwimwi mukarumbwa muri mu masoko angu, muri afundi angu kamare,
32 mucaziya cokwadi, uye cokwadi cicamusudzunurai.”
33 Akamudaira kuti: “Tiri ana a Abrahamu uye atisati takambogara aranda e munhu. Hino ngei weciti: ‘Mucasudzunurhwa’?”
34 Djesu akaadaira kuti: “Zvezvirokwazvo ndinomubvunzai kuti, munhu wese anoita citema ndi muranda we citema.
35 Kusiya izvona, muranda aarumbwi ari pa nyumba pa tenzi wake nokusikaperi; asi mwana anorumbwa aripo nokusikaperi.
36 Asi kana Mwana akamusudzunurai, imwimwi mucagara no rusudzunuko re zvirokwazvo.
37 Ndinozviziya kuti muri ana a Abrahamu. Asi imwimwi muri kupsvaka kundiuraya, ngokuti amutendi masoko angu.*
38 Inini ndinoreketa zvandakaona pandainga ndiri na Baba angu, asi imwimwi munoita zvamakazwa na baba enyu.”
39 Awona akamudaira kuti: “Baba edu ndi Abrahamu.” Djesu akaabvunza kuti: “Kudai imwimwi mainga muri ana a Abrahamu, maizoita mabasa a Abrahamu.
40 Asi zvirokwazvo nge zvekuti imwimwi muri kupsvaka kuuraya inini, munhu akamubvunzai zvirokwazvo zvaakazwa na Mwari. Abrahamu aazi kumboita kudaro.
41 Imwimwi munoita mabasa a baba enyu.” Awona akamubvunza kuti: “Atiripi ana e uhure;* tino Baba umwe basi, Mwari.”
42 Djesu akaabvunza kuti: “Kudai Mwari ari Baba enyu, imwimwi maizondida, ngokuti ndakabva kuna Mwari uye ndiri pano. Inini andizi kuuya ngo kuda kangu, asi ndi Mwari akandituma.
43 Ngei imwimwi amuripi kuzwisisa zvandiri kubhuya? Ngokuti amukwanisi kuzwa masoko angu.
44 Imwimwi muri ana a baba enyu, Dhiyabhurosi, uye munoda kuita zvido zva baba enyu. Iyena wainga ari muurayi paakatanga,* uye aazi kurumbwa ari mu cokwadi, ngokuti cokwadi aciripi maari. Paanoreketa manyepo, anoita maererano no zvaari, ngokuti iyena ndi munyepi uye baba we manyepo.
45 Asi, ngokuti inini ndinomubvunzai zvirokwazvo, imwimwi amunditendi.
46 Ndiani wenyu angabhuya pamhene kuti ndino citema? Kana ndecibhuya zvirokwazvo, ngei imwimwi musikatendi zvandinobhuya?
47 Munhu wa Mwari anopurutana masoko a Mwari. Ndiyo ndaa imwimwi musikandipurutani, ngokuti amuripi a Mwari.”
48 Adjudha akamudaira kuti: “Atiripi mu gwanza here patinokubvunza kuti: ‘Uri Musamariya uye kuti uno dhimoni’?”
49 Djesu akadaira kuti: “Inini andina dhimoni, asi ndinokudza Baba, uye imwimwi munondishora.
50 Asi andiripi kupsvaka kukudzwa; Ariyo anoda kuti ndikudzwe uye ndiye anotonga.
51 Zvezvirokwazvo ndinomubvunzai kuti, kana munhu akazwira masoko angu, aazombooni rufu.”
52 Adjudha akati kaari: “Zvino taakunyasa kuziya kuti iwewe uno dhimoni. Abrahamu wakafa uye aphorofita akafawo, asi iwewe unoti: ‘Kana munhu akazwira masoko angu, aazombooni rufu.’
53 Iwewe uri mukuru here kudarika baba edu Abrahamu, akafa? Aphorofita akafawo. Uri kurangarira kuti ndiwe ani?”
54 Djesu akadaira kuti: “Kana ndikadzipasa rukudzo, rukudzo rangu ari betseri. Baba angu ndiwo anondikudza, aya amunobhuya kuti ndi Mwari wenyu.
55 Uye imwimwi amuazii, asi inini ndinoaziya. Kana ndikabhuya kuti andiazii, ndaizonyepa hingana imwimwi. Asi ndinoaziya uye ndinozwira soko rawo.
56 Baba enyu Abrahamu akapfara maningi ngo kuda kuona zuwa rangu, uye akariona opfara.”
57 Hino Adjudha akamubvunza kuti: “Iwewe autona makore 50, hino wakaona kudini Abrahamu?”
58 Djesu akaabvunza kuti: “Zvezvirokwazvo ndinomubvunzai kuti, Abrahamu asati abarhwa, inini ndainga ndaayo.”
59 Hino akanonga mapuwe kuti amufure, asi Djesu akafindara obuda mu tempro.
Masoko ari pasi
^ Kana kuti: “maererano no maonero e anhu.”
^ Kana kuti: “masoko angu aabudiriri pakati penyu.”
^ Soko iri mu Cigrego rinozwi porneía. Onai pakazwi Kupanganidzwa ke Masoko.
^ Kana kuti: “kubvira pakutanga.”
