Akatarhwa na Juau 9:1-41
9 Djesu paainga ecidarika, akaona mwanarume umweni wakabarhwa ari bofu.
2 Afundi ake akamubvunzisa kuti: “Rabhi, ndiani akashaisha kuti mwanarume uu abarhwe ari bofu, iyena kana kuti abereki ake?”
3 Djesu akadaira kuti: “Munhu uu no abereki ake aazi kushaisha, asi zvakaitika kuti mabasa a Mwari apangidzwe pamhene panocokuita naye.
4 Tinodikana kuita mabasa e Uya akandituma kuciri masikati; mbai-mbai pano kucadoka uye apana ucaseenza.
5 Pandiciri mu nyika, ndiri ciedza co nyika.”
6 Mumasure me kubhuya izvi, iyena akapfirira pasi, akakanya mataka paakapfirira, uye akatora matakewo otsurutsuta mu madziso me mwanarumewo
7 uye akamubvunza kuti: “Enda kookarawa hope mu dziya ro Sirowe” (soko iri kana rikaturikirhwa rinoreya kuti “Kutumwa”). Hino iyena wakaenda kookarawa hope uye wakahwirira waakuona.
8 Hino anyacigarisano ake no aya aimuona ecikumbira zviro aibvunzisa kuti: “Uu andiepi waigara pasi ecikumbira zviro?”
9 Anhu amweni aiti: “Ndiye.” Asi amweni aitiwo: “Andiepi, asi wakatodzana naye.” Mwanarumewo waiti: “Ndini kamare.”
10 Ngokudaro, akamubvunzisa kuti: “Hino, madziso ako afunguka kudini?”
11 Iyena wakadaira kuti: “Mwanarume umweni unozwi Djesu wakakanya mataka, oakanda mu madziso angu uye wakandibvunza kuti: ‘Enda ku Sirowe wokarawa hope.’ Hino inini ndakaenda, ndokarawa hope uye ndakatanga kuona.”
12 Ngokudaro, awona akamubvunzisa kuti: “Mwanarumewo aripi?” Iyena wakaadaira kuti: “Andizvizii.”
13 Uye awona akatora mwanarume uu wainga ari bofu, oenda naye kuno Afarisi.
14 Zuwa rakakanya Djesu mataka uye ofungura madziso e mwanarume uu rainga riri Sabudu.
15 Ngokudaro, Afarisi akatangawo kubvunzisa mwanarume uya kuti zvainga zvaitika kudini kuti atange kuona. Mwanarumewo wakaadaira kuti: “Iyena wakatora mataka okanda mu madziso angu, inini ndakaenda kookarawa hope uye ndaakuona.”
16 Hino Afarisi anganani akabhuya kuti: “Uu amunhupi wa Mwari, ngokuti aacengeti Sabudu.” Amweni akati: “Zvingaitika kudini kuti mushaishi aite zvishamiso zvakadai?” Ngokudaro, pakaoneka kutama kupindirana pakati pawo.
17 Uye akabvunzisazve mwanarume uya wainga ari bofu kuti: “Unotii ngezve mwanarume iyena, sezvo madziso ako ndiwo afungurhwa kuti uone?” Mwanarumewo wakadaira kuti: “Iyena ndi muphorofita.”
18 Asi Adjudha aazi kutendera kuti mwanarumewo wainga ari bofu uye waakuona, dakara adainza abereki e mwanarumewo wekuti zvino wainga waakuona.
19 Akaabvunzisa kuti: “Uu ndiye mwana wenyu wamunobhuya kuti wakabarhwa ari bofu? Hino zvakaitika kudini kuti zvino aone?”
20 Abereki ake akaadaira kuti: “Tinozviziya kuti uu ndiye mwana wedu uye wakabarhwadi ari bofu.
21 Asi atizvizii kuti zvakaitika kudini kuti atange kuona; uye atimuziiwo wakamufungura madziso ake. Mubvunzisei, iyena waa munhu wakura; ungakwanisa kuzvipanganidza ega.”
22 Abereki ake akabhuya izvi ngokuti aithya Adjudha, ngokuti Adjudha ainga aguma pa citenderano cokuti munhu upi hake anotendera kuti iyena ndi Kristu, anodikana kudzingwa mu sinagoga.
23 Ndiyo ndaa abereki ake akati: “Iyena waa munhu wakura, mubvunzisei.”
24 Ngokudaro, akadainza kecipiri mwanarume uya wainga ari bofu uye omubvunza kuti: “Kudza Mwari;* tinozviziya kuti mwanarumewo ndi mushaishi.”
25 Iyena wakati: “Kana iyena ari mushaishi, inini andizvizii. Zvandinoziya nge zvekuti ndainga ndiri bofu uye zvino ndaakukwanisa kuona.”
26 Hino awona akamubvunza kuti: “Iyena wakuitei? Wakufungura kudini madziso ako?”
27 Iyena wakaadaira kuti: “Inini ndamubvunzai kare, asi imwimwi amuzi kuzwa. Ngei muri kuda kuti ndibhuyezve? Kodi imwimwi muri kudawo kugara afundi ake kani?”
28 Ngokudaro, akamubvunza ecimushora kuti: “Iwewe ndiwe mufundi we mwanarume iyena, asi isusu tiri afundi a Mozesi.
29 Tinozviziya kuti Mwari akareketa na Mozesi, asi mwanarumewo atikuzii kaakabva.”
30 Mwanarumewo wakaadaira kuti: “Izvi zvinoshamisa, imwimwi amukuzii kaakabva, asi iyena wafungura madziso angu.
31 Tinozviziya kuti Mwari aapurutani ashaishi, asi wese uya anothya Mwari uye anoita zvaanoda, iyena anomupurutana.
32 Kubvira kare atisati takambozwa munhu akafungura madziso e munhu akabarhwa ari bofu.
33 Kudai mwanarume iyena asikabvi kuna Mwari, apana caaizokwanisa kuita.”
34 Awona akamudaira kuti: “Iwewe wakabarhwa mu citema, hino zvinyi zvaungatifundisa?” Hino awona akamudzingira!
35 Djesu akazvizwa kuti awona ainga amudzingira, uye paakasongana naye, akamubvunzisa kuti: “Iwewe unotenda mu Mwana we munhu here?”
36 Mwanarumewo wakadaira kuti: “Tenzi, iyena ndiani kuti nditende maari?”
37 Djesu akamubvunza kuti: “Iwewe wamuona, uye zvezvirokwazvo, uri kutoreketa naye.”
38 Mwanarumewo wakati: “Tenzi, inini ndinotenda maari.” Uye wakamuhwararira.
39 Djesu akati: “Ndauya mu nyika kuti itongwe, kuitira kuti aya asikaoni aone uye aya anoona agare mapofu.”
40 Afarisi anganani ainga ari pamwepo naye akazwa zviro izvi, uye akamubvunza kuti: “Kodi isusuwo tiri mapofu here?”
41 Djesu akaabvunza kuti: “Kudai mainga muri mapofu, mungadai musina citema. Asi ngokuti munoti: ‘Tinoona.’ Citema cenyu cinorumbwa ciripo.”
Masoko ari pasi
^ Masoko aya aiseenzeswa kuti apangidze kuti munhu waidikana kubhuya zvirokwazvo.
