Masoko akanaka akatarhwa na Marko 10:1-52
-
Mucato uye kurambana (1-12)
-
Djesu anokomborera ana adoko (13-16)
-
Mubvunzo we mwanarume wakapfuma (17-25)
-
Kusiya zviro zvese nge ndaa ye Umambo (26-31)
-
Djesu anoreketazve nge zve rufu rake (32-34)
-
Cikumbiro ca Tiyago na Juau (35-45)
-
Djesu ndi rusudzunuro ku ajinji (45)
-
-
Bofu Bhartimeu anoporeswa (46-52)
10 Ecibva ipona akaenda ku mugano ke Djudhiya ku n’ombera ke Djorodhani uye anhu akamuunganirazve ikona. Iyena akatanga kuafundisa hinga zvaaigara eciita.
2 Afarisi amweni akakhwedera kaari, ecida kumuedza, omubvunzisa kuti zvinotenderhwa here kuti mwanarume arambe mukadzi wake.
3 Iyena akaadaira kuti: “Mozesi wakamubvunzei?”
4 Akamudaira kuti: “Mozesi wakatendera kuti mwanarume atare tsamba ye kurambana opasa mukadzi wake pedzepo omuendesa.”
5 Asi Djesu akaabvunza kuti: “Mozesi wakatara mutemo uu nge ndaa ye kuoma ke mwoyo yenyu.
6 Asi, kubvira pakutanga paakasika zviro, ‘Iyena akaaita mwanarume no mwanakadzi.
7 Ndiyo ndaa mwanarume acasiya baba na mai ake,
8 uye ari airi acagara nyama imwe basi’, ngokudaro anonga asiripizve airi, asi nyama imwe basi.
9 Ndiyo ndaa, zvabatanidzwa na Mwari, munhu ngaasazviparadzanise.”
10 Paakapindazve mumba, afundi akamubvunzisazve nge zvazvo.
11 Iyena akati kaari: “Munhu wese anoramba mukadzi wake owaka umweni, anonga atoita upombwe oshaishira mukadzi wake,
12 uye kana mwanakadzi akaramba mwamuna wake owakwa no umweni, anonga eciita upombwe.”
13 Anhu akatanga kumuunzisira ana adoko kuti aabate, asi afundi akaasumurura.
14 Djesu paakaona izvi, aazi kudakadzwa nazvo uye akaabvunza kuti: “Siyai ana adoko auye kandiri; musaarambidze, ngokuti Umambo wa Mwari nge we anhu akaita hingana awona.
15 Zvirokwazvo ndinomubvunzai kuti, uya asikatambiri Umambo wa Mwari hinga mwana mudoko aazopindimo.”
16 Iyena akatora ana adoko, akaakhumbatira, eciakomborera ngo kuatsanzikira nyara.
17 Paainga ecibuda, mwanarume umweni wakauya ecigogoma, womugodamira womubvunzisa kuti: “Mufundisi wakanaka, ngazvipi zvandinodikana kuita kuti ndione upenyu usikaperi?”
18 Djesu akamudaira kuti: “Ngei wecindidainza kuti mufundisi wakanaka? Akuna munhu wakanaka, kunza ka Mwari basi.
19 Iwewe unoiziya mitemo yekuti: ‘Usauraye, usaite upombwe, usabe, usaite upupuri we manyepo, usatsotse, no wekuti reremedza baba na mai ako.’”
20 Mwanarume uya wakati: “Mufundisi, ndinosotondoedza zvese izvi kubvira ndiciri mudoko.”
21 Djesu akamuringira uye ecipangidza kuti aimuda akati, “Ciri kushota ciro cimwe basi: Enda kootengesa zviro zvaunazvo, utore mareyo uipase arombo, ukadaro unozoona upfumi kudenga; kana ukapedza uya ugare muteeri wangu.”
22 Asi iyena wakatsukwara nge mhinduro yaakapaswa uye wakaenda ecirhwadziwa ngokuti wainga ano zviro zvakawanda.
23 Djesu akaringira anhu ese, uye akati ku afundi ake: “Zvicashupha zvikuru ku anhu ano mare kuti apinde mu Umambo wa Mwari!”
24 Asi afundi akashamiswa no masoko ake. Hino Djesu akaabvunza kuti: “Ana angu, zvinoshupha zvikuru kupinda mu Umambo wa Mwari!
25 Zviri nyore kuti kamero ipinde pa cibori ce tsingano pane kuti mupfumi apinde mu Umambo wa Mwari.”
26 Awona akatobambirira kushamiswa uye akamubvunzisa kuti:* “Ndiyani kamare angaponeswa?”
27 Djesu akanyasa kuaringira uye akaabvunza kuti: “Kuno anhu izvi azvikwanisiki asi azvizi kudaro kuna Mwari, ngokuti kuna Mwari zviro zvese zvinokwanisika.”
28 Pedru wakatanga kumubvunza kuti: “Onai! Takasiya zviro zvese uye takamuteerai.”
29 Djesu akati: “Ndinomugondesai kuti, apana munhu akasiya nyumba, hama, hanzvadzi, mai, baba, ana, kana minda, nge ndaa yangu uye nge ndaa ye masoko akanaka
30 asikatambiri mu nguwa ino zvakapethwa ka 100—nyumba, hama, hanzvadzi, mai, ana, uye minda, uku ecitambudzwa—uye mune ramangwana,* upenyu usikaperi.
31 Asi akawanda ari pa kutanga anozogara okupedzesera, okupedzesera anozogara okutanga.”
32 Djesu no afundi ake ainga ecikhwidza mu gwanza rokuenda ku Djerusarema, Djesu ndiye ainga ari mberi kawo, uye afundi ainga ecishamiswa, asi aya aiateera aithya. Iyena akadainzazve afundi ake 12 pawo oga uye akatanga kuabvunza zvaizoitika naye:
33 “Izwai! Tiri kukhwidza kuenda ku Djerusarema, uye Mwana we munhu acakandwa mu nyara dze atungamiriri e apristi no atari. Awona acamutongera rufu uye anozomukanda mu nyara dze anhu e madzinza amweni,
34 uye awona acamushora, acamupfirira, acamuponda, uye acamuuraya, asi mumasure me mazuwa 3 iyena acamutswa.”
35 Tiyago na Juau, ana a Zebhedheu, akamukhwederera uye akamubvunza kuti: “Mufundisi, tinoda kuti mutiitire zvaticamukumbirai.”
36 Iyena akaabvunzisa kuti: “Munoda kuti ndimuitirei?”
37 Awona akadaira kuti: “Mu umambo wenyu, itai kuti tigare umwe ku moko wenyu kwawo uye umweni ku moko boshwe.”
38 Asi Djesu akaabvunza kuti: “Imwimwi amuzvizii zvamuri kukumbira. Munokwanisa here kumwira mu kopo yandiri kumwira kana kubhabhatidzwa no rubhabhatidzo randiri kubhabhatidzwa naro?”
39 Awona akamudaira kuti: “Tinokwanisa.” Hino Djesu akaabvunza kuti: “Imwimwi mucamwiradi mu kopo yandiri kumwira, uye mucabhabhatidzwa no rubhabhatidzo randiri kubhabhatidzwa naro.
40 Asi, kusanangura kuti ndiyani acagara ku moko wangu kwawo kana we boshwe, andinipi ndinosanangura, mbuto idzona nge dze aya akadzigadzirirhwa na Baba angu.”
41 Afundi amweni 10 paakazvizwa, akanyangadzirhwa Tiyago na Juau.
42 Asi Djesu akaadainza uye oabvunza kuti: “Imwimwi munozviziya kuti aya anozwi atungamiriri e madzinza amweni anodzvinyirira anhu awo uye akuru awo anoatonga.
43 Izvi azvidikani kuitika kudaro pakati penyu; asi uya anoda kugara mukuru pakati penyu anodikana kugara museenzi wenyu,
44 uye uya anoda kugara we kutanga pakati penyu ngaagare muranda wenyu.
45 Ngokuti kunyazi Mwana we munhu aazi kuuya kuzoseenzerhwa, asi kuzoseenzera, no kupasa upenyu* wake kuti asudzunure ajinji.”
46 Awona akapinda mu Djeriko. Asi iyena pamwepo no afundi ake no anhu akawanda paainga ecibuda mu Djeriko, painga pano bofu rimweni raikumbira mare raizwi Bhartimeu (mwana wa Timeu), irona rainga riri pa muceto pe gwanza.
47 Paakazwa kuti ainga ari Djesu, Munazareta, iyena wakatanga kukhuwa, eciti: “Djesu Mwana wa Dhavhidhi, ndizwirewo usisi!”
48 Anhu akawanda akatanga kumusumurura, ecimubvunza kuti anyarare, asi iyena waitobambirira kukhuwa eciti: “Mwana wa Dhavhidhi, ndizwirewo usisi!”
49 Hino Djesu akaima uye akati: “Mudainzei.” Uye akadainza mwanarume uya wainga ari bofu, ecimubvunza kuti: “Shinga! Purumuka; iyena ari kukudainza.”
50 Iyena wakakhandira djira rake re kunza, wogogoma woenda kuna Djesu.
51 Hino Djesu akamubvunzisa kuti: “Unoda kuti ndikuitirei?” Mwanarume uya wainga ari bofu wakati: “Rabhoni,* itai kuti ndione.”
52 Uye Djesu akamubvunza kuti: “Enda. Kutenda kako kakuporesa.” Ciriporipoco iyena wakatanga kuona, uye wakamuteera mu gwanza.
Masoko ari pasi
^ Mabhaibheri amweni anoti: “akabvunzisana pacawo.”
^ Kana kuti: “mu magariro e zviro anouya.” Onai pakazwi Kupanganidzwa ke Masoko.
^ Kana kuti: “mwiya.”
^ Soko iri rinoreya kuti “Mufundisi.”
