Akatarhwa na Marko 13:1-37
13 Paaibuda mu tempro, umwe we afundi ake wakati kaari: “Mufundisi, onai kurungama kakaita mapuwe aya no zviwakwa zvawo!”
2 Hino, Djesu akamubvunza kuti: “Uri kuona zviwakwa izvi zvakakura? Apana buwe ricasara pamusoro pe buwe rimweni risikazi kuwiswa.”
3 Paainga akagara mu Dunhu re Miorivhi akaringira ku tempro, Pedru, Tiyago, Juau na Andreya akamubvunzisa ari oga kuti:
4 “Tibvunzei, zviro izvi zvicaitika rini, uye ngacipi cipangidzo cekuti zviro zvese izvi zvaakuda kupera?”
5 Hino Djesu akatanga kuabvunza kuti: “Ngwarirai kuti pasagare no munhu anomupausai.
6 Ajinji acauya mu zina rangu eciti: ‘Ndini,’ uye acapausa akawanda.
7 Uyezve, pamunozwa ngezve hondo no masoko anocokuita no hondo, musapatike ndizvo; ngokuti zviro izvi zvinodikana kuitika, asi mugumo unonga usati waguma.
8 “Ngokuti dzinza ricarhwisa dzinza rimweni uye umambo ucarhwisa umambo umweni; kucazooneka zvigidhi-gidhi mu mbuto dzakawanda no nzara. Zvese izvi kunonga kuri kutanga ke matambudziko.
9 “Asi imwimwi ngwarirai. Anhu acamuendesai mu matribhunari e kamunogara, uye imwimwi mucapondwa mu masinagoga, munozoendeswa pamberi pe atungamiriri no madzimambo nge ndaa yangu, kuti mupase upupuri pamberi pawo.
10 Uyezve, masoko akanaka, anodikana kutanga aparidzirhwa ku madzinza ese.
11 Uye paanozomuendesai ku atongi, musanetseke nge zviya zvamucareketa; asi bhuyai zvamucapaswa pa nguwa iyona kamare, ngokuti andimwipi munozoreketa, asi mwiya mucena ndiwo unozoreketa.
12 Hama icauraisa hama yayo, uye baba acauraisa mwana wawo, uye ana acapandukira abereki, oauraisa.
13 Uye mucazondwa no anhu ese nge ndaa yo zina rangu. Asi uya unonga washingirira dakara ku mugumo ndiye ucaponeswa.
14 “Asi kana mukaona ciro cinonyanyasa cinoparadza cakaima pa mbuto pacisikadikani kuima (muerengi ngaazwisise), hino anhu anonga ari mu Djudhiya ngaatizire ku matunhu.
15 Munhu anonga ari padenga pe nyumba ngaasacite kana kuenda kootora zviri mumba make;
16 uye munhu anonga ari mu munda ngaasahwirire kuenda kootora macira aasiya sure.
17 Ane nyathwa anakadzi anonga ano pamwiri, no anonga ari kuamwisa mu mazuwa awona!
18 Rumbwai mecinamata kuti izvi zvisaitike mu nguwa yo kutonhora;
19 ngokuti mazuwa awona acange ari mazuwa e kutambudzika kusati kakamboitika kubvira pa nguwa yekuti Mwari akatanga kusika zviro dakara zvino, uye kusikazomboitikizve.
20 Zvezvirokwazvo, kudai Djehovha* aazi kupungura mazuwa awona, apana munhu waizoponeswa. Asi nge ndaa yo akasanangurhwa aakasanangura, iyena akapungura mazuwa awona.
21 “Hino, kana munhu akamubvunzai kuti: ‘Onai! Kristu ari pano,’ kana kuti: ‘Onai! Ari iyo,’ musatendere.
22 Ngokuti kucaoneka Anakristu no aphorofita e kunyepa uye acaita zvipangidzo no zvishamiso kuti acengedze anhu, kunyazi no aya akasanangurhwa.
23 Hino garai makadjenga. Inini ndamubvunzai zvese pacino nguwa.
24 “Asi mu mazuwa awona, mumasure me mazuwa e kutambudzika, zuwa ricasvipa, uye mwedzi auzodjeki,
25 nyeredzi dzicambwera kubva kudenga, uye masimba e kudenga acazunguzwa.
26 Uye anhu acaona Mwana we munhu eciuya mu makore no simba guru uye no rukudzo.
27 Uye anozotuma ngirozi dzake dzinozounganidza akasanangurhwa ake mu matii marongomuna e nyika, kubvira ku dii rimwe re nyika dakara ku dii rimweni re kudenga.
28 “Fundai no muezaniso uu we muonde: Nhai dzawo padzinopfipfitira dzobudisa masakani, munoziya kuti marimo aapadhuze.
29 Ngo mushobo umwewo, pamunoona zviro izvi zveciitika, ziyai kuti iyena* aapadhuze, pa musuwo.
30 Ndinomubvunzai zvirokwazvo kuti mubarirhwana uu auzoperi dakara zviro zvese izvi zvaitika.
31 Denga no nyika zvicapera, asi masoko angu aazoperi.
32 “Apana munhu anoziya ngezve zuwa kana nguwa iyona, kunyazi ngirozi dze kudenga kana Mwana, asi Baba basi ndiwo anozviziya.
33 Rumbwai makarinda, uye garai makamuka, ngokuti amuzvizii kuti nguwa ii icaguma rini.
34 Zvakaezana no munhu anosiira nyumba mu nyara dze aseenzi ake pedzepo woita rhwendo, iyena anopasa museenzi umwe na umwe basa rake, obvunza murindi we pa musuwo kuti arumbwe akarinda.
35 Hino, rumbwai makarinda, ngokuti amuzvizii kuti muridzi we nyumba acauya comasikati here, cousiku, comacibesi-besi kucakasvipa,* kana comacibesi kwaedza,
36 kuitira kuti kana akauya musikakariri, asamugumirei makawata.
37 Asi zvandiri kubvunza imwimwi, ndiri kubvunza ese: Rumbwai makarinda.”
Masoko ari pasi
^ Onai Apendi. A5.
^ Pari kubhuya ngezve Mwana we Munhu.
^ Cigrego: “djongwe parinorira.”
