Masoko akanaka akatarhwa na Marko 14:1-72
-
Apristi anoronga kuuraya Djesu (1, 2)
-
Mafuta anonuhwirira anodururhwa mu musoro ma Djesu (3-9)
-
Djudhasi anotengesa Djesu (10, 11)
-
Paskwa yo kupedzesera (12-21)
-
Kutangwa ke kurarira ka Tenzi (22-26)
-
Djesu anobhuya kuti Pedru waizomuramba (27-31)
-
Djesu anonamata mu Getsimani (32-42)
-
Djesu anosungwa (43-52)
-
Kutongwa pamberi pe Sinedriyo (53-65)
-
Pedru anoramba Djesu (66-72)
14 Painga pasara mazuwa mairi kuti igume Paskwa no Mutambo we Pau Dzisina Mbiriso. Uye atungamiriri e apristi no atari ainga ecironga mazano kuti no ungwaru abate Djesu uye amuuraye;
2 asi awona aiti: “Atidikani kuzviita pakati pe mabiko; pamweni paizoitika woyo-woyo pakati pe anhu.”
3 Uye iyena paainga ari ku Bhetanya ecirhya* pa nyumba ya Simoni nyamapere, pakaguma mwanakadzi umweni ane cinhekwe ce arabhasto, ce mafuta anonuhwirira e nardho, anodhurisisa. Iyena wakafungura cinhekwe ce arabhasto uye wakatanga kudurura mafuta mu musoro make.
4 Amweni paakazviona, akanyangadzwa uye akatanga kubvunzana kuti: “Ngei ari kutamba no mafuta aya kudai?
5 Ngokuti mafuta aya anonuhwirira angadai atengeswa no madhenariyo anodarika 300, mareyo yopaswa arombo!” Uye awona akanyangadzwira mwanakadziwo.*
6 Asi Djesu akaabvunza kuti: “Musiyei hake. Muri kutambudzirei mwanakadzi uu? Iyena wandiitira zvakanaka.
7 Ngokuti arombo munawo nguwa dzese, uye mungaaitira zvakanaka pese pamunoda, asi amuzogari na inini nguwa dzese.
8 Iyena waita zvaanokwanisa; wandidururira mafuta anonuhwirira mu mwiri wangu, kuitira kuti ndizokotswe.
9 Ndinomubvunzai zvirokwazvo kuti, kwese kucaparidzwa masoko akanaka mu nyika yese, zvaizwa no mwanakadzi uu zvicarekethwawo kuti aedzurirhwe.”
10 Uye Djudhasi Iskariyoti, umwe we afundi 12, wakaenda ku atungamiriri e apristi kuti atengese Djesu.
11 Paakazvizwa, awona akapfara zvikuru uye akamubvunza kuti aizomupasa mare yo parata. Kubvira pa nguwa iyona kuenda mberi iyena waipsvaka mukana wakanaka wokumutengesa.
12 Hino pa zuwa rokutanga re Mutambo we Pau Dzisina Mbiriso, paaisoita cibairo co Paskwa, afundi ake akamubvunzisa kuti: “Munoda kuti tigadzirire kupi kokurhyira Paskwa?”
13 Ngokudaro, iyena akatuma airi e afundi ake uye akaabvunza kuti: “Endai mu thaundi, uye mucasongana no mwanarume umweni wakathwara hari yo mvura. Muteerei,
14 uye mu nyumba yaanopinda, bvunzai muridzi we nyumba kuti, ‘Mufundisi wabhuya kuti: “Iri kupi nyumba ye kutambira arendo yandingarhyira Paskwa no afundi angu?”’
15 Uye iyena acamupangidzai nyumba huru ye pamusoro, ino zvese zvekuseenzesa. Tigadzirirei imona.”
16 Hino afundi akaenda, akapinda mu thaundi, akagumira zvese hinga zvainga zvabhuiwa na Djesu, uye akagadzirira Paskwa.
17 Zuwa parakadoka, iyena akaguma pamwepo no afundi 12.
18 Uye paainga ari pameza ecirhya, Djesu akati: “Ndinomubvunzai zvirokwazvo, umwe wenyu ari kurhya na inini acanditengesa.”
19 Awona akatanga kutsukwara uye umwe na umwe wawo wakamubvunzisa kuti: “Ndini here?”
20 Iyena akaabvunza kuti: “Ndi umwe wenyu 12, uya wandinoseya naye mu tijera.
21 Ngokuti Mwana we munhu ari kuenda, hinga zvakatarhwa nge zvake, asi une nyathwa munhu anotengesa Mwana we munhu! Zvainga zviri nani kudai munhu iyena usikazi kubarhwa.”
22 Paainga ecirhya, akatora pau, mumasure me kuita munamato, akaigura, uye akaipasa afundi ake, eciti: “Tambirai murhye, iyona inoimirira mwiri wangu.”
23 Uye akatorawo kopo, akaita munamato, oapasa, uye ese akamwa.
24 Uye akaabvunza kuti: “Ii inoimirira ‘ngazi yangu yecitenderano,’ icadururhwa kuti ibetsere ajinji.
25 Asi ndinomubvunzai zvirokwazvo kuti, andicazomwizve mucero we muuvha dakara pa zuwa randicamwazve vhinyu ipsva mu Umambo wa Mwari.”
26 Paakazopedza, mumasure mekuemba ngoma dze kukudza Mwari,* akaenda mu Dunhu re Miorivhi.
27 Uye Djesu akaabvunza kuti: “Mwese mucanditiza, ngokuti zvakatarhwa kuti: ‘Ndicakuadza muushi, uye mabira acabarariswa.’
28 Asi kana ndikamutswa kubva ku akafa, ndicatungamira ku Garireya.”
29 Asi Pedru wakamubvunza kuti: “Kunyazi anhu ese akamutizai, inini andimutizii.”
30 Asi Djesu akati kaari: “Zvirokwazvo ndinokubvunza kuti nyamasi, usiku uno kamare, djongwe risati rarira kairi, ucandiramba katatu.”
31 Asi iyena akarumbwa eciti: “Kunyazi kana ndecitodikana kufa na imwimwi, andizomurambii.” Uye ese amweni akatanga kureketawo zvimwezvo.
32 Hino akaguma pa mbuto yaizwi Getsimani, uye iyena akati ku afundi ake: “Garai pano pandinonga ndecinamata.”
33 Iyena akatora Pedru, Tiyago na Juau, uye akatanga kutsukwara no kunetseka zvikuru.
34 Akati kaari: “Ndakatsukwara zvikuru,* zvokutoda kufa. Garai pano uye rumbwai makarinda.”
35 Uye akaenda mberi padoko, akagodama uye akanamata ecikumbira kuti, kana zveciita, nguwa iya idarike hayo.
36 Uye akati: “Abha,* Baba, zviro zvese zvinokwanisika kamuri; bvisai kopo ii kandiri. Asi ngakusaizwe kuda kangu, asi kuda kenyu.”
37 Iyena akahwirira oagumira akawata, uye akati kuna Pedru: “Simoni, uri kutowata hako? Wakonerhwa simba ro kurumbwa wakarinda ke nguwa imwe basi?
38 Rumbwai makarinda uye rumbwai mecinamata, kuti musapinde mu muedzo. Zvezvirokwazvo mwiya unoda,* asi nyama aina simba.”
39 Iyena akaendazve, uye akanamata ecibhuya zviro zvimwezvo.
40 Akahwirirazve uye akaagumirazve eciwata, ngokuti madziso awo airema ngo hope, ndiyo ndaa ainga asikazvizii zvokumudaira.
41 Akahwirirazve kecitatu uye akaabvunza kuti: “Pa nguwa yakaita hingana ino, imwimwi muri kuwata mecizorora! Zvakwana! Yatoguma nguwa! Mwana we munhu aakukandwa* mu nyara dze ashaishi.
42 Mukai tiende. Onai! Mutengesi wangu waakuguma.”
43 Uye ciriporipoco, paainga ecireketa, Djudhasi, umwe we afundi 12, wakauya no anhu akawanda ainga ano masupada no mipini, anhu aya akatumwa no atungamiriri e apristi, atari no akuru.
44 Uya waizomutengesa wakaapasa cipangidzo, eciti: “Uya wandinopsvoda, ndiye; musungei uye endai naye makanyasa kumurinda.”
45 Hino wakaenda kuna Djesu, wakamukhwederera uye wakati: “Rabhi!” pedzepo wakamupsvoda.
46 Ngokudaro awona akamubata uye akamusunga.
47 Asi, umwe wainga aripo wakatora supada yake, woceka nzee yo muranda we mupristi mukuru.
48 Hino Djesu akaabvunza kuti: “Imwimwi mauya koondisunga mune masupada no mipini hingana kuti ndiri mbavha?
49 Mazuwa ese ndaigara na imwimwi mu tempro ndecifundisa, asi imwimwi amuzi kundisunga. Zvese izvi zviri kuitika, kuti Matarhwa adzadzike.”
50 Uye ese akamusiya ega otiza.
51 Asi, djaha rimweni rainga rakafuka djira rakanaka risina carakapfeka, rakatanga kumuteera ngo padhuze uye akaedza kurisunga,
52 asi irona rakasiya djirero uye rakatiza risikazi kupfeka.*
53 Hino akatora Djesu omuendesa ku mupristi mukuru, uye atungamiriri ese e apristi, akuru uye atari akaungana.
54 Asi Pedru, wakateera nge cekure dakara waguma pa ruwanze ro mupristi mukuru; uye wakagara pamwepo no aseenzi e pa nyumbepo ecigota muriro.
55 Atungamiriri e apristi no Sinedriyo yese aipsvaka upupuri kuti auraye Djesu, asi apana upupuri waakaona.
56 Akawanda aimuitira upupuri we kunyepa, asi upupuri wawo wainga usikapindirani.
57 Uyezve, amweni aimuka uye aipasa upupuri we kunyepa, eciti:
58 “Isusu takamuzwa eciti: ‘Ndicaphwanya tempro ii yakaizwa no nyara dzo anhu, uye mu mazuwa matatu ndicagadzira imweni isikazi kuizwa no nyara dzo anhu.’”
59 Asi kunyazi pa nyaya ii, upupuri wawo wainga usikapindirani.
60 Hino mupristi mukuru wakamuka pakati pawo uye wakabvunzisa Djesu kuti: “Audairi ciro kani? Unoonawo kudini panocokuita no izvi zvaari kukupumha?”
61 Asi iyena akarumbwa akanyarara uye aazi kumudaira ciro. Mupristi mukuru wakamubvunzisazve kuti: “Iwewe ndiwe Kristu, Mwana we Anokudzwa here?”
62 Hino Djesu akamudaira kuti: “Honde; uye mucaona Mwana we munhu akagara ku moko kwawo we simba, eciuya ari pa musoro pe makore e kudenga.”
63 Ngokudaro mupristi mukuru wakamwesa macira ake uye wakati: “Ticadirei apupuri amweni?
64 Imwimwi mamuzwa ecituka Mwari. Munoonawo kudini?” Uye ese akasanangura kuti iyena waidikana kuuraiwa.
65 Uye amweni akatanga kumupfirira mata, akamufukidza ku hope, akamuponda zvibhakera uye akati: “Phorofita!” Uye mumasure me kumuponda bofutada, masurudado akamutora.
66 Pedru paainga ari ngo pasi pa ruwanze, pakaguma mwanakadzi umweni waiseenzera mupristi mukuru.
67 Paakaona Pedru ecigota muriro, wakanyasa kumuringira uye wakati: “Iwewe waihambawo na Djesu, we ku Nazareta.”
68 Asi iyena wakarambira, wobhuya kuti: “Inini andimuzii uye anditozvizii zvauri kureketa,” pedzepo wakabuda woenda pa musuwo pe ruwanze.
69 Museenzi uya wo mwanakadzi wakamuona uye wakatangazve kubvunza anhu ainga aripo kuti: “Uu ndi umwe wawo.”
70 Asi iyena wakarambirazve. Uye mumasure me kacinguwa, anhu ainga aripo akatangazve kubvunza Pedru eciti: “Zvezvirokwazvo iwewe uri umwe wawo, ngokuti zviri pamhene kuti iwewe uri we ku Garireya.”
71 Asi iyena wakatanga kudzituka uye ecipika kuti: “Inini andimuzii mwanarume uu wamuri kubhuya nge zvake!”
72 Ciriporipoco djongwe rakarira kecipiri, uye Pedru wakaedzurira zvaainga abvunzwa na Djesu: “Djongwe risati rarira kairi, ucandiramba katatu.” Iyena wakatsukwara zvikuru uye wakatanga kucema.
Masoko ari pasi
^ Kana kuti: “pa meza.”
^ Kana kuti: “Uye akareketa naye no hasha; Uye akamusumurura.”
^ Kana kuti: “mapisarema.”
^ Kana kuti: “Mwiya wangu wakatsukwara.”
^ Soko iri ngere Cihebheru kana Ciaramaiko rinoda kureya kuti: “Baba nai.”
^ Kana kuti: “wakagadzirira.”
^ Kana kuti: “aakutengeswa.”
^ Kana kuti: “rakatiza rakapfeka dzira re mukati basi.”
