Akatarhwa na Marko 2:1-28
2 Mumasure me mazuwa manganani, Djesu akaendazve ku Kafarnau, uye masoko ekuti iyena ainga aapanyumba akabararika.
2 Anhu akawanda akaungana, zvekuti painga pasisina mbuto kunyazi pa musuwo, uye iyena akatanga kuafundisa masoko akanaka.
3 Awona akamuunzisira mwanarume wainga wakaoma mwiri wainga wakathwarhwa no anhu arongomuna.
4 Asi ainga asikakwanisi kumuendesa kuna Djesu nge ndaa yo kuwanda ke anhu, hino akafungura denga ro nyumba ngo pamusoro pe mbuto yainga ina Djesu, uye akacitisa mwanarume uya wakaradzikwa pa makha.
5 Paakaona kutenda kaainga anako, Djesu akati ku munhu wainga wakaoma mwiri: “Mwanangu, zvishaishi zvako zvarekererhwa.”
6 Atari amweni ainga aripoo, awona ainga ecirangarira mu mwoyo mawo kuti:
7 “Ngei munhu uu uri kureketa kudai? Iyena uri kutuka Mwari. Ndiani ungarekerera zvitema kusiya umwe basi, Mwari?
8 Asi nokukasika, Djesu akazviziya ngo mukati make zvaainga ecirangarira pacawo, uye akaabvunzisa kuti: “Ngei muri kurangarira zviro zvakashata mu mwoyo menyu?
9 Cinyi ciri nyore kubvunza munhu uu wakaoma mwiri: ‘Zvishaishi zvako zvarekererhwa,’ kana kuti: ‘Purumuka utore makha wako uhambe’?
10 Asi kuti muziye kuti Mwana we munhu ano simba re kurekerera zvishaishi pa nyika—” akabvunza mwanarume wainga wakaoma mwiri kuti:
11 “Ndinokubvunza kuti: Muka, tora makha wako uende kumba.”
12 Ngokudaro iyena wakamuka wobata ciriporipoco makha wake, uye wakabuda ecihamba pamberi pe anhu ese. Hino anhu ese akashamiswa, uye akakudza Mwari, eciti: “Atisati takamboona zvakadai.”
13 Djesu akaendazve mu muceto me bahari, anhu ese aienda kaari, uye iyena akatanga kuafundisa.
14 Paainga ecihamba, Djesu akaona Revhi mwana wa Arfeu wakagara pa mbuto yo kuripira musoho, akati kaari: “Gara muteeri wangu.” Iyena wakapurumuka uye wakamuteera.
15 Pa nguwa yakazoteera Djesu ainga ecirhya* pa nyumba ya Revhi, uye arongosi e musoho akawanda no ashaishi airhya na Djesu pamwepo no afundi ake, ngokuti akawanda awo aimuteera.
16 Asi atari e Afarisi paakaona kuti iyena airhya no ashaishi uye no arongosi e musoho, akabvunzisa afundi ake kuti: “Ngei iyena ari kurhya no arongosi e musoho uye no ashaishi?”
17 Paakazvizwa, Djesu akati kaari: “Anhu akatamba aadi murapi, asi aya ari kurhwara. Inini andizi kuuya koodainza anatsi, asi ashaishi.”
18 Afundi a Juau no Afarisi ainga ano musambo we kutsanya. Hino akakhwedera kuna Djesu omubvunzisa kuti: “Ngei afundi a Juau no afundi e Afarisi ecitsanya, asi afundi enyu aatsanyi?”
19 Hino Djesu akati kaari: “Shamwari dze mwanarume uri kucata, dzingatsanya here nepoo mwanarumewo uripo? Pa nguwa yekuti awona anonga acino mwanarume uri kucata, aadikani kutsanya.
20 Asi pacaguma zuwa rekuti mwanarumewo acabviswa pakati pawo, uye awona acatsanya.
21 Apana munhu anosonera cigamba cipsva pa djira rakatsakara. Ngokuti cigamba cipsva cicaita kuti djirero rimweke, uye paya painga pamweka pototunhudzirika.
22 Uyezve, apana munhu anokanda vhinyu ipsva mu zvigubu zve matehwe zvakatsakara, kana akadaro, zvigubu zve matehwe zvicaphatuka vhinyu icapsveteka uye zvigubu zve matehwe zvicatsakatika. Asi anhu anokanda vhinyu ipsva mu zvigubu zve matehwe zvipsva.”
23 Djesu ainga ecipinda no muminda yo trigu mu Sabudu, uye afundi ake akatanga kutora trigu eciipikita paainga ecihamba.
24 Afarisi paakazviona, akati kaari: “Ona! Ngei afundi ako ari kuita zvisikadikani kuizwa pa zuwa re Sabudu?”
25 Asi iyena akati kaari: “Amuzi kuerenga here zvakaizwa na Dhavhidhi no anhu ake paakazwa nzara?
26 Hinga zvakatarhwa ngezva Abhiatari mutungamiriri we apristi, apo Dhavhidhi paakapinda mumba ma Mwari orhya pau dzaiizwa mupiro, idzo dzainga dzisikatenderhwi no mutemo kuti dzirhyiwe no munhu upi hake kunza ke apristi, uye akadzipasawo anarume aainga anawo?”
27 Uye akatunhudzira kuti: “Sabudu rakaizirhwa munhu, haiwa kuti munhu akaizirhwa Sabudu.
28 Hino Mwana we munhu ndiye Tenzi kunyazi we Sabudu.”
Masoko ari pasi
^ Kana kuti: “paainga ari pa meza.”
