Akatarhwa na Marko 3:1-35
3 Djesu akapindazve mu sinagoga, imona mainga muno mwanarume wainga wakaremara nyara.*
2 Ngokudaro, Afarisi ainyasa kumuringira kuti aone kuti aizoporesa here mwanarume uya ngo mu Sabudu, kuti amupumhe.
3 Djesu akati ku mwanarume wainga wakaremara nyara:* “Muka, uya pakati apa.”
4 Pedzepo akaabvunzisa kuti: “Zvinotenderhwa here kuita zviro zvakanaka kana zvakashata, kuponesa kana kuuraya mu Sabudu?” Asi awona akarumbwa akanyarara.
5 Akaaringira akanyangadzwa, ecirhwadziwa ngo kuona kuoma mwoyo kawo, iyena akati ku mwanarumewo: “Tambanudza nyara yako.” Iyena wakaitambanudza, uye iyona yakatamba.
6 Afarisi akabudemo, oenda koopangana no ateeri a Herodhi, kuti auraye Djesu.
7 Asi Djesu akaenda ku bahari pamwepo no afundi ake, uye anhu akawanda e ku Garireya no e ku Djudhiya aimuteera.
8 Paakazwa zviro zvakawanda zvaaiita, anhu akawanda akaenda kaari, kutobatanidzawo e Djerusarema, e ku Idhumeya ku n’ombera ke Djorodhani no e mu nharaunda dzakatenderedza Tiro no Sidhoni.
9 Uye iyena akabvunza afundi kuti amugadzirire kabharko kuitira kuti anhu asamutsikirire.
10 Ngokuti iyena aiporesa akawanda, ese aya ainga ano nhenda dzakakura aimutenderedza kuti amupsvase.
11 Kunyazi mwiya yakashata, pese payaimuona yaigodama pamberi pake, uye yaikhuwa yeciti: “Ndimwi Mwana wa Mwari.”
12 Kajinji kakhona Djesu aiibvunza kuti iyona isabvunze anhu amweni kuti iyena ndiani.
13 Iyena akakwira mu dunhu odainza aakasanangura, uye awona akaenda kaari.
14 Akaumba cikwata ce anarume 12, aakazodainza kuti aphostori, aya aizohamba naye uye aizoatuma kuti aparidzire
15 uye kuti agare no simba re kudzingira madhimoni.
16 Uye pa cikwata ce anarume 12 caakaumba* painga pano Simoni waakazodainzawo kuti Pedru,
17 Tiyago na Juau ana a Zebhedheu (aya aakapasawo zina rokuti Bhoanerje, rinoreya kuti “ana e mheni”),
18 Andreya, Firipi, Bhartoromeu, Mateu, Tomaji, Tiyago mwana wa Arfeu, Tadheu, Simoni Mukanani,*
19 uye Djudhasi Iskariyoti, uya wakazomutengesa.
Hino Djesu akapinda mumba,
20 uye anhu akawanda akaunganazve, zvekutoti Djesu pamwepo no afundi akakonerhwa nguwa ye kurhya.
21 Asi anyaukama ake paakaziya zvaiitika, akaenda kaari kuti amubate, ngokuti aiti: “Iyena waakupenga.”
22 Uyezve, atari aibva ku Djerusarema aiti: “Iyena ano mwiya wa Bherizebhu,* uye ari kudzingira madhimoni no simba ro mutongi we madhimoni.”
23 Hino mumasure me kuadainza, akabhuya nawo eciseenzesa muezaniso eciti: “Sathani ungadzingira kudini Sathani?
24 Kana umambo wakaparadzana pacawo, umambo uwona aungarumbwi wakaima;
25 uye kana nyumba isikazi kubatana pacayo, nyumba iyona aizorumbwi yakaima.
26 Uyezve, kana Sathani akadzipandukira pacake ecidzirhwisa, aazorumbwi akaima asi mugumo wake unonga wakhwedera padhuze.
27 Zvezvirokwazvo, apana munhu angakwanisa kupinda mumba me mwanarume ano simba okwanisa kuba zviro zvake, asikazi kutanga asunga mwanarumewo. Kana akadaro ndipo paanozokwanisa kumubira zviro zvake.
28 Ndinomubvunzai zvirokwazvo kuti zviro zvese zvinoizwa no ana e anhu zvicarekererhwa, pasinei no zvitema zvaaita no kutuka kaaita.
29 Asi uya anotuka mwiya mucena aazorekererhwi asi anozogara no ndaa isikaperi.”
30 Djesu akabhuya izvona ngokuti awona aiti: “Iyena ano mwiya wakashata.”
31 Mai ake no hama dzake akagumepo, ogara ngo dii re kunza, uye akatuma munhu kuti amudainze
32 Ngokuti painga pano anhu akawanda akagara aimutenderedza, akamubvunza kuti: “Tenzi! Mai enyu no hama dzenyu ari kunzeyo ecimupsvakai.”
33 Asi iyena akadaira kuti: “Mai angu no hama dzangu ndiani?”
34 Hino iyena akaringira anhu akagara aimutenderedza uye akati: “Mai angu no hama dzangu ndiwo awona aya!
35 Uya anoita kuda ka Mwari, ndiye hama yangu, hanzvadzi yangu uye mai angu.”
Masoko ari pasi
^ Kana kuti: “wakaoma nyara.”
^ Kana kuti: “wakaoma nyara.”
^ Kana kuti: “caakagadza.”
^ Kana kuti: “anoshingaira.”
^ Iri i zina rinopaswa Sathani.
