Akatarhwa na Marko 4:1-41
4 Djesu akatangazve kufundisa mu muceto me bahari, anhu akawanda akaungana padhuze naye. Hino iyena akakwira mu bharko ogara pasi oenda kure padoko no painga pano anhu, asi anhu ainga akaima mu muceto me bahari.
2 Iyena akatanga kuafundisa zviro zvakawanda eciseenzesa miezaniso, aiafundisa eciti:
3 “Purutanai! Murimi umweni wakaenda kookusa mbeu.
4 Paainga ecikusa, mbeu dzimweni dzakambwerera pa muceto pe gwanza, uye shiri dzakauya dzopera kurhya.
5 Dzimweni dzakambwerera pa mbuto ino mapuwe pasina mataka akawanda, idzona dzakamera nokukasika ngokuti painga pasina mataka akawanda.
6 Asi zuwa parakabuda, dzakapsva uye dzakaoma, ngokuti dzainga dzisina midzi.
7 Mbeu dzimweni dzakambwerera pakati pe minzwa, minzwa padzakakura, dzakapingaidza kukura ke mbeu dziya, uye idzona adzizi kubara zvibereko.
8 Asi dzimweni dzakhona dzakambwerera pa mataka akanaka, mumasure me kumera no kukura, dzakatanga kubara zvibereko zvakapethwa ka 30, ka 60, uye ka 100.”
9 Iyena akatunhudzira eciti: “Ano nzee dzo kuzwa, ngaazwe.”
10 Hino paainga ari ega, anhu ainga akamutenderedza pamwepo no afundi 12 akaenda koomubvunzisa ngezve miezaniso yaainga aita.
11 Iyena akaabvunza kuti: “Imwimwi munotenderhwa kuzwisisa zvakaigika zve Umambo wa Mwari, asi ku amweni zvese zvinoziiswa peciseenzeswa miezaniso,
12 kuitira kuti kunyazi eciringira, asi aaoni, kunyazi ecipurutana asi aazwisisi, uye aazotendeuki kuti arekererhwe.”
13 Uyezve, iyena akaabvunza kuti: “Imwimwi amuripi kuzwisisa muezaniso uu, hino mungazwisisa kudini miezaniso imweni yese?
14 “Murimi anokusa soko ra Mwari.
15 Hino, mbeu dziya dzakambwerera pa muceto pe gwanza, panokuswa soko ra Mwari, dzinoimirira aya anozwa soko ra Mwari; asi nokukasika, Sathani unouya wobvisa soko rakuswa maari.
16 Ngo mushobo umwewo, mbeu dzakambwerera pa mbuto ino mapuwe, dzinoimirira aya anozwa soko ra Mwari; okasika kuritambira no mupfaro.
17 Kunyazi zvakadaro aana midzi pacawo, asi anomboenderera mberi ke cinguwa; hino akasongana no zvinetso kana kuteererhwa nge ndaa ye soko, anokuhunyika.
18 Pano mbeu dzimweni dzakambwerera pakati pe minzwa. Idzona dzinoimirira anozwa soko ra Mwari,
19 asi nge ndaa ye kudzirhya mwoyo nge zviro zve nyika ino,* no kucengedza ke upfumi uye zvido zvimweni zvese, zvinopingaidza kukura ke soko, rotama kubara zvibereko.
20 Pokupedzesera, mbeu dzakambwerera pa mataka akanaka, dzinoimirira aya anozwa soko oritambira uye otanga kubara zvibereko, zvakapethwa ka—30, ka 60, uye ka 100.”
21 Akaabvunzazve kuti: “Anhu anotora here cibani kakucidumhaidza nge citengu* kana kucikanda pasi pe kama? Aacikandi here pakanyasa kukwirira?
22 Ngokuti apana cakafisika cisikazozikaniki; uye apana cakafukidzwa cisikazofukurhwi.
23 Ano nzee dzo kuzwa, ngaazwe.”
24 Akatizve kaari: “Nyasai kupurutana zvamurikuzwa. Mupimo wamuri kupima nawo amweni, ndiwo wamucapimwawo nawo, uye mucatotunhudzirhwa.
25 Ngokuti aya anazvo anozopaswa zvakawanda, asi aya asina anozotorerhwa, kunyazi zvidoko zvaanazvo.”
26 Ngokudaro iyena akatunhudzira eciti: “Umambo wa Mwari wakaezana no munhu anokusa mbeu.
27 Iyena anowata no usiku omuka comacibesi, uye mbeu inomera yokura—kunyazi iyena asikazvizii kuti zvaitika kudini.
28 Mataka pacawo anobara zvibereko padoko no padoko, pokutanga mbeu inomera, pedzepo panobuda tsangu dzitete, pokupedzesera tsangudzo dzinokora.
29 Asi tsangu padzinokora, iyena anodziceka no sikeya, ngokuti nguwa yo kukorora inonga yaguma.”
30 Uye akatunhudzira eciti: “Umambo wa Mwari tingauezanisa nei, kana kuti tingaupanganidza no muezaniso upi?
31 Wakaezana no tsangu yo mostardha, yokuti painosimwa inonga yakadodoka kupinda tsangu dzimweni dzese.
32 Asi mumasure me kusimwa, inokura yopinda zvirimwa zvese yogara muti no nhai dzikuru, zvokuti shiri dzo kudenga dzinouya dzoona pe kugara pa bvute rawo.”
33 No miezaniso dzakawanda dzakaita hinga idzi, iyena aiabvunza ngezve soko ra Mwari, dakara paikwaniswa kuzwisiswa no anhu.
34 Zvezvirokwazvo, apana caaiabvunza asikaseenzesi muezaniso, asi aipanganidzira afundi ake zvese ari oga.
35 Madekoni e zuwa irona, Djesu akabvunza afundi ake kuti: “Ngatibire kuenda n’ombera.”
36 Ngokudaro paakapedza kueneka anhu, afundi ake akamutora, oenda naye n’ombera ari mu mabharko.
37 Kakatanga kuitika dutu rakakura, uye mafungu aiponda bharko, zvekutoti bharko rainga raakutanga kudzara no mvura.
38 Asi Djesu ainga akawata sure ke bharko, akatsamira pa mutsago. Asi awona akamutsungudza eciti: “Mufundisi, amuripi kuona kuti taakuda kufa kani?”
39 Ngokudaro iyena akamuka, osumurura dutu uye akati ku bahari: “Shii, nyarara!” Uye dutu rakaima, zvese zvakaterama.
40 Hino iyena akaabvunzisa kuti: “Ngei muri kuthya kudaro? Amusati maano kutenda here?”
41 Asi awona akathya maningi, obvunzana pacawo eciti: “Mwanarume uu ndiani kamare? Wekuti kunyazi dutu no bahari zvinomuzwira.”
Masoko ari pasi
^ Kana kuti: “mugariro uno we zviro.” Onai pakazwi Kupanganidzwa ke Masoko.
^ Kana kuti: “citengu cokupima naco.”
