Akatarhwa na Marko 5:1-43
5 Akaguma n’ombera ko bahari ku mutanha we Agerasa.
2 Djesu paakandocita mu bharko, akasongana no mwanarume umweni wainga uno mwiya wakashata ecibva ngo ku makuwa.*
3 Iyena wairarama ku makuwa, asi dakara pa nguwa iyona, apana wakakwanisa kuita kuti arumbwe akasungwa, kunyazi no makorenti.
4 Iyena wainga wakambosungwa kakawanda no makorenti, mu mirenje uye mu nyara, asi waidadzura makorenti e mu nyara uye waigura-gura e mu mirenje; apana wainga uno simba kupinda iyena.
5 Nguwa dzese, usiku no masikati, iyena waikhuwa ku makuwa no mu matunhu, ecidziceka-ceka ngo mapuwe.
6 Asi paakaona Djesu nge cekure, mwanarume uya wakagogoma uye wakagodama pamberi pake.
7 Hino iyena wakakhuwa no izwi guru eciti: “Uri kudei na inini,* Djesu, Mwana wa Mwari we Kumusoro-soro? Pika na Mwari kuti auzonditambudzi.”
8 Ngokuti Djesu ainga aubvunza kuti: “Buda pa munhu uu, mwiya wakashata.”
9 Asi Djesu akaubvunzisa kuti: “Unozwi ani?” Iwona wakadaira kuti: “Ndinozwi cikwata, ngokuti takawanda.”
10 Uye wakadeketerera Djesu kuti asaidzingire mu nyikeyo.
11 Painga pano nguruwe dzakawanda dzaiushwa mu dunhu.
12 Ndiyo ndaa mwiyedzo dzakadeketera dzeciti: “Titumirei ku nguruwe, kuti tipinde madziri.”
13 Iyena akadzitendera. Ngokudaro, mwiya dzakashatedzo dzakabuda, dzopinda mu nguruwe, uye nguruwedzo dzakadzvika pa gwirindi dzombwerera mu bahari, dzinokwana kuita 2000 uye dzofiremo.
14 Asi aushi e nguruwe akatiza uye akaenda koozvipanganidzira ku anhu e mu thaundi no e mu nharaunda, uye awona akaenda koona zvainga zvaitika.
15 Hino akakhwedera kuna Djesu uye akaona mwanarume uya wainga uno cikwata ce madhimoni, wakagara, wakapfeka uye wainga waa munhu kwaye, awona akathya.
16 Uyezve, aya ainga azviona akapanganidza zvainga zvaitika no mwanarume wainga uno madhimoni uye ku nguruwe.
17 Ngokudaro akadeketerera Djesu kuti abude mu mutanha iwona.
18 Djesu paakapakira mu bharko, mwanarume uya wainga uno madhimoni wakakumbira kuti aende naye.
19 Asi Djesu aazi kumutendera, asi akamubvunza kuti: “Enda kumba ku anyaukama ako, uye apanganidzire zvese zvawaizirhwa na Djehovha* no usisi waakupangidzira.”
20 Mwanarume uya wakaenda uye wakatanga kuziisa mu Dhekapori* zvese zvaakaizirhwa na Djesu, uye anhu ese akashamiswa.
21 Djesu paakabirazve n’ombera no bharko, anhu akawanda akamuunganira, uye iyena ainga ari mu muceto me bahari.
22 Pakaguma mutungamiriri we sinagoga, waizwi Djairosi, uye paakamuona, wakagodama pamberi pe tsoka dza Djesu.
23 Iyena wakamudeketerera kakawanda, eciti: “Mwana wangu we mwanakadzi uri kurhwara maningi.* Ndapota uyai mutsanzike nyara dzenyu paari kuti iyena atambe uye ararame.”
24 Ngokudaro Djesu akaenda naye, uye anhu akawanda aimuteera ecimutsikirira.
25 Uye painga pano mwanakadzi umweni wakapedza makore 12 ecitambudzika no nhenda ye kubuda ngazi.
26 Iyena wakatambudzika maningi mu nyara dze arapi akawanda uye wainga wapedza zvese zvaainga anazvo, asi aazi kutamba, pane kudaro, wakatobambirira.
27 Paakazwa ngezva Djesu, iyena wakamukhwederera nge sure pakadzara anhu uye wakapsvasa djira rake,
28 ngokuti waiti: “Kana ndikandopsvasa djira rake, ndicatamba.”
29 Uye ciriporipoco nhenda yake ye kubuda ngazi yakapera, uye iyena wakazwa kuti wainga waporeswa pa nhenda iya yakashatisisa.
30 Uye ciriporipoco Djesu akazwa kuti simba rainga rabuda maari, iyena akaringira sure kuno anhu uye akabvunzisa kuti: “Ndiani wapsvasa djira rangu?”
31 Afundi ake akamubvunza kuti: “Tenzi muri kuona kuti anhu ari kumutsikirirai, hino mungabvunzisadi kamare kuti, ‘ndiani wamupsvasai?’”
32 Asi, iyena airingira-ringira kuti aone kuti ndiani wainga waita izvona.
33 Mwanakadzi uya, ecitetemera ngo kuthya, uye eciziya kuti wainga waporeswa, wakamukhwederera womuhwararira uye wakamubvunza zvese.
34 Djesu akati kaari: “Mwanangu, kutenda kako kakuporesa. Enda mu runyararo, uye poreswa pa nhenda yako yakashatisisa.”
35 Paainga ecireketa, anhu amweni ecibva kumba ke mutungamiriri we sinagoga akaguma omubvunza kuti: “Mwana wenyu wafa! Muciri kunetserei henyu mufundisi?”
36 Asi Djesu akazwa masoko awo uye akati ku mutungamiriri we sinagoga: “Usathye, iwewe tenda basi.”
37 Apana amweni aakatendera kuenda naye kunza ka Pedru, Tiyago na Juau hama ya Tiyago.
38 Ngokudaro awona akaguma pa nyumba pe mutungamiriri we sinagoga, uye Djesu akaona anhu ecicema no kukhuwa no izwi guru.
39 Mumasure me kupinda, iyena akati: “Ngei muri kucema, mecikhuwa kudai? Musikana uu aazi kufa, asi uri kuwata.”
40 Awona akatanga kumuseka. Asi mumasure me kubhuya kuti ese abude, Djesu akatora baba na mai o musikanewo pamwepo no aya aainga anawo, oenda kainga kakaradzikwa musikana uya.
41 Hino akabata nyara yo musikanewo, uye akati: “Tarita kumi,” zvecida kureya kuti: “Musikana ndinoti kauri, ‘muka!’”
42 Uye ciriporipoco musikanewo wakamuka wotanga kuhamba. (Iyena wainga uno makore 12.) Nge ndaa yazvo awona aazi kukwanisa kudzibata ngo mupfaro waaizwa.
43 Asi Djesu aiphinda eciphindazve eciabvunza kuti asabvunze amweni nge zviya zvaitika, uye akaabvunza kuti apase musikanewo zvokurhya.
Masoko ari pasi
^ Kana kuti: “makuwa e anoedzurirhwa.”
^ Kana kuti: “Ndinei newe.”
^ Onai Apendi. A5.
^ Kana kuti: “Mutanha we Mathaundi Gumi.”
^ Kana kuti: “waakufa.”
