Akatarhwa na Marko 6:1-56
6 Iyena akabuda ipona opinda mu thaundi rake,* uye afundi ake akamuteera.
2 Parakaguma zuwa ro Sabudu, iyena akatanga kufundisa mu sinagoga, uye aya aimuzwa akashamiswa uye akatanga kuti: “Munhu uu wakazvionerepi zviro izvi? Ngei iyena wakapaswa ungwaru uu, uye ngei mabasa aya e simba ari kuizwa no nyara dzake?
3 Uu andiepi here mutsetsi we matabwa,* mai ake andiopi Mariya, uye hama dzake andidzopi Tiyago, Zuzee, Simoni na Djudha? Uye madziyaya ake andiopi atinawo pano here? Ngokudaro akatanga kukuhunyika nge ndaa yake.
4 Asi Djesu akaabvunza kuti: “Muphorofita aareremedzwi mu nharaunda yake, pakati pe anyaukama ake no e pamuzi pake.”
5 Uye aazi kuita zvishamiso imona kunza ke kutsanzikira nyara anhu anganani airhwara kuti aaporese.
6 Zvezvirokwazvo, iyena akashamiswa ngo kutama kutenda kawo. Uye akahamba mu nharaunda no nharaunda, ecifundisa.
7 Iyena akadainza afundi 12 oatuma ari airi airi, uye akaapasa simba pamusoro pe mwiya yakashata.
8 Uyezve, akaabvunza kuti asatore ciro pa rhwendo rawo kunza ke ndonga imwe basi—kana pau, kana cibudu ce kukandira zvekurhya, kana mare mu mabhande e kukandira mare*—
9 asi akaabvunza kuti apfeke masandarya uye kuti asatore macira amweni.
10 Akatizve kaari: “Pa nyumba yese yamunoguma, garai ipona dakara mabuda pa mbuto iyona.
11 Uye mbuto yese isina munhu anomutambirai kana kumupurutanai, pamunobuda ipona, gugudzai bukuta riri pasi pe tsoka dzenyu hinga upupuri kaari.”
12 Ngokudaro akaenda uye akaparidzira kuti anhu aidikana kucinyuka,
13 awona aidzingira madhimoni akawanda uye aidzodza mafuta anhu akawanda airhwara eciaporesa.
14 Mambo Herodhi akazwa nge zvazvo, ngokuti zina ra Djesu rainga razikanwa maningi, uye anhu aiti: “Juau Mubhabhatidzi wamutswa kubva ku akafa, ndiyo ndaa uri kuita mabasa anoshamisa.”
15 Asi amweni aiti: “Ndi Eriya.” Uye amweniwo aiti: “Ndi muphorofita hinga umwe we aphorofita e kare.”
16 Asi paakazvizwa, Herodhi wakati: “Juau uya wandakagura musoro, wamutswa ku akafa.”
17 Zvezvirokwazvo Herodhi wainga wabata Juau womusunga womukanda mu kadheya nge ndaa ya Herodhiya, mukadzi we hama yake inozwi Firipi, ngokuti wainga wamutora kuti agare mukadzi wake.
18 Ngokuti Juau waiti kuna Herodhi: “Amutenderhwi kuti mugare no mukadzi we hama yenyu.”
19 Nge ndaa yazvo, Herodhiya wakacengetera bundu Juau uye waida kumuuraya, asi wainga asikakwanisi kuzviita.
20 Ngokuti Herodhi waithya Juau, eciziya kuti iyena wainga ari munhu munatsi uye wainamata Mwari, ndiyo ndaa waitomudziirira. Pese paaimuzwa, waipera mazano asikazii kuti woitei, kunyazi zvakadaro waimupurutana ecipfara.
21 Herodhiya wakazoona mukana wakanaka pa mabiko e kupemberera zuwa rakabarhwa Herodhi. Herodhi wakapika pa mabiko ake anhu ano zvigaro zvakakwirira, atungamiriri e masurudado no atungamiriri e Garireya.
22 Mwana we mwanakadzi wa Herodhiya wakapinda wotamba, wodakadza Herodhi no anhu aairhya nawo. Mambo wakati ku musikanewo: “Ndikumbire caunoda uye ndicakupasa.”
23 Wakatopika eciti: “Ndicakupasa cese caunondikumbira, kunyazi hafu ye umambo wangu.”
24 Hino iyena wakabuda woenda koobvunzisa mai ake kuti: “Ndokumbirei?” Awona akamudaira kuti: “Musoro wa Juau Mubhabhatidzi.”
25 Musikanewo wakagogoma woenda kuna mambo woita cikumbiro cake, eciti: “Ndinoda kuti mundipase nokukasika musoro wa Juau Mubhabhatidzi mu parato.”
26 Kunyazi zvakamutsukwarisa maningi, mambo aazi kumurambira cikumbiro cake, nge ndaa ye kupika kaakaita no anhu aairhya nawo.
27 Ngokudaro, mambo wakatuma nokukasika musurudado kuti aunzise musoro wa Juau. Hino iyena wakaenda wogura musoro wa Juau mu kadheya,
28 iyena wakaunzisa musoro mu parato woupasa musikana uye musikanewo wakaupasa mai ake.
29 Afundi ake paakazvizwa, akauya otora mutumbi wake oenda koukotsa mu guwa.*
30 Aphostori akaungana painga pana Djesu uye akamubvunza zviro zvese zvaainga aita no kufundisa.
31 Uye Djesu akaabvunza kuti: “Ambai, ngatiende ku mbuto isina anhu kuti timbozorore padoko.” Ngokuti painga pano anhu akawanda aiuya ecienda, uye awona ainga asina mukana kunyazi we kurhya.
32 Ndiyo ndaa akakwira mu bharko oenda ku mbuto isina anhu kuti agare oga.
33 Asi anhu akaaona ecienda uye zvakazikanwa no anhu akawanda, anhu e mathaundi ese akaendeyo ecigogoma uye awona ndiwo akatanga kugumeyo.
34 Paakacita mu bharko, iyena akaona anhu akawanda uye akaazwira usisi, ngokuti ainga akaita hinga mabira asina muushi. Uye akatanga kuafundisa zviro zvakawanda.
35 Kainga kaakudoka uye afundi akamukhwederera omubvunza kuti: “Mbuto ino iri kure no kunogara anhu uye kaakudoka.
36 Abvunzei kuti aende mu nharaunda dziri padhuze kuti adzitengere zvokurhya.”
37 Iyena akaabvunza kuti: “Apasei imwimwi zvokurhya.” Awona akamubvunzisa kuti: “Tinodikana kuenda kootenga pau dze mutengo we madhenariyo* 200 uye todzipasa anhu kuti arhye?”
38 Iyena akati kaari: “Muno pau ngana? Endai koona!” Paakapedza kuona, akati: “Pau shanu, no howe mbiri.”
39 Iyena akabvunza anhu ese kuti aite zvikwata uye agare pa shango rakasvipirira.
40 Ngokudaro awona akagara pasi mu zvikwata zvakawanda zve 100 uye 50.
41 Hino akatora pau shanu no howe mbiri uye akaringira kudenga oita munamato. Akagura-gura pau odzipasa afundi ake uye afundi ake akadzipasa anhu, uyezve akagura-gura howe mbiri odzipasa anhu.
42 Ngokudaro ese akarhya oguta,
43 uye akaunganidza zvitengu 12 zve matimbu e pau ainga asara, pasikabatanidzwi howe dzainga dzasara.
44 Aya akarhya pau aikwana kuita anarume 5000.
45 Nokukasika, iyena akabvunza afundi kuti akwire bharko ngokuti iyena aida kuti atungamire kuenda n’ombera dhuze no Bhetisaidha, pedzepo iyena akasara ecieneka anhu.
46 Asi mumasure mekuaeneka, iyena akaenda mu dunhu kooita munamato.
47 Zuwa parakadoka, bharko rainga riri pakati pe bahari, asi iyena ainga asara ega mu dunhu.
48 Paakaona kuti awona ainga ari kushuphirhwa kucapa bharko, ngokuti aienda kwaibva mhepo, iyena akaenda kaari kwaakuda kuedza,* ecihamba pamusoro pe mvura; asi aiita hingana kuti ari kuda kuapindirira.
49 Paakamuona ecihamba pamusoro pe mvura, afundi ake akarangarira kuti: “Amunhupi uwo!” Uye akatanga kukhuwa,
50 ngokuti awona akamuona uye akapatika. Asi iyena akaabvunza kuti: “Shingai! Ndini; musathye.”
51 Iyena akakwira mu bharko mainga muno afundi, uye mhepo yakaima. Ngokudaro awona akashamisika maningi,
52 ngokuti awona ainga asikazwisisi zvaida kureya cishamiso ce pau, asi mwoyo yawo yakarumbwa isikazwisisi.
53 Paakabira, akaguma ku Genezareti uye akasungira bharko ikona.
54 Asi paakandocita mu bharko, anhu akamuziya.
55 Awona akapedza nharaunda yese ecitora uye eciunzisa anhu ari kurhwara ari pa makha, awona aienda kwese kaaizwa kuti Djesu ari kakati.
56 Uye pese paaipinda mu nharaunda, mu mathaundi uye mu mitanha awona aikanda anorhwara mu mabazari,* uye aimudeketerera kuti andobate basi zviusaru zve macira ake. Uye ese aizvibata aiporeswa.
Masoko ari pasi
^ Kana kuti: “nyika yake.”
^ Kana kuti: “karpintero.”
^ Cigrego: “kobre.”
^ Kana kuti: “mu guwa re anoedzurirhwa.”
^ Onai Apendi. B14.
^ Nguwa ii inotangira kuma 3 dze usiku dakara kuma 6 dze macibesi.
^ Kana kuti: “mbuto yaiungana anhu akawanda.”
