Akatarhwa na Marko 8:1-38
8 Pa mazuwa awona, pakaunganazve anhu akawanda, uye awona ainga asina zviro zvokurhya. Hino Djesu akadainza afundi ake, oabvunza kuti:
2 “Ndiri kuzwira usisi anhu aya, ngokuti aaneni ke mazuwa matatu uye awona aana ciro kuti arhye.
3 Kana ndikaabvunza kuti aende kumba no nzara, acakomoka mu gwanza, uye amweni awo abva kure.”
4 Asi afundi ake akamudaira kuti: “Munhu angaonerepi pau dzinokwana kuti anhu ese aya agute ku mbuto ino isina anhu?”
5 Ngokudaro Djesu akaabvunzisa kuti: “Imwimwi muno pau ngana? Awona akati: “Pau 7.”
6 Uye akabvunza anhu kuti agare pasi. Hino akatora pau 7, akaita munamato, odzigura-gura, opasa afundi ake kuti adzipase anhu, uye awona akaapasa.
7 Uyezve awona ainga ano zvihowe zvinganani, Djesu akaitazve munamato, uye akabvunza afundi kuti azvipasezve anhu.
8 Ngokudaro awona akarhya oguta, uye akaunganidza matimbu ainga asara odzadza zvitengu 7 zvakakura.
9 Painga pano anarume anokwana kuita 4000. Pedzepo iyena akaabvunza kuti aende.
10 Iyena akakwira mu bharko nokukasika no afundi ake uye akaguma mu mutanha we Dharimanuta.
11 Kweneyo Afarisi akauya uye akatanga kumuitira hasha, ecimukumbira cipangidzo cinobva kudenga, kuitira kuti amuedze.
12 Ngokudaro iyena akafemeruka uye akati: “Ngei mubarirhwana uu wecipsvaka cipangidzo? Zvezvirokwazvo ndinoti, apana cipangidzo cicapaswa mubarirhwana uu.”
13 Hino, iyena akaasiya, akakwirazve bharko uye oenda n’ombera.
14 Asi, afundi akakanganwa kutora pau, uye awona ainga asina cimweni cokurhya mu bharko kunza ke pau imwe basi.
15 Uye iyena akanyasa kuangwadza kuti: “Rumbwai makadjenga, ngwarirai mbiriso yo Afarisi no ya Herodhi.”
16 Ngokudaro awona akatanga kureketedzana ngokuti ainga asikazi kutora pau.
17 Paakazvizwa, iyena akaabvunzisa kuti: “Ngei muri kureketedzana nge ndaa yekuti amuzi kuunzisa pau? Amusati mazvibata uye amusati mazwisisa here? Mwoyo yenyu icakafungika pa kuzwisisa here?
18 ‘Kunyazi muno madziso, amuoni here; uye kunyazi muno nzee, amuzwi here? Makanganwa
19 kuti makaunganidza zvitengu zvingana no matimbu ainga asara, pandakagura-gura pau 5 kuti anarume 5000 arhye?” Awona akadaira kuti: “12.”
20 “Uye pandakagura-gura pau 7 kuti anarume 4000 arhye, makaunganidza zvitengu zvikuru zvingana zve matimbu e pau?” Awona akadaira kuti: “7.”
21 Hino Djesu akaabvunza kuti: “Imwimwi amusati maakuzwisisa here?”
22 Awona akazoguma ku Bhetisaidha. Kweneyo akamuunzisira mwanarume wainga ari bofu, uye akadeketerera Djesu kuti amupsvase.
23 Uye iyena akabata nyara yo mwanarume uya wainga ari bofu uye akaenda naye kunza ke mutanha. Mumasure me kumupfirira mu madziso ake, akamubata uye akamubvunzisa kuti: “Pane cauri kuona here?”
24 Mwanarumewo wakaringira kudenga uye wakati: “Ndiri kuona anhu, asi ari kuita hingana miti iri kuhamba-hamba.”
25 Djesu akabatazve madziso e mwanarumewo, uye iyena wakatanga kuona zvakanaka. Madziso ake akaporeswa, uye iyena wakanyasa kuona zvese zvakanaka.
26 Hino Djesu akamubvunza kuti aende kumba, asi akamuti: “Usapinde nge mu mutanha uu.”
27 Djesu no afundi ake akaenda ku mitanha ye Sezareya yo Firipi, uye mugwanza, iyena akabvunzisa afundi ake kuti: “Anhu ari kuti ndini ani?”
28 Akamudaira eciti: “Juau Mubhabhatidzi, asi amweni anoti ndimwi Eriya uye amweniwo anoti umwe we aphorofita.”
29 Iyena akaabvunzisa kuti: “Kuzotiwo imwimwi, munoti ndini ani?” Pedru wakamudaira kuti: “Ndimwi Kristu.”
30 Ngokudaro, iyena akaabvunza kuti asabvunze munhu upi hake nge zvazvo.
31 Uyezve, akatanga kuafundisa kuti Mwana we munhu anodikana kusongana no matambudziko akawanda, orambwa no akuru, no atungamiriri e apristi, no atari, ouraiwa uye ozomutswa mumasure me mazuwa matatu.
32 Iyena akabhuya masoko aya pamhene kamare. Asi Pedru wakaenda naye pake ega, otanga kumusumurura.
33 Ngokudaro iyena akamufuratira, oringira afundi ake, uye akasumurura Pedru eciti: “Enda sure kangu, Sathani! Ngokuti auna marangariro a Mwari, asi uno marangariro e anhu.”
34 Djesu akadainza anhu pamwepo no afundi ake uye akati kaari: “Kana munhu ecida kunditeera, ngaadzirambe, atore mutanda wake we kutambudzikira* uye arumbwe ecinditeera.
35 Ngokuti munhu wese anoda kuponesa upenyu* wake anozouruza, asi uya anoruza upenyu* wake nge ndaa yangu uye nge ndaa ye masoko akanaka anozouona.
36 Zvezvirokwazvo zvinobetserei ku munhu kuona zviro zvese zve nyika oruza upenyu* wake?
37 Munhu angapei kamare kuti asaruze upenyu* wake?
38 Ngokuti munhu wese anopsveruka nge ndaa yangu uye nge ndaa ye masoko angu pakati pe mubarirhwana uu we upombwe* uye unoshaisha, Mwana we munhu acamupsverukirawo paacauya mu rukudzo ra Baba ake no ngirozi dzicena.”
Masoko ari pasi
^ Onai pakazwi Kupanganidzwa ke Masoko.
^ Kana kuti: “mwiya.”
^ Kana kuti: “mwiya.”
^ Kana kuti: “mwiya.”
^ Kana kuti: “mwiya.”
^ Kana kuti: “mubarirhwana uu usikazwiri.”
