Mateu 11:1-30
11 Djesu paakapedza kupasa nhungamiriro afundi ake 12, akaenda koofundisa no kuparidza mu maguta awo.
2 Asi Juau paainga ari mukaraboso, wakazwa nge zve mabasa a Kristu uye iyena wakatuma afundi ake
3 kuti amubvunzise kuti: “Ndimwi Anozouya, kana kuti tinodikana kuetsera umweni?”
4 Djesu akaadaira kuti: “Endai koobvunza Juau zvamuri kuzwa no kuona:
5 Mapofu aakuona, akaremara aakuhamba, ano mapere ari kuraphwa, asikazwi aakuzwa, akafa ari kumutswa uye arombo ari kuziiswa masoko akanaka.
6 Anopfara uya asikakuhunyiki nge ndaa yangu.”
7 Paainga ecienda, Djesu akatanga kubvunza anhu nge zva Juau eciti: “Makaenda koonei ku renje? Gonje raizungunuswa no mhepo here?
8 Hino makaenda koonei? Munhu wakapfeka macira akanakisisa here? Ngokuti aya anopfeka macira akanakisisa, ari mu nyumba dze madzimambo.
9 Makaenda kooitei ikona? Koona muphorofita here? Honde, ndinomubvunzai kuti iyena unotodarika muphorofita.
10 Uu ndiye wakatarhwa nge zvake kuti: ‘Ona, ndiri kutuma mutumwa wangu, ucazogadzirira gwanza pamberi pako!’
11 Zvirokwazvo ndinomubvunzai kuti, pakati pe anhu akabarhwa nge anakadzi, apazi kubuda munhu mukuru anopinda Juau Mubhabhatidzi, asi munhu mudoko mu Umambo we kudenga, mukuru kupinda iyena.
12 Kubvira mu mazuwa a Juau Mubhabhatidzi dakara zvino, Umambo we kudenga ndiwona uri kupsvakisiswa no anhu, asi aya anopeta masimba, ndiwo anouona.
13 Ngokuti Aphorofita ese uye Mutemo, akaphorofita dakara pana Juau;
14 uye kana mecida kuzvitendera, iyena ndiye Eriya anodikana kuuya.’
15 Ano nzee ngaazwe.
16 “Mubarirhwana uu ndingauezanisa naani? Wakaita hinga ana adoko akagara pa bazari ecidainzira adoni awo,
17 eciti: ‘Takamuridzirai mutoriro, asi imwimwi amuzi kutamba; isusu takamuridzirai ngoma dze mariro, asi imwimwi amuzi kupangidza kutsukwara kenyu.’
18 Ngo mushobo umwewo, Juau wakauya asikarhyi kana kumwa, asi anhu anoti, ‘Iyena ano dhimoni.’
19 Mwana we munhu akauya ecirhya no kumwa, asi awona anoti, ‘Onai! Munhu uu anorhyisa uye anomwisa vhinyu, shamwari yo arongosi e musoho no ashaishi.’ Asi ungwaru unopangidza kuti wakanaka nge mabasa awo.”
20 Iyena akatanga kusumurura maguta aakaitira mabasa ake akawanda anoshamisa, ngokuti awona ainga asikazi kucinyuka:
21 “Une nyathwa iwewe Korazini! Une nyathwa iwewe Bhetisaidha! Ngokuti kudai mabasa anoshamisa akaitika mamuri ainga aitika ku Tiro no Sidhoni, maguta aya angadai akacinyuka kare-kare, opfeka masakhu, odzora marota.
22 Asi ndinoti kamuri, zvicaitika ku Tiro no Sidhoni pa zuwa ro kutongwa, zviri nani pane zvicaitika kamuri.
23 Uye iwewe Kafarnau, uri kuti ucakwidziridzwa kudenga here? Ucaenda mu Guwa;* ngokuti dai mabasa anoshamisa akaitika mauri ainga akaizwa mu Sodhoma, ringadai riciripo na nyamasi uno.
24 Asi ndinoti kamuri, zvicaitika ku nyika yo Sodhoma pa zuwa ro kutongwa, zviri nani pane zvicaitika kauri.”
25 Hino, pa nguwa iyona Djesu akati: “Ndinomukudzai pamberi pe anhu Baba, Tenzi we denga ne nyika, ngokuti zviro izvi amuzi kuzvipangidza ku anhu ano uzii no akangwara, asi makazvipangidza ku ana adoko.
26 Honde Baba, ngokuti ndiwona maitiro amunoda.
27 Zviro zvese ndakazvipaswa ndi Baba angu, akuna anonyasa kuziya Mwana asiripi Baba; uye akuna anonyasa kuziya Baba asiripi Mwana. Kudai Mwana asikadi kufundisa anhu nge zva Baba ake, apana anganyasa kuaziya.
28 Uyai kandiri mwese imwimwi muri kuseenza no simba no kuremerhwa, uye inini ndicamuzorodzai.
29 Thwarai djoki rangu, uye fundai na inini, ngokuti inini ndiri munhu wakapfawa uye ndino mwoyo unodzidodosa. Mukadaro, imwimwi mucazorodzwa.
30 Ngokuti djoki rangu riri nyore kuthwara, uye mutoro wangu wakareruka.”
Masoko ari pasi
^ Kana kuti: “Hadhesi,” kufa kunoita anhu ese. Onai pakazwi Kupanganidzwa ke Masoko.
