Akatarhwa na Mateu 15:1-39
15 Hino, Afarisi amweni no atari aibva ku Djerusarema, akaenda kuna Djesu eciti:
2 “Ngei afundi ako aateereri tsika dzo anhu e kare? Hinga muezaniso, aakarawi nyara* dzawo kana ecida kurhya.”
3 Iyena akaadaira kuti: “Ngei imwimwi musikateereri mutemo wa Mwari nge ndaa ye tsika dzenyu?
4 Hinga muezaniso, Mwari akati: ‘Reremedza baba na mai ako,’ uye: ‘Uya anotuka baba ake na mai ake ngaauraiwe.’
5 Asi imwimwi munoti: ‘Uya anobvunza baba ake na mai ake kuti: “Ciro cese candinaco caizomubetserai, ndi cipo cakapaswa Mwari,”
6 iyena aacadikanizve kukudza baba ake.’ Ngokudaro, imwimwi munoita kuti soko ra Mwari ritame kuseenza nge ndaa ye tsika dzenyu.
7 Imwi acengedzi, Isaya wakanyasa kuphorofita nge zvenyu paakati:
8 ‘Anhu aya anondikudza no miromo yawo, asi mwoyo yawo iri kure na inini.
9 Anorumbwa ecindinamata pasina, ngokuti anofundisa mitemo yo anhu basi.’”
10 Paakapedza kureketa izvi, akadainza anhu kuti akhwedere dhuze naye, oabvunza kuti: “Purutanai munyase kuzwisisa izvi:
11 Zvinopinda nge pamuromo we munhu andizvopi zvinomusvipisa, asi zviya zvinobuda nge pa muromo pake ndizvo zvinomusvipisa.”
12 Afundi akauya koomubvunza kuti: “Munozviziya kuti Afarisi akuhunyika ngo kuzwa zvamareketa here?”
13 Djesu akadaira kuti: “Muti wese usikazi kusimwa na Baba angu e kudenga, unozobvithwa.
14 Arekerei. Awona mapofu ari kusesedza amweni. Kana bofu rikasesedza bofu doni, ese anombwerera murindi.”
15 Pedru wakadaira kuti: “Tipanganidzirei muezaniso uu.”
16 Djesu akati: “Imwimwiwo amusati mazvizwisisa kani?
17 Amuzvizii here kuti zvese zvinopinda nge pa muromo, zvinoenda mu ndani, pedzepo zvoenda mu cimbudzi?
18 Asi zviro zvese zvinobuda mu muromo zvinobva mu mwoyo, uye zviro izvi ndizvo zvinosvipisa munhu.
19 Hinga muezaniso, mu mwoyo munobuda marangariro akashata: Kuuraya, upombwe, uhure,* umbavha, upupuri we manyepo, no kutuka.
20 Zviro izvi ndizvona zvinosvipisa munhu; asi kurhya usikazi kukarawa nyara,* azvisvipisi munhu.”
21 Paakabva ikona, Djesu akaenda ku mutanha we Tiro no Sidhoni.
22 Mwanakadzi umweni we ku Fenisiya waigara mu nharaundemo, wakakhwedera kaari ecikhuwa kuti: “Ndizwireiwo usisi, Tenzi, Mwana wa Dhavhidhi. Mwana wangu wo mwanakadzi ano dhimoni riri kumutambudza maningi.”
23 Asi aazi kumudaira kunyazi soko rimwe haro. Hino, afundi ake akauya omubvunza kuti: “Mubvunzei kuti aende, ngokuti ari kurumbwa ecititeera ecitikhuira.”
24 Iyena akadaira kuti: “Ndakatumirhwa basi ku mabira akapsveteka e nyumba ya Israeri.”
25 Asi mwanakadziwo wakauya womuhwararira, eciti: “Tenzi, ndibetserei!”
26 Djesu akamudaira kuti: “Azvizi kunaka kutora pau yo ana adoko kakuikhandirira zvituhwa.”
27 Mwanakadziwo wakati: “Honde Tenzi, asi zvituhwa zvinorhya matsekedeswa anombwera pa meza yo aridzi azvo.”
28 Djesu akamudaira kuti: “Mwanakadzi, kutenda kako kakakura maningi; ngazviitike maererano no zvaunoda.” Uye mwana wake wakatamba kubvira pa nguwa iyona.
29 Pedzepo, Djesu akaguma dhuze no bahari ro Garireya, uye akakwira pa dunhu, ogara pasi.
30 Anhu akawanda akaguma kaari, ecimuunzira anhu aikhabinya, akaremara, mapofu, zvimumu, no amweniwo akawanda, uye akaakanda pa tsoka dzake, uye iyena aiaporesa.
31 Ngokudaro, anhu akashamiswa ngo kuona zvimumu zvecireketa, akaremara ecitamba, aikhabinya ecihamba zvakanaka, uye mapofu eciona, ese aikudza Mwari wa Israeri.
32 Asi Djesu akadainza afundi ake uye akati: “Ndiri kuzwira usisi anhu aya, ngokuti aaneni ke mazuwa matatu, uye awona aana ciro kuti arhye. Inini andidi kuabvunza kuti aende no nzara, ngokuti angazokomoka mu gwanza.”
33 Asi afundi akati kaari: “Pau dzinokwana anhu akawanda kudai tingadzionerepi mu mbuto ino iri kure no kunogara anhu?”
34 Djesu akaabvunzisa kuti: “Imwimwi muno pau ngana?” Awona akati: “Pau 7, no zvihowe zvinganani.”
35 Hino, mumasure mekubvunza anhu kuti agare pasi,
36 Djesu akatora pau 7 no howe dziya, mumasure mekuita munamato, akagura-gura opasa afundi ake, uye afundi ake akazvipasa anhu.
37 Uye ese akarhya oguta, uye akaunganidza matimbu ainga asara, odzadza zvitengu 7 zvakakura.*
38 Aya akarhya aikwana kuita anarume 4000, pasikaerengwi anakadzi no ana adoko.
39 Akazobvunza anhu kuti aende kumba. Pedzepo, akakwira bharko, oguma mu nharaunda yo Magadhani.
Masoko ari pasi
^ Izvi zvainga zvisikadi kureya kuti awona airhya no nyara dzakasvipa, asi anga asikakarawi nyara maererano no tsika dze adjudha.
^ Soko iri mu Cigrego rinozwi porneía. Onai pakazwi Kupanganidzwa ke Masoko.
^ Izvi zvainga zvisikadi kureya kuti awona airhya no nyara dzakasvipa, asi anga asikakarawi nyara maererano no tsika dze adjudha.
^ Kana kuti: “zvitengu zve kukandira zvekurhya.”
