Akatarhwa na Mateu 16:1-28
16 Kweneyo, Afarisi no Asadhusi akamukhwederera, uye ecida kumuedza, akamukumbira kuti aapangidze cipangidzo cinobva kudenga.
2 Djesu akaadaira kuti: “Zuwa rikadoka, imwimwi munoti: ‘Mangwana kucaedza zvakanaka, ngokuti kudenga kakapsvukirira,’
3 uye comacibesi munoti: ‘Kunza kucatonhora, uye kucanaya, ngokuti kudenga kakapsvukirira uye kuno makuta.’ Imwimwi munokwanisa kududzira magariro ekunza, asi amukwanisi kududzira zvipangidzo zve nguwa.
4 Mubarirhwana wakashata uye usikazwiri Mwari,* uwona unorumbwa wecipsvaka cipangidzo, asi akuna cipangidzo caucapaswa, kunza ke cipangidzo ca Djona.” Ngokudaro, Djesu akaasiya oenda.
5 Afundi akabira ku n’ombera, asi akakanganwa kutora pau.
6 Djesu akati kaari: “Rumbwai makadjenga uye ngwarirai mbiriso yo Afarisi no Asadhusi.”
7 Hino, awona akatanga kubvunzana pacawo eciti: “Atizi kuunzisa pau.”
8 Paakaziya izvi, Djesu akati: “Imwi anhu ano kutenda kudoko, ngei muri kucedza ngezve kuti amuzi kuunzisa pau?
9 Amusati mazvizwisisa here, makanganwa pandakagutisa anhu 5000 no pau 5? Makaunganidza zvitengu zvingana?
10 Kana kuti makanganwa pandakagutisa anhu 4000 no pau 7? Makaunganidza zvitengu zvikuru* zvingana?
11 Hino, ngei amuripi kuzwisisa kuti andiripi kubhuya ngezve pau? Inini ndamubvunzai kuti mungwarire mbiriso yo Afarisi no Asadhusi.”
12 Ndipo paakazwisisa kuti iyena ainga asiripi kureketa ngezve kungwarira mbiriso yo pau, asi angwarire fundiso ye Afarisi no Asadhusi.
13 Paakaguma ku mutanha we Sezareya yo Firipi, Djesu akabvunzisa afundi ake kuti: “Anhu ari kuti Mwana we munhu ndiani?”
14 Awona akati: “Amweni anoti ndi Juau Mubhabhatidzi, amweni Eriya, amweniwo anoti Djeremiya, kana umwe we aphorofita.”
15 Iyena akaabvunzisa kuti: “Kuzotiwo imwimwi, munoti ndini ani?”
16 Simoni Pedru wakamudaira kuti: “Ndimwi Kristu, Mwana wa Mwari mupenyu.”
17 Djesu akamudaira kuti: “Unopfara iwewe Simoni mwana wa Djona, ngokuti izvi auzi kuzvibvunzwa no munhu,* asi wazvibvunzwa na Baba angu e kudenga.
18 Ndinokubvunzazve kuti: Ndiwe Pedru, uye pamusoro pe buwe iri, ndinozowakirepo ungano yangu, uye simba re Rufu,* arizoinyisi.
19 Inini ndicakupasa mashavhi e Umambo we kudenga, uye zvese zvaunonga wasunga pa nyika, zvinonga zvatosungwa kudenga, uye zvese zvaunonga wasunungura pa nyika, zvinonga zvatosunungurhwawo kudenga.”
20 Hino, iyena akabvunza afundi ake kuti asabvunze munhu kuti iyena ndiye Kristu.
21 Kubvira pa zuwa irona kuenda mberi, Djesu akatanga kubvunza afundi ake kuti aidikana kuenda ku Djerusarema, kuti atambudzwe ngo mishobo yakasiyana-siyana no akuru, atungamiriri e apristi, no atari. Iyena aizouraiwa uye ozomutswa pa zuwa rocitatu.
22 Nge ndaa yazvo, Pedru wakaenda naye pake ega wotanga kumusumurura eciti: “Dzizwirei usisi Tenzi; izvi azvizomboitiki kamuri.”
23 Asi iyena akamufuratira, uye akati kuna Pedru: “Enda sure kangu, Sathani! Iwewe uri buwe rinokuhunyisa kandiri, ngokuti auna marangariro a Mwari, asi uno marangariro e anhu.”
24 Djesu akati ku afundi ake: “Kana munhu ecida kunditeera, ngaadzirambe, atore mutanda wake wekutambudzikira,* uye arumbwe ecinditeera.
25 Ngokuti munhu wese anoda kuponesa upenyu* wake acauruza, asi uya anoruza upenyu* wake nge ndaa yangu, acauona.
26 Zvezvirokwazvo zvinobetserei ku munhu, kuona zviro zvese zve nyika, oruza upenyu* wake? Kana kuti, munhu angapei kuti asaruze upenyu* wake?
27 Ngokuti Mwana we munhu acauya ari mu rukudzo ra Baba ake ano ngirozi dzake, uye acahwirinzira ku munhu umwe na umwe maererano no zviito zvake.
28 Ndinomubvunzai zvirokwazvo kuti, amweni enyu ari pano aazofi asati aona Mwana we munhu eciuya mu Umambo wake.”
Masoko ari pasi
^ Kana kuti: “unoita upombwe.”
^ Kana kuti: “zvitengu zve kukandira zvekurhya.”
^ Cigrego: “nyama no ngazi.”
^ Cigrego: “misuwo yo guwa.”
^ Onai pakazwi Kupanganidzwa ke Masoko.
^ Kana kuti: “mwiya.”
^ Kana kuti: “mwiya.”
^ Kana kuti: “mwiya.”
^ Kana kuti: “mwiya.”
