Akatarhwa na Mateu 17:1-27
17 Mumasure me mazuwa 6, Djesu akatora Pedru, Tiyago no hama yake inozwi Juau, oenda nawo mu dunhu rakarebesesa ari oga.
2 Iyena akaphinduka pamberi pawo; ku hope kake kakadjeka hinga zuwa, macira ake akadjeka* hinga ciedza.
3 Hino, awona akaonawo Mozesi na Eriya ecicedza naye.
4 Pedru wakati kuna Djesu: “Tenzi, zvakanaka kuti tiri pano. Kana mecida, ndicagadzira zvitumba zvitatu pano, cimwe cenyu, cimweni ca Mozesi, no ca Eriya.”
5 Paainga ecireketa, gore rakadjeka rakaafukidza, uye pakazwika izwi recibuda mu gore reciti: “Uu ndiye Mwana wangu mudisiswa, wandapfarira. Mupurutanei.”
6 Afundi paakazwa izvi, awona akahwarara uye akathya maningi.
7 Djesu akakhwedera kaari, oapsvasa eciti: “Mukai. Musathye.”
8 Paakaringira-ringira, apana waakaona, kunza ka Djesu basi.
9 Paainga ecicita mu dunhu, Djesu akaabvunza kuti: “Musabvunze munhu nge zviya zvamaoneswa, dakara Mwana we munhu amutswa kubva ku akafa.”
10 Ngokudaro, afundi ake akamubvunzisa kuti: “Hino, ngei atari ecireketa kuti Eriya anodikana kutanga kuuya?”
11 Djesu akaadaira kuti: “Eriya ari kuuyadi, iyena anozogadzirisa zviro zvese.
12 Asi ndinoti kamuri, Eriya wakatouya, uye awona aazi kumuziya. Asi akaita zvaainga ecida naye. Ngo mushobo umwewo, Mwana we munhu acatambudzwawo nawo.”
13 Afundi ndipo paakazozwisisa kuti iyena aireketa ngezva Juau Mubhabhatidzi.
14 Paakaguma painga pano anhu akawanda, mwanarume umweni wakakhwedera kaari, womugodamira eciti:
15 “Tenzi, zwirai usisi mwana wangu, ngokuti unogwa nhutu uye uri kurhwara. Kajinji, unombwerera pa muriro no mu mvura.
16 Ndakaenda naye ku afundi enyu, asi awona akakonerhwa kumuporesa.”
17 Djesu akadaira kuti: “Imwi mubarirhwana usina kutenda uye wakashata, ndicagara na imwimwi dakara riini? Ndicashingirira maitiro enyu dakara riini? Muunzisei kuno.”
18 Djesu akadzingira dhimoni riya, irona rakabuda, kubvira pa nguwa iyona mwana uya wakatamba.
19 Ngokudaro, afundi ake akamukhwederera pake ega, omubvunzisa kuti: “Ngei isusu takonerhwa kuridzingira?”
20 Akati kaari: “Nge ndaa yekuti muno kutenda kudoko. Ngokuti, ndinomubvunzai zvirokwazvo kuti, kana muno kutenda kakaita hinga tsangu yo mostardha, mucati kudunhu iri: ‘Buda pano uende apo,’ uye irona ricabuda, uye apana ciro camucakonerhwa.”
21 * ——
22 Paainga akaungana mu Garireya, Djesu akati kaari: “Mwana we munhu acatengeswa mu nyara dze anhu,
23 awona anozomuuraya, uye pa zuwa rocitatu acamutswa.” Ngokudaro, afundi ake akatsukwara maningi.
24 Paakaguma ku Kafarnau, anarume airongosa musoho we madrakema mairi, akakhwedera kuna Pedru omubvunzisa kuti: “Mufundisi wenyu, aaripi here musoho we madrakema* mairi?”
25 Pedru wakati: “Honde, anoripa.” Asi paakapinda mumba, Djesu ndiye akatanga kureketa naye eciti: “Simoni, unoonawo kudini? Madzimambo e nyika, anotambira musoho kubva kunaani? Ku ana awo here kana kuti ku anhu amweni?”
26 Paakadaira kuti: “Ku anhu amweni,” Djesu akamubvunza kuti: “Ndizvodi, ana aaripiswi musoho.
27 Asi kuti asakuhunyike nge ndaa yedu, enda ku bahari, ukhandire ciedzo, wotora howe yaunotanga kubata, kana ukaifungura muromo wayo, ucaona mare yo prata.* Itore, uende kooripa musoho wako no wangu.”
Masoko ari pasi
^ Kana kuti: “akacenesesa.”
^ Onai Apendi. A3.
^ Onai Apendi. B14.
^ Cigrego: “mare yo estateri”; ii inozwi tetradrakema. Onai Apendi. B14.
