Mateu 19:1-30
19 Djesu paakapedza kureketa zviro izvi, akabuda mu Garireya, oenda kumugano we Djudhiya ku n’ombera ke Djorodhani.
2 Anhu akawanda akamuteerawo ikona uye iyena akaarapa.
3 Afarisi amweni akakhwedera kaari ecida kumuedza, omubvunzisa kuti: “Zvinotenderhwa here kuti mwanarume arambe mukadzi wake nge ndaa ipi hayo?”
4 Iyena akaadaira eciti: “Amuzi kuerenga here kuti uya akaasika pakutanga, akaaita mwanarume no mwanakadzi
5 uye akati: ‘Ndiyo ndaa, mwanarume acasiya baba ake na mai ake uye acabatana no mukadzi wake, uye ari airi acagara nyama imwe basi?’
6 Ngokudaro, anonga asiripizve airi, asi nyama imwe basi. Ndiyo ndaa, zvabatanidzwa na Mwari, munhu ngaasazviparadzanise.”
7 Afarisi akamubvunzisa kuti: “Hino, ngei Mozesi wakatendera kuti mwanarume atare tsamba yekurambana wopasa mukadzi pedzepo womuendesa?”
8 Iyena akati kaari: “Mozesi wakamutenderai kurambana no akadzi enyu nge ndaa ye kuoma mwoyo kenyu, asi zvainga zvisikazi kudaro kubvira pakutanga.
9 Ndinoti kamuri, munhu wese unoramba mukadzi wake pasina uhure* waizwa, ukawaka umweni, unonga watoita upombwe.”
10 Afundi akati kaari: “Kana zviri izvona zvinoitika pakati po mwanarume no mukadzi wake, zviri nani kusama kuwaka.”
11 Iyena akaadaira kuti: “Aesepi anokwanisa kuita zvandiri kureketa, asi aya basi ano cipo icona.
12 Ngokuti amweni aawaki ngokuti akabarhwa kudaro, amweni aawaki nge ndaa yo zvaakaizwa no anhu, uye amweni aawaki nge ndaa yo Umambo we kudenga. Uya unokwanisa kugara asikazi kuwaka, ngaaite izvona.”
13 Anhu akamuunzisira ana adoko kuti aatsanzikire nyara uye aaitire munamato, asi afundi akaasumurura.
14 Asi Djesu akati: “Siyai ana adoko auye kandiri, musaarambidze, ngokuti Umambo we kudenga, nge we anhu akaita hingana awona.”
15 Iyena akaatsanzikira nyara, pedzepo obudepo.
16 Munhu umweni wakauya kaari, womubvunzisa kuti: “Mufundisi, ngazvipi zvakanaka zvandinodikana kuita kuti ndione upenyu usikaperi?”
17 Djesu akati kaari: “Uri kundibvunzisirei nge zve zviro zvakanaka? Kuno munhu umwe basi akanaka. Asi kana wecida kuona upenyu usikaperi, rumbwa wecizwira mitemo.”
18 Mwanarumewo wakamubvunzisa kuti: “Mitemo dzipi?” Djesu akati: “Usauraye, usaite upombwe, usabe, usaite upupuri we manyepo,
19 reremedza baba na mai ako, uye ida mudoni wako hingana zvaunodziita.”
20 Djaha riya rakati: “Ndinosotondowedza zvese izvi; cinyizve candinodikana kuita?”
21 Djesu akamudaira kuti: “Kana wecida kugara akakwana, enda kootengesa zviro zvaunazvo, utore mareyo uipase arombo, ukadaro unozoona upfumi kudenga. Kana ukapedza, uya ugare muteeri wangu.”
22 Djaha riya parakazwa izvi, rakaenda rakatsukwara, ngokuti rainga rino zviro zvakawandisisa.
23 Djesu akati ku afundi ake: “Zvirokwazvo ndinomubvunzai kuti, zvicashupha zvikuru kuti mupfumi apinde mu Umambo we kudenga.
24 Ndinomubvunzaizve kuti, zviri nyore kuti kamero ipinde pacibori ce tsingano, pane kuti mupfumi apinde mu Umambo wa Mwari.”
25 Afundi paakazwa izvi, akashamisika zvikuru, uye akati: “Ndiyani zvezvirokwazvo angaponeswa?”
26 Djesu akanyasa kuaringira, uye akaabvunza kuti: “Kuno anhu izvi azvikwanisiki, asi kuna Mwari zviro zvese zvinokwanisika.”
27 Pedru wakamudaira kuti: “Onai, takasiya zviro zvese kuti timuteerei, ticawinei?”
28 Djesu akati kaari: “Zvirokwazvo ndinoti kamuri, pacaizwa zviro zvese kuti zvigare zvipsva, Mwana we munhu paanozogara pa cigaro cake ce umambo cinokudzwa, imwimwi makanditeera, mucagarawo pa zvigaro zve umambo 12, uye mucatonga madzinza 12 e Israeri.
29 Uye wese akasiya nyumba kana hama kana hanzvadzi kana baba kana mai kana ana kana minda nge ndaa ye zina rangu, acatambira zvakapethwa ka zana, uye acagara nhaka ye upenyu usikaperi.
30 “Asi akawanda ari pakutanga, anozogara okupedzesera, okupedzesera anozogara okutanga.
Masoko ari pasi
^ Cigrego: “porneía.” Onai pakazwi Kupanganidzwa ke Masoko.
