Mateu 24:1-51
24 Djesu paainga ecibuda mu tempro, afundi ake akaenda kaari koomupangidza zviwakwa zve tempro.
2 Iyena akaabvunza kuti: “Amuripi kuona here zviro zvese izvi? Ndinomubvunzai zvirokwazvo kuti, apana buwe rinozosara pamusoro pe buwe rimweni risikazi kuwiswa.”
3 Paainga akagara pasi mu Dunhu re Miorivhi, afundi ake akamukhwederera ari oga uye akati: “Tibvunzei: Zviro izvi zvicaitika riini uye ndi cipi cipangidzo cokuoneka kenyu* uye cokuti nyika yaakuda kupera?”*
4 Djesu akaadaira eciti: “Ngwarirai kuti pasagare no munhu anomupausai,
5 ngokuti ajinji acauya mu zina rangu, eciti: ‘Ndini Kristu’, uye acapausa akawanda.
6 Mucazwa nge zve hondo, no masoko anocokuita no hondo. Musapatike ndizvo, ngokuti zviro izvi zvinodikana kuitika, asi mugumo unonga usati waguma.
7 “Ngokuti dzinza ricarhwisa dzinza rimweni uye umambo ucarhwisa umambo umweni; kucazooneka nzara no zvigidhigidhi mu mbuto dzakawanda.
8 Zvese izvi, kunonga kuri kutanga ke matambudziko.
9 “Anhu acamutambudzai uye acamuurayai, imwimwi mucazondwa no anhu e madzinza ese nge ndaa yo zina rangu.
10 Uyewo, anhu ajinji anozosiya kutenda Mwari, ecitengesana pacawo, no kuzondana.
11 Kunozooneka aphorofita akawanda ekunyepa anozopausa ajinji;
12 uye kuwanda ke kusateerera mutemo, kucaita kuti rudo re ajinji ritonhore.
13 Asi uya anoshingirira dakara ku mugumo, acaponeswa.
14 Uye masoko aya akanaka e Umambo acaparidzwa mu nyika yese inogarhwa, kuti anhu ese aazwe uye zvadaro mugumo ucauya.
15 “Ngokudaro, kana mukaona ciro cinonyanyasa cinoparadza, cakabhuiwa no muphorofita Dhanyeri, cakaima pa mbuto yakacena, (muerengi ngaazwisise),
16 anonga ari mu Djudhiya ngaatizire ku matunhu.
17 Munhu anonga ari padenga pe nyumba, aadikani kucita kuti aende kootora zviri mumba,
18 uye munhu anonga ari mu munda, ngaasahwirire kumba kootora macira ake.
19 Ane nyathwa anakadzi anonga ano pamuiri, no anonga ari kuamwisa mu mazuwa awona!
20 Rumbwai mecinamata kuti pamucatiza, izvi zvisaitike mu nguwa yokutonhora no Sabudu;
21 ngokuti pa nguwa iyona, kucaitika kutambudzika kukuru kusati kakamboitika kubvira pa kutanga ke nyika dakara zvino, uye kusikambozoitikizve.
22 Zvezvirokwazvo, kudai mazuwa awona akatama kupungurhwa, apana munhu waizoponeswa; asi nge ndaa yo akasanangurhwa, mazuwa awona acapungurhwa.
23 “Hino, kana munhu akamubvunzai kuti, ‘Onai! Kristu ari pano,’ kana kuti, ‘Ari iyo!’ Musatendere.
24 Ngokuti kucaoneka Anakristu no aphorofita ekunyepa, uye acaita zvipangidzo no zvishamiso zvikuru, kuti acengedze anhu, kunyazi no aya akasanangurhwa.
25 Ngwarirai! Inini ndamungwadzai pacino nguwa.
26 Hino, kana akamubvunzai kuti, ‘Onai! Ari ku renje,’ musaendeyo, kana kuti; ‘Ari mumba,’ musazvitende.
27 Ngokuti hinga kubva kunoita mheni ku mabvazuwa, yocetuka dakara kumadokero, ndizvoo zvicaitika pa kuoneka* ke Mwana we munhu.
28 Paya panonga pano mutumbi, ndipo pacaungana makodzi.
29 “Mumasure me mazuwa e kutambudzika kukuru, zuwa ricasvipa uye mwedzi auzodjeki, nyeredzi dzicawa uye masimba e kudenga acazunguzwa.
30 Kudenga kunozooneka cipangidzo ce Mwana we munhu, uye madzinza ese acaponda paditi ecitsumba, uye acaona Mwana we munhu eciuya mu makore e kudenga, no simba uye no rukudzo rukuru.
31 Anozotuma ngirozi dzake no izwi guru re tropito, dzinozounganidza akasanangurhwa ake mu matii marongomuna e nyika, kubvira ku dii rimwe re kumatenga, dakara ku dii rimweni.
32 “Fundai no muezaniso uu we muonde: Nhai dzawo padzinopfipfitira dzobudisa masakani, munoziya kuti marimo aapadhuze.
33 Ngo mushobo umwewo, pamunoona zvese izvi, ziyai kuti iyena* aapadhuze, pa musuwo.
34 Ndinomubvunzai zvirokwazvo kuti, mubarirhwana uu auzoperi zviro zvese izvi zvisati zvaitika.
35 Denga no nyika zvicapera, asi masoko angu aazoperi.
36 “Apana munhu anoziya nge zve zuwa no nguwa iyona, kunyazi ngirozi dze kudenga kana Mwana, asi Baba basi ndiwo anozviziya.
37 Ngokuti hinga zvainga zvakaita mu mazuwa a Nowa, ndizvo zvicaitikawo pa kuoneka* ke Mwana we munhu.
38 Ngokuti hinga zvaaiita mu mazuwa awona Ndambi huru isati yauya, airhya no kumwa, anarume eciwaka uye anakadzi eciwakwa, dakara zuwa rakapinda Nowa mu areka,
39 uye awona aatozi kuzvirangarira dakara Ndambi huru yauya, ikaaeredza ese, ndizvo zvicaitikawo pa kuoneka ke Mwana we munhu.
40 Pa nguwa iyona, anarume airi anonga ari mu munda; umwe ucatorhwa umweni ucasiiwa.
41 Anakadzi airi anonga ecikwiya pa gwiyo; umwe ucatorhwa umweni ucasiiwa.
42 Hino, rumbwai makarinda, ngokuti amurizii zuwa ricauya Tenzi wenyu.
43 “Asi ziyai ciro cimwe: Kudai muridzi we nyumba waiziya nguwa* inoguma mbavha, waizowatapi uye wainga usikazodi kutendera kuti nyumba yake iphwanywe.
44 Nge ndaa yazvo, imwimwi garaiwo makagadzirira, ngokuti Mwana we munhu acauya pa nguwa yamusikakariri.
45 “Ndiyani kamare muranda akagondeka uye akangwara, akasanangurhwa na tenzi wake kuti apase zvekurhya e nyumba yake pa nguwa kwayo?
46 Anopfara muranda iyena kana tenzi wake akamugumira eciita izvona!
47 Zvezvirokwazvo ndinoti kamuri, iyena anozomugadza kuti aonerere zviro zvake zvese.
48 “Asi kana muranda uya wakashata ukareketa nge ce mu mwoyo make kuti, ‘Tenzi wangu uri kunonoka,’
49 wotanga kuponda arandadoni ake, uye ecirhya no kumwa no zvidhakwa,
50 tenzi we muranda iyena ucauya pa zuwa raasikakariri uye pa nguwa yaasikazii,
51 iyena unozomuphanica zvikuru, womukhandira mu mbuto yo acengedzi. Kweneyo ndiko kaacacema, no kurumanisa mazino ake.
Masoko ari pasi
^ Onai pakazwi Kupanganidzwa ke Masoko.
^ Kana kuti: “kupera ke magariro e zviro.”
^ Onai pakazwi Kupanganidzwa ke Masoko.
^ Pari kubhuya nge zve Mwana we Munhu.
^ Onai pakazwi Kupanganidzwa ke Masoko.
^ Kana kuti: “nguwai usiku.”
