Mateu 28:1-20
28 Mumasure me Sabudu, pakainga kooedza, pa zuwa rokutanga re sumana, Mariya Madharena na Mariya umweni, akaenda koona guwa.
2 Pakaitika cigidhigidhi cikuru, ngokuti ngirozi ya Djehovha yakacita yecibva kudenga, iyona yakamburumbudza buwe rainga rakafunga guwa uye yakarigarira.
3 Ciimo cayo cainga cakaita hinga kucetuka ke mheni, uye macira ayo ainga akacena hinga masanza.
4 Arindi akaithya, zvokuti akatetemera oita hingana anhu akafa.
5 Asi, ngirozi yakabvunza anakadzi aya kuti: “Musathye, ngokuti ndinozviziya kuti muri kupsvaka Djesu akauraiwa pa mutanda.
6 Iyena aaripi pano, ngokuti akamutswa, maererano no zvaakareketa. Uyai muone pa mbuto yaainga akaradzikwa.
7 Pedzepo, endai nokukasika koobvunza afundi ake kuti Djesu amutswa kubva ku akafa, uye atungamira kuenda ku Garireya. Imwimwi mucamuona ikona. Izvi ndizvo zvandauya koomubvunzai”
8 Ngokudaro, awona akabuda pa guwa nokukasika, ecithya uye ecipfara zvikuru, awona akagogoma kuti aende koozvipanganidzira afundi ake.
9 Djesu akasongana nawo, oabvunza kuti: “Kweca-kweca!” Awona akamukhwederera ogodama, omubata tsoka dzake.
10 Pedzepo, Djesu akaabvunza kuti: “Musathye! Endai moobvunza hama dzangu kuti dziende ku Garireya, uye dzicandiona ikona.”
11 Paainga ecienda, arindi amweni akapinda mu guta, obvunza atungamiriri e apristi zvese zvainga zvaitika.
12 Mumasure me kuungana no akuru kuti aone zvaaizoita, awona akapasa masurudado mare yakawanda yo parata
13 uye akati: “Bhuyai kuti, ‘Afundi ake akauya koomuba cousiku patainga takawata.’
14 Uye kana mutungamiriri ukazvizwa, isusu ticamupanganidzira nge zvazvo, imwimwi amudikani kuthya.”
15 Ngokudaro, awona akatora mare yo parata uye akaita hinga zvaabvunzwa, masoko aya akabararika pakati pe Adjudha dakara na nyamasi.
16 Asi afundi 11 akaenda ku Garireya, ku dunhu raakabvunzwa na Djesu kuti aende.
17 Paakamuona, akamugodamira, asi amweni aazi kugara no cokwadi kuti ndiye.
18 Djesu akakhwedera padhuze uye akati kaari: “Ndakapaswa masimba ese kudenga no panyika.
19 Hino, endai kune anhu e madzinza ese, afundisei kuti agare afundi angu, meciabhabhatidza mu zina ra Baba ne re Mwana, ne re mwiya mucena,
20 meciafundisa kucengeta zvese zvandakamubvunzai. Uye ziyai kuti ndicange ndinemwi mazuwa ese dakara pa kupera ke nyika.”*
Masoko ari pasi
^ Onai pakazwi Kupanganidzwa ke Masoko.
