Akatarhwa na Mateu 3:1-17
3 Mumazuwa awona, Juau Mubhabhatidzi wakaenda kooparidzira ku renje* ro Djudhiya,
2 eciti: “Cinyukai, ngokuti Umambo we kudenga waapadhuze.”
3 Zvezvirokwazvo, uu ndiye wakarekethwa nge zvake no muphorofita Isaya, eciti: “Kuno izwi riri kuzwika ku renje, reciti: ‘Gadzirirai gwanza ra Djehovha!* Rungamisai makwanza ake.’”
4 Juau waipfeka dehwe ro kamero rino ukuse. Cihunu cake caisungwa no bhande ro dehwe. Iyena wairhya makwiza no uci.
5 Anhu ese e Djerusarema, e Djudhiya uye e nharaunda dzaitenderedza Djorodhani, aiyenda kaari,
6 uye awona aibhabhatidzwa* naye mu Murambo we Djorodhani, ecipupura pamhene zvishaishi zvawo.
7 Paakaona Afarisi no Asadhusi ajinji eciuya koobhabhatidzwa, akati kaari: “Imwi ana e nyoka, ndiani akamubvunzai kuti mungatiza shungu dza Mwari dziri kuuya?
8 Hino, barai zvibereko zvinopangidza kuti macinyuka.
9 Musarangarire mu mwoyo menyu kuti: ‘Isusu tiri ana a Abrahamu.’ Inini ndinomubvunzai kuti Mwari anokwanisa kucinja mapuwe aya kuti agare ana a Abrahamu.
10 Demo ratogadzikwa kare pa midzi yo miti. Hino, muti wese usikabari micero kwayo unozotemwa, wokhandirhwa pa muriro.
11 Inini ndinomubhabhatidzai no mvura nge ndaa yo kucinyuka kenyu, asi uya ari kuuya mumasure mangu, ano simba kundidarika, uye inini andizi kusisira kuti ndikhumure masandarya ake. Iyena acamubhabhatidzai no mwiya mucena uye no muriro.
12 Iyena aano foshoro mu nyara, kuti aparadzanise trigu no marara. Uye acanyasa kucenesa paanopurira, acaunganidza trigu yake mu muturika, asi marara acaapisa pa muriro usikadzimisiki.”
13 Djesu akabva ku Garireya ecienda ku Djorodhani kuna Juau, kuti abhabhatidzwe naye.
14 Asi Juau wakaedza kumurambidza, eciti: “Ndini ndinodikana kubhabhatidzwa ndimwi, imwimwi muri kutouya kandiri?”
15 Djesu akamudaira eciti: “Usandirambidze, ngokuti zvakasisira kuti zviitike kudaro maererano no zvese zvinodiwa na Mwari.” Ngokudaro, iyena aazozi kumurambidzazve.
16 Paakapedza kubhabhatidzwa, Djesu akabuda mu mvura; uye kudenga kakafunguka, iyena wakaona mwiya wa Mwari wecicita wakaita hinga njiwa weciuya paari.
17 Uyezve, izwi rakabudawo kudenga reciti: “Uu ndiye mwana wangu, mudisiswa, wandapfarira.”
Masoko ari pasi
^ Onai pakazwi Kupanganidzwa ke Masoko.
^ Onai Apendi. A5.
^ Kana kuti: “ainyikwa mu mvura.”
