Mateu 4:1-25
4 Djesu akaendeswa mu renje no simba ra Mwari, pedzepo Dhiyabhurosi wakamuedza.
2 Mumasure me kutsanya usiku no masikati ke mazuwa 40, iyena akazwa nzara.
3 Dhiyabhurosi wakauya kuzomuedza, uye wakamubvunza kuti: “Kana iwewe uri mwana wa Mwari, bvunza mapuwe aya kuti aphinduke kuita pau.”
4 Asi akamudaira eciti: “Zvakatarhwa kuti: ‘Munhu aadikani kurarama no pau basi, asi anodikana kurarama nge masoko ese anobuda pa muromo wa Djehovha.’”
5 Pedzepo Dhiyabhurosi wakamutora oenda naye ku Djerusarema, omukanda pa mbuto yo pamusoro-soro yo tempro,
6 uye wakamubvunza kuti: “Kana iwewe uri mwana wa Mwari, dzikhandire pasi, ngokuti zvakatarhwa: ‘Iyena acatuma ngirozi kuti dzikuthware kuti usadzipondere pa buwe.’”
7 Djesu akati kaari: “Zvakatarhwazve kuti: ‘Usaedze Djehovha Mwari wako.’”
8 Dhiyabhurosi wakamutorazve oenda naye pa dunhu rakarebesesa, omupangidza umambo wese we nyika no upfumi wawo.
9 Uye iyena wakamubvunza kuti: “Ndicakupasa zvese izvi kana ukandihwararira wondinamata kamwe basi.”
10 Hino Djesu akati kaari: “Buda pano, Sathani! Ngokuti zvakatarhwa kuti: ‘Djehovha Mwari wako ndiye waunodikana kunamata, uye ndiye ega waunodikana kuitira basa rakacena.’”
11 Ngokudaro Dhiyabhurosi wakamusiya, uye ngirozi dzakauya koomubambisa.
12 Djesu paakazwa kuti Juau wainga akandwa mukaraboso, iyena akaenda ku Garireya.
13 Paakabva ku Nazareta, akaenda koogara ku Kafarnau, padhuze no bahari, ku mitanha yo Zebhuroni na Nafitari,
14 kuti adzadzike masoko e muphorofita Isaya, ekuti:
15 “Imwimwi anhu e nyika yo Zebhuroni na Nafitari, nyika dzinooneka mu gwanza rinoenda ku bahari, ngo n’ombera ko Djorodhani, nyika yo Garireya inogarhwa no anhu e madzinza amweni!
16 Anhu anogara mu cidima, akaona ruvheneko rakakura, uye aya anogara mu mitanha dze cidima ce rufu, akavhenekerhwa.”
17 Kubvira panguwa iyona kuenda mberi, Djesu akatanga kuparidzira eciti: “Cinyukai, ngokuti Umambo we kudenga, waapadhuze.”
18 Ecihamba mu muceto me Bahari ro Garireya, Djesu akaona Simoni, unodainzwa Pedru na Andreya hama yake, ecikhandira maricera mu bahari, ngokuti awona ainga ari aedzi e howe.
19 Djesu akati kaari: “Nditeerei, uye ndicamuitai kuti mugare aedzi e anhu.”
20 Awona akasiya maricera ciriporipoco uye akamuteera.
21 Paakaenderera mberi, akaona anarume airi ainga ari mukoma no munukuna, Tiyago mwana wa Zebhedheu, no munukuna wake waizwi Juau. Awona, ainga ari mu bharko no baba awo Zebhedheu ecigadzirisa maricera awo, uye iyena akaadainza.
22 Ciriporipoco, awona akasiya bharko no baba awo uye akamuteera.
23 Djesu aihamba mu Garireya mwese, ecifundisa mu masinagoga awo uye eciparidzira masoko akanaka* e Umambo, ecirapa mishobo yese yo nhenda dzainga dzino anhu.
24 Mbiri yake yakaguma mu Siriya mwese, anhu aiunzisa kaari ese aya ainga ano nhenda dzakasiyana-siyana uye airhwadziwa zvikuru, anhu ainga ano madhimoni, aigwa nhutu no akaoma mwiri, uye iyena aiarapa ese.
25 Ngokudaro, anhu akawanda aimuteera ecibva ku Garireya, ku Dhekapori,* ku Djerusarema, ku Djudhiya no n’ombera ke Djorodhani.
