Mateu 5:1-48
-
MHARIDZO YE PA DUNHU (1-48)
5 Paakaona anhu akawanda, iyena akakhwira mu dunhu; hino mumasure me kugara pasi, afundi ake akakhwedera paari.
2 Iyena akatanga kuafundisa, eciti:
3 “Anopfara aya anoziya kuti anoda kutungamirirhwa na Mwari,* ngokuti Umambo we kudenga nge wawo.
4 “Anopfara aya anocema, ngokuti acanyaradzwa.
5 “Anopfara aya ano mwoyo wakapfawa, ngokuti acagara nhaka ye nyika.
6 “Anopfara aya ano nzara no mukaha we unatsi, ngokuti acazogutiswa.
7 “Anopfara ane usisi, ngokuti acazwirhwa usisi.
8 “Anopfara akacena mwoyo, ngokuti acaona Mwari.
9 “Anopfara anoita kuti pagare no runyararo, ngokuti acadainzwa ana a Mwari.
10 “Anopfara aya anoteererhwa nge ndaa ye unatsi, ngokuti Umambo we kudenga nge wawo.
11 “Munopfara kana anhu ecimutukai no kumuteererai uye ecimunyeperai zviro zvakashata zvakasiyana-siyana nge ndaa yangu.
12 Pfarai, nyasai kupfara ngokuti mubairo wenyu mukuru kudenga, ngokuti ndiko kushuphwa kaiizwa aphorofita akararama musati maapo.
13 “Imwimwi muri munyu we nyika, asi kana munyu ukatama kurungura, ndiyani ucaita kuti urungurezve? Aucaseenzi ciro, kasara kutopsveta kuti utsikwe-tsikwe nge anhu.
14 “Imwimwi muri ruvheneko re nyika. Azviiti kufisa guta rakawakwa pa dunhu.
15 Azviiti kubatidza cibani kuti cidumhaidzwe nge citengu,* asi cinoturikwa pakanyasa kukhwirira, kuti civhenekere nyumba yese.
16 Nge mushobo umwewo, ruvheneko renyu ngaridjeke pamberi pe anhu, kuti aone mabasa enyu akanaka, okudza Baba enyu ari kudenga.
17 “Musarangarire kuti ndakauya kuzoparadza Mutemo kana kuti zvakatarhwa ne aphorofita. Andizi kuuya kuzoparadza, asi kuzodzadzisa.
18 Zvezvirokwazvo ndinoti kamuri, zviri nyore kuti denga no nyika zvidarike, pane kuti karetra kamwe basi kadoko-doko, kana kuti dii re karetra kapfudzike pa Mutemo zviro zvese izvi zvisati zvaitika.
19 Hino, uya unoputsa mutemo mudoko uu, ofundisa amweni kuti azviitewo, unozodainzwa mudoko mu Umambo we kudenga. Asi uya unoupurutana, ofundisa amweni kuti azviitewo, unozoizwa mukuru mu Umambo we kudenga.
20 Ndinomubvunzai kuti, kudai unatsi wenyu ukasama kuita ukuru kupinda unatsi we atari no Afarisi, amuzopindi mu Umambo we kudenga.
21 “Makazwa zvakabvunzwa anhu e kare kuti: ‘Usauraye, asi uya unouraya unozotongwa mu dare re kutonga.’
22 Asi ndinoti kamuri, munhu wese anorumbwa akatsamwira hama yake acadzidairira ku dare rinotonga; uye munhu wese anodainza hama yake ne soko rekushora risingareketeki, acadzidairira ku Tribhunari ye Pamusoro-soro; asi munhu wese unoti, ‘Iwewe uri benzi risikabetseri!’ unonga akasisira kupinda mu Gehena* re muriro.
23 “Hino, kana weciuya kuzopasa cipo cako pa artari,* woedzurira kuti hama yako ino bundu newe,
24 siya cipo cako ipona pamberi pe artari, woenda. Tanga wagadzirisa runyararo ne hama yako, wozohwirira wopa cipo cako.
25 “Gadzirisai no kukasika nyaya yenyu no nyamarhwa wenyu, pamunonga muri mugwanza mecienda ku tribhunari, kuti nyamarhwa wenyu asamukandei mu nyara dze atongi, atongi omukandai mu nyara dze murindi, kuti amukandei mu karaboso.
26 Zvezvirokwazvo ndinokubvunza kuti, auzobudimo usati wapedza kuripa gaa rese.
27 “Makazwa zvakarekethwa kuti: ‘Usaite upombwe.’
28 Asi inini ndinomubvunzai kuti, munhu wese unorumbwa wakaringisa mwanakadzi ecimusirira, unonga watoita upombwe naye mu mwoyo make.
29 Kudai dziso rako re moko kwawo rikakuitisa zvakashata, ribvise uripsvetere kure na iwewe. Ngokuti zviri nani kuruza dziso rako rimwe, pane kukhandirhwa mwiri wese mu Gehena.*
30 Uyewo, kudai nyara yako ye moko kwawo ikakuitisa zvakashata, igure uipsvetere kure na iwewe. Ngokuti zviri nani kuruza nyara yako imwe, pane kuti mwiri wako wese ukhandirhwe mu Gehena.*
31 “Zvakarekethwazve kuti: ‘Munhu wese anorambana no mukadzi wake, ngaamupase tsamba ye kurambana.’
32 Asi inini ndinomubvunzai kuti, munhu wese unorambana no mukadzi wake, pasina ndaa ye uhure,* unomukanda pa ngozi ye kuita upombwe. Ngokuti munhu wese unowaka mukadzi wakarambwa, unonga weciita upombwe.
33 “Makazwa zvakabvunzwa anhu e mu nguwa ye kare kuti: ‘Usapike wosama kuzviita, asi unodikana kudzadzisa mhiko dzawakaitira Djehovha.’
34 Asi inini ndinomubvunzai kuti: ‘Musambopike no denga, ngokuti cigaro ca Mwari;
35 kunyazi no pasi, ngokuti ndicona citsiko ce tsoka dzake; kunyazi no Djerusarema, ngokuti i guta ra Mambo mukuru.’
36 “Usambopikire ngo musoro wako, ngokuti aukwanisi kucenesa kana kusvipisa tsitsi rimwe haro.
37 Soko renyu rekuti ‘Honde’ ngarirumbwe riri honde, ‘Haiwa’ wenyu, ngaarumbwe ari haiwa, ngokuti zvinodarika izvi, zvinobva kuna Sathani.
38 “Makazwa zvakarekethwa kuti: ‘Unouraya dziso ro umweni, ngaauraiwewo rake. Unokhuca zino ro umweni, ngaakhucwewo rake.’
39 Asi ndinoti kamuri: ‘Musahwirinzire cakashata ku munhu wakashata, asi munhu wese anomuponda mbama pa dama re moko kwawo, mupeizve dama rimweni.’
40 “Uye kana munhu ecida kukuendesa ku tribhunari, kuti akutorere hanzu yako, mupasewo no bhaci rako,
41 uye kana munhu uno masimba akakubambidzira kuti umuthwarire mutoro ke mukuwo we kirometro imwe, enda naye ke makirometro mairi.
42 Pasa munhu anokukumbira uye usarambire munhu ari kuda kukufiyari.*
43 “Makazwa zvakarekethwa kuti: ‘Ida mudoni wako, zonda muzondi wako.’
44 Asi ndinomubvunzai kuti: ‘Rumbwai mecida azondi enyu, uye meciitira munamato aya anomuteererai,
45 kuti mupangidze kuti muri ana a Baba enyu e kudenga, ngokuti anoita kuti zuwa rawo ribudire anhu akashata ne akanaka uye anoita kuti mvura inaire anatsi ne asiripi anatsi.’
46 Hino muno mubairo wei, kana mecida basi aya anomudawo? Izvi andizvopi zvinoizwawo no arongosi e musoho here?
47 Uye kana mecicungamidza basi hama dzenyu, cinyi cinoshamisa camuri kuita? Izvi andizvopiwo here zvinoizwa no anhu e madzinza amweni?
48 Garai akakwana, hinga Baba enyu e kudenga akakwana.
Masoko ari pasi
^ Kana kuti: “anoziya kuti ndi arombo pa mwiya.”
^ Kana kuti: “citengu cokupima naco.”
^ Mbuto yaipisirhwa marara kunza ke Djerusarema. Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Mu Cigrego por·nei′a. Onai pakazwi Kupanganidzwa ke Masoko.
^ Zviri kuda kureya kufiarisi pasina juru.
