Akatarhwa na Mateu 7:1-29
7 “Imai kutonga amweni, kuti musatongwewo;
2 matongere amunoita, ndiwoo matongerhwe amucaizwa, mapimire amunoita, ndiwoo mapimirhwe amucaizwa.
3 Hino, ngei weciona cimuti ciri mu dziso re hama yako, usikaoni mutanda uri mu dziso rako?
4 Kana kuti, ungabvunza kudini hama yako kuti: ‘Ndisiye ndibvise cimuti ciri mu dziso rako,’ nepoo iwewe une mutanda mu dziso rako?
5 Mucengedzi! Tanga wabvisa mutanda uri mu dziso rako, uye ucanyasa kuona mabvisire aungaita cimuti ciri mu dziso re hama yako.
6 “Musapase imbwa zviro zvakacena kana kukhandirira nguruwe mapuwe e mutengo wakakura, kuti dzisaatsike-tsike, pedzepo dzouya kuzomukuwadzai.
7 “Rumbwai mecikumbira uye mucapaswa; rumbwai mecipsvaka uye mucaona; rumbwai mecigogodza uye mucafungurirhwa;
8 ngokuti wese anokumbira anopaswa; wese anopsvaka anoona; uye wese anogogodza acafungurirhwa.
9 Zvezvirokwazvo, ndiani wenyu wekuti kana mwana wake akamukumbira pau, anomupasa buwe?
10 Kana kuti, akamukumbira howe, angamupasa nyoka here?
11 Hino, kana imwimwi mecikwanisa kupasa ana enyu zviro zvakanaka kunyazi muri anhu akashata, zvakadiniwo na Baba enyu ari kudenga, angatama here kupasa zviro zvakanaka kuno aya anoakumbira?
12 “Hino, zviro zvese zvamunoda kuti anhu amuitirei, aitireiwo izvona, izvi ndizvo kamare zvinorekethwa no Mutemo, ne Aphorofita.
13 “Pindai nge pamusuwo wakadodoka, ngokuti musuwo wakapamhama ne gwanza rakakura, zvinoendesa mukutsakatiswa uye ajinji ndimo maari kupinda namo;
14 asi musuwo wakadodoka ne gwanza rakatetepa, zvinoendesa ku upenyu, uye anhu padoko ndiwo ari kuriona.
15 “Ngwarirai aphorofita ekunyepa, anouya kamuri akasimira dehwe re bira, asi nge cemukati, i mhumhi dzinokuwadza.
16 Mucaaziya ngo micero yaanobara. Anhu angakhaya here uvha pa minzwa, kana maonde pa shango rinobaya?
17 Ngo mushobo umwewo, muti wese wakanaka unobara micero yakanaka, asi muti wese wakashata* unobara micero isikabetseri.
18 Muti wakanaka aungabari mucero usikabetseri, muti wakashata aungabariwo mucero wakanaka.
19 . Muti wese usikabari mucero wakanaka, unotemwa wokhandirhwa pa muriro.
20 Ngokudaro, anhu akadaro mucaaziya ngo micero yawo.
21 “Amunhupi wese anoti kandiri: ‘Tenzi, Tenzi,’ acapinda mu Umambo we kudenga, asi uya basi anoita kuda ka Baba angu ari kudenga.
22 Pa zuwa irona, ajinji acati kandiri: ‘Tenzi, Tenzi, atizi here kuphorofita mu zina renyu, no kudzingira madhimoni mu zina renyu, no kuita mabasa akawanda e simba mu zina renyu?’
23 Asi inini ndicati kaari: ‘Andimuzii! Budai pamberi pangu, imwimwi musikateereri mutemo!’
24 “Asi uya anozwa zvandinoreketa ozviita, anoezana no munhu wakangwara wakawaka nyumba yake pa buwe.
25 Uye mvura yakanaya no simba, kakauya mvura yakawandisa, dutu rakaponda nyumba iyona no simba, asi aizi kumbwera, ngokuti iyona yainga yakawakirhwa pa buwe.
26 Kusiya izvona, munhu wese unozwa zvandinoreketa osama kuzviita, unoezana no mwanarume wakapusa wakawaka nyumba yake pa djeca.
27 Uye mvura yakanaya no simba, kakauya mvura yakawandisa, dutu rakaponda nyumba iyona no simba, uye iyona yakambwera, yoondomoka yese.”
28 Djesu paakapedza kureketa izvi, anhu akashamiswa maningi no mafundisiro ake,
29 ngokuti iyena aiafundisa zvaibva kuna Mwari, haiwa hinga zvaiizwa no atari awo.
Masoko ari pasi
^ Kana kuti: “wakaora.”
