Akatarhwa na Mateu 9:1-38
9 Hino iyena akapakira bharko, obira oenda n’ombera, uye opinda mu thaundi rake.
2 Uye akamuunzira munhu wakaoma mwiri. Paakaona kutenda kaainga anako, Djesu akati ku munhu wainga wakaoma mwiri: “Shinga mwanangu! Zvishaishi zvako zvarekererhwa.”
3 Paakaona izvi, atari amweni akatanga kubvunzana pacawo eciti: “Munhu uu uri kutuka.”
4 Djesu eciziya ngezve marangariro awo, akati: “Ngei muri kurangarira zviro zvakashata mu mwoyo menyu?
5 Ngo muezaniso, cinyi ciri nyore kureketa: ‘Zvishaishi zvako zvarekererhwa,’ kana kuti: ‘Purumuka uhambe?’
6 Asi kuti muziye kuti Mwana we munhu ano simba ro kurekerera zvishaishi pa nyika—” pedzepo, akabvunza mwanarume wainga wakaoma mwiri kuti: “Muka, tora makha wako uende kumba.”
7 Iyena wakamuka, oenda kumba kake.
8 Paakaona izvi, anhu akathya uye akakudza Mwari, uwo akapasa simba rakadaro ku anhu.
9 Paakabva ipona, Djesu akaona mwanarume umweni waizwi Mateu wakagara pa mbuto yo kuripira musoho, akati kaari: “Gara muteeri wangu.” Iyena wakapurumuka uye wakamuteera.
10 Pa nguwa yakazoteera paainga ecirhya* ari mumba, arongosi e musoho no ashaishi akauya, akatanga kurhya na Djesu pamwepo no afundi ake.
11 Asi Afarisi paakaona izvi, akati ku afundi ake: “Ngei mufundisi wenyu ari kurhya no arongosi e musoho uye no ashaishi?”
12 Djesu paakazvizwa, akaabvunza kuti: “Anhu akatamba aadi murapi, asi aya ari kurhwara.
13 Hino, endai moofunda kuti anoreyei masoko okuti: ‘Ndinoda usisi haiwa cibairo.’ Ngokuti andizi kuuya koodainza anatsi, asi ashaishi.”
14 Afundi a Juau akaenda kuna Djesu omubvunzisa kuti: “Ngei isusu no Afarisi tinotsanya asi afundi enyu aatsanyi?”
15 Djesu akati kaari: “Shamwari dze mwanarume ari kuda kucata dzingacema here nepoo mwanarumewo uciripo? Asi, pacaguma zuwa rekuti mwanarumewo acabviswa pakati pawo, uye awona acatsanya.
16 Apana munhu anosonera cigamba cipsva pa djira rakatsakara, ngokuti cigamba cipsva cicaita kuti djirero rimweke, uye paya painga pamweka pototunhudzirika.
17 Apana munhu anokanda vhinyu ipsva mu zvigubu zve matehwe zvakatsakara. Kana akadaro, zvigubu zve matehwe zvicaphathuka, vhinyu icapsveteka uye zvigubu zve matehwe zvicatsakatika. Asi anhu anokanda vhinyu ipsva mu zvigubu zve matehwe zvipsva, uye zvese zvicacengeteka.”
18 Paakaabvunza zviro izvi, mutongi umweni wakamukhwederera, ogodama pamberi pake eciti: “Mwana wangu wo mwanakadzi pamweni watofa, asi uyai mukande nyara yenyu paari, uye iyena acamuka.”
19 Hino, Djesu akamuka pamwepo no afundi ake akamuteera.
20 Mwanakadzi umweni wakapedza makore 12 ecitambudzika no nhenda ye kubuda ngazi, wakamukhwederera nge sure kake, wopsvasa zviusaru zve djira rake,
21 ngokuti iyena waiti mu mwoyo make: “Kana ndikandopsvasa basi djira rake, ndicatamba.”
22 Djesu paakaringira sure, uye paakamuona akati: “Shinga mwanangu! Kutenda kako kakuporesa.” Kubvira pa nguwa iyona kamare, mwanakadziwo wakapora.
23 Paakaguma pa nyumba yo mutungamiriri we sinagoga, eciona anhu eciridza ngoma dze mariro uye ecicema,
24 Djesu akati: “Budai muno, ngokuti musikana uu aazi kufa, asi uri kuwata.” Hino, awona akatanga kumuseka.
25 Anhu paakabviswa kunza, iyena akapinda, obata nyara yo musikana uye iyena wakamuka.
26 Masoko awona, akabararika mu nharaunda yese.
27 Djesu paaibuda ipona anarume airi ainga ari mapofu akamuteera, ecikhuwa eciti: “Tizwireiwo usisi, Mwana wa Dhavhidhi.”
28 Mumasure mekuti Djesu apinda mumba, anarume ainga ari mapofu akaenda kaari, uye iyena akaabvunzisa kuti: “Imwimwi munotendadi kuti inini ndingakwanisa kuita izvona?” Awona akamudaira kuti: “Honde Tenzi.”
29 Hino, Djesu akabata madziso awo eciti: “Ngazviitike kamuri maererano no kutenda kenyu.”
30 Awona akatanga kuona. Pedzepo, Djesu akaabvunza kuti: “Ngwarirai kuti zvaitikezvi izvi zvisaziikanwe no munhu upi hake.”
31 Paakandobuda kunza, awona akatanga kubararisa masoko ngezva Djesu mu nharaunda yese.
32 Paainga ecienda, pakaguma anhu amweni akamuunzisira cimumu cainga cino dhimoni;
33 mumasure mekuti dhimoni riya rabudiswa, cimumu ciya cakatanga kureketa. Anhu akashamisika uye akati: “Amusati makambooneka zviro zvakadai mu Israeri.”
34 Asi Afarisi aibhuya kuti: “Iyena ari kudzingira madhimoni no simba ro mutongi we madhimoni.”
35 Djesu akatanga kuhamba mu mathaundi ese no mizi dzese, ecifundisa mu masinagoga awo, eciparidza masoko akanaka e Umambo, uye eciporesa mishobo yese ye matenda uye urema.
36 Eciona anhu akawanda, iyena akaazwira usisi, ngokuti aibathwa zvakashata uye ainga akabararika hingana mabira asina muushi.
37 Iyena akabvunza afundi ake kuti: “Zvezvirokwazvo basa re kukorora i guru, asi aseenzi ashoma.
38 Ngokudaro, kumbirai Muridzi we munda kuti atumire aseenzi amweni kuti akorore munda wake.”
Masoko ari pasi
^ Kana kuti: “paainga ari pa meza.”
