Akatarhwa na Ruka 1:1-80
-
Masoko okutanga kuna Teofiro (1-4)
-
Gabriyeri anoreketa ngezve kubarhwa ka Juau Mubhabhatidzi (5-25)
-
Gabriyeri anoreketa ngezve kubarhwa ka Djesu (26-38)
-
Mariya anovhakacira Erizabheti (39-45)
-
Mariya anokudza Djehovha (46-56)
-
Juau anobarhwa uye anopaswa zina rake (57-66)
-
Uphorofita wa Zakariya (67-80)
1 Anhu akawanda akapeta masimba pakupsvakisisa zviro zvese zvakaitika uye kuzvitara, isusu tinotendawo* zviitiko izvi,
2 hinga zvatakaziiswa no aya akazviona kubvira pakutanga uye akagara aziisi e soko.
3 Ininiwo, mumasure me kupsvakisisa zviro zvese zvakaitika kubvira pakutanga, ndakasanangura kuti ndimutarirei ngo mushobo wazvakaitika, imwimwi munoreremedzwa Teofiro,
4 kuti munyase kugara no rugondo ro zviro zvamakafundiswa no muromo.
5 Mu mazuwa a Herodhi,* mambo we Djudhiya, kainga kuno mupristi umweni waizwi Zakariya we cikwata ca Abhiya. Mukadzi wake wainga ari umwe we ana a Aroni, uye waizwi Erizabheti.*
6 Ari airi ainga ari anhu anatsi pamberi pa Mwari, awona ainga asina ndaa maererano no zvese zvinodiwa no mitemo ya Djehovha.*
7 Asi ainga asina ana, ngokuti Erizabheti wainga asikabari, uye ese ainga acembera.
8 Zakariya wainga eciseenzera Mwari hinga mupristi pa djana ro cikwata cake,
9 hinga marongerhwe ainga akaita basa re upristi, nguwa yake yakaguma yekuti apinde kuti ape rusenzi mu mbuto yakacena ya Djehovha.*
10 Uye anhu amweni ese ainga ecinamata ari kunza pa nguwa ye kuita zvipo zve rusenzi.
11 Ngirozi ya Djehovha* yakamuuira, yoima ku moko kwawo we artari yo rusenzi.
12 Zakariya wakanetseka paakaiona, uye wakatanga kuthya.
13 Asi ngirozi yakamubvunza kuti: “Usathye Zakariya, ngokuti minamato yako ye kudeketera yazika, mukadzi wako Erizabheti anozokubarira mwana, uye iwewe unodikana kumupasa zina rokuti Juau.
14 Iwewe ucapfara no kupfarisisa, uye anhu akawanda acapfara ngo kubarhwa kake,
15 ngokuti iyena acagara mukuru pa maonero a Djehovha.* Asi aadikani kumwa vhinyu kana zvokumwa zvimweni zvinoraradzisa, uye acadzadzwa no mwiya mucena kunyazi asati abarhwa,*
16 uye acaita kuti ana akawanda e Israeri ahwirire kuna Djehovha* Mwari wawo.
17 Uyezve, acaenda mberi kake no mwiya uye no simba ra Eriya, kuti aite kuti mwoyo yo madzibaba igare hinga yo ana uye kuti ahwirinze apanduki mu ungwaru we anatsi, kuti aite kuti Djehovha* agare no anhu akagadzirira.”
18 Zakariya wakabvunza ngirozi kuti: “Ndingazvigonda kudini? Ngokuti inini ndacembera, uye mukadzi wangu wacemberawo.”
19 Ngirozi yakamudaira kuti: “Ndini Gabriyeri, anogara pamberi pa Mwari, uye ndatumwa kuti ndiuye kooreketa na iwewe uye kukuziisa masoko aya akanaka.
20 Kubvira zvino iwewe aucareketi dakara pa nguwa icaitika zviro izvi, ngokuti auzi kutenda masoko angu, acadzadzika pa nguwa yakagadzwa.”
21 Nguwa yese ii, anhu ainga acakaimira Zakariya uye akashamiswa ngokuti iyena wainga ecinonoka maningi mu mbuto yakacena.
22 Paakabuda, wainga asikakwanisi kureketa nawo, uye awona akazwisisa kuti iyena wainga aona cishamiso* mu mbuto yakacena. Iyena wakarumbwa ecireketa no nyara, asi wainga asikakwanisi kureketa no muromo.
23 Djana rake rokuita mabasa mu tempro parakapera, iyena wakaenda kumba.
24 Mumasure me mazuwa manganani, Erizabheti mukadzi wake wakabata pamwiri, uye iyena wakagara kumba ke mwedzi mishanu, iyena waiti:
25 “Izvi ndizvo zvandaizirhwa na Djehovha* mazuwa ano. Iyena andirangarirawo uye abvisa kupsveruka kangu pakati pe anhu.”
26 Paainga ano mwedzi mitanhatu, ngirozi inozwi Gabriyeri yakatumwa na Mwari kuti iyende ku thaundi re Garireya rinozwi Nazareta,
27 ku mhandwe yainga yagondeswa kuwakwa no mwanarume waizwi Zuzee we dzinza ra Dhavhidhi, mhandwe yakhona yaizwi Mariya.
28 Payakaguma paainga aari, ngirozi yakamuti: “Ucaita wani Mariya, iwewe wazwirhwa nyasha dzakakura, Djehovha* anewe.”
29 Asi iyena wakanetseka maningi no masoko aya, eciedza kuzwisisa kuti kucungamidzwa uku kunoreyei.
30 Hino ngirozi yakati kaari: “Usathye hako Mariya, ngokuti wazwirhwa nyasha na Mwari.
31 Zvino iwewe ucabata pamwiri uye ucabara mwana, uye unodikana kumupasa zina rokuti Djesu.
32 Iyena acagara mukuru uye acadainzwa Mwana we Wekumusoro-soro, uye Djehovha* Mwari acamupasa cigaro ce umambo ca Dhavhidhi baba ake,
33 uye iyena anozogara Mambo nokusikaperi pa nyumba ya Djakobo, uye Umambo wake auzogari no mugumo.”
34 Asi Mariya wakati ku ngirozi: “Izvi zvicaitika kudini sezvo andisati ndakambowata no mwanarume?”
35 Ngirozi yakamudaira kuti: “Mwiya mucena ucauya pauri, uye simba re Wekumusoro-soro ricakufukidza. Ndiyo ndaa uya acabarhwa acadainzwa mucena, Mwana wa Mwari.
36 Uye ziya kuti Erizabheti nyaukama wako uya unoziikanwa kuti aabari acabarawo mwana, kunyazi hazvo wacembera, uye uno ndi mwedzi wake wecitanhatu;
37 ngokuti apana zvinoziiswa na Mwari zvaangakonerhwa kudzadzisa.”
38 Hino Mariya wakati: “Inini ndiri muranda wa Djehovha!* Ngazviitike na inini maererano no zvamabhuya.” Ngokudaro ngirozi yakaenda.
39 Mu mazuwa awona, Mariya wakaenda nokukasika ku mutanha we matunhu, ku thaundi rimweni re Djudha,
40 uye wakapinda mumba ma Zakariya wocungamidza Erizabheti.
41 Erizabheti paakazwa Mariya ecimucungamidza, mwana wainga ari mu ndani make wakatamba-tamba, uye Erizabheti wakadzadzwa no mwiya mucena
42 uye wakabhuya no izwi guru eciti: “Wakakomborerhwa iwewe pakati pe anakadzi amweni, uye wakakomborerhwa mwana ari mu ndani mako!
43 Kodi inini ndiri aniwo kamare, kuti ndivhakacirhwe na mai a Tenzi wangu?
44 Ngokuti pandazwa izwi rako wecindicungamidza, mwana ari mu ndani mangu watamba-tamba ngo mupfaro.
45 Anopfarawo uya wakatenda zvaakabvunzwa, ngokuti zviro izvi zvaakabvunzwa na Djehovha* zvicadzadzika kamare.”
46 Mariya wakati: “Mwiya wangu unokudza Djehovha,*
47 uye mwoyo wangu uri kupfara maningi nge ndaa ya Mwari, muponesi wangu,
48 ngokuti aona urombo we muranda wake. Kubvira zvino kuenda mberi mibarirhwana yese icabhuya kuti ndiri mwanakadzi anopfara,
49 ngokuti Mwari we simba andiitira zviro zvikuru, zina rake rakacena,
50 uye ku mibarirhwana no mibarirhwana usisi wake uri pane aya anomuthya.
51 Iyena aseenzesa simba ro moko wake; aparadzanisa aya ano mwoyo inoronga zviro zve kudzikudza.
52 Abvisa pa zvigaro zve umambo anhu ane masimba uye akudza anodzidodosa;
53 anyasa kugutisa no zviro zvakanaka aya ano nzara uye aita kuti aya ainga ano upfumi aende asina ciro.
54 Iyena auya koobetsera museenzi wake Israeri, eciedzurira usisi wake usikaperi,
55 kuna Abrahamu no ana* ake, hinga zvaakapikira ku madzitsekuru edu.”
56 Mariya wakagara na Erizabheti ke mwedzi ingakwana 3, pedzepo wakahwirira kumba kake.
57 Yakazoguma nguwa yekuti Erizabeti abare, uye iyena wakabara mwana we mwanarume.
58 Uye anyacigarisano no anyaukama ake akazwa kuti Djehovha* ainga amuzwira usisi wakakura, uye akapfara pamwepo naye.
59 Pa zuwa rocisere akaenda kooita ucekeri mwanewo, uye aida kumupasa zina ra baba ake rokuti, Zakariya.
60 Asi mai ake akati: “Haiwa! Iyena acadainzwa kuti Juau.”
61 Ngokudaro, akamubvunza kuti: “Apana nyaukama wenyu ano zina iri.”
62 Akabvunzisa baba ake no nyara kuti aida kuti mwanewo adainzwe kudini.
63 Iyena wakakumbira citabwa uye wakatara kuti: “Zina rake ndi Juau.” Ngokudaro, ese akashamiswa ndizvo.
64 Pa nguwa imweyo, muromo wake wakafunguka uye rurimi rake rakasudzunuka uye iyena wakatanga kureketa ecikudza Mwari.
65 Anyacigarisano awo ese akathya, uye zviro izvi zvakatanga kubararika mu nharaunda yese ye matunhu ye Djudhiya.
66 Ese akazvizwa akazvicengeta mu mwoyo, eciti: “Mwana uu ucagara munhu wakaita kudini?” Ngokuti zvezvirokwazvo nyara ya Djehovha* yainga iri paari.
67 Ngokudaro, Zakariya baba ake akadzara no mwiya mucena, uye akaphorofita, eciti:
68 “Ngaakudzwe Djehovha,* Mwari we Israeri, ngokuti arangarira ngezve anhu ake uye aaunzisira ruponeso.
69 Iyena atimutsira muponesi ano simba* pa nyumba ya Dhavhidhi musenzi wake,
70 hinga zvaainga areketa eciseenzesa aphorofita ake acena e kare,
71 kuti atiponese pa azondi edu uye pa nyara dzo ese aya anotizonda;
72 kuti apangidzire usisi panocokuita no madzitsekuru edu uye kuti aedzurire citenderano cake cicena,
73 mhiko yaakaitira Abrahamu tsekuru edu,
74 yokutipasa mukana wokumuitira basa rakacena, mumasure me kuponeswa mu nyara dzo azondi edu,
75 takagondeka uye no unatsi pamberi pake mazuwa edu ese.
76 Asi iwewe mwanangu, unozodainzwa muphorofita we Wekumusoro-soro, ngokuti unozoenda mberi ka Djehovha* kuti umugadzirire makwanza ake,
77 kuti apase anhu ake ruziyo re ruponeso peciseenzeswa kurekererhwa ke zvitema zvawo,
78 nge ndaa yo usisi ukuru wa Mwari wedu. Nge ndaa yo usisi uu, ciedza cicativhakacira cecibva kumusoro hinga kuedza ke zuwa,
79 kuti avhenekere aya akagara mu cidima uye mu bvute re rufu uye kuti atungamirire tsoka dzedu mu gwanza re runyararo.”
80 Uye mwanewo wakakura uye wakazogara no ndangariro dzakanaka, uye wairumbwa ari ku renje dakara zuwa raakazodzipangidza pamhene kuna Israeri.
Masoko ari pasi
^ Kana kuti: “tinonyasa kuzvitendawo.”
^ Onai pakazwi Kupanganidzwa ke Masoko.
^ Kana kuti: “Izabheri.”
^ Onai Apendi. A5.
^ Onai Apendi. A5.
^ Onai Apendi. A5.
^ Onai Apendi. A5.
^ Kana kuti: “kunyazi aciri mu ndani ma mai ake.”
^ Onai Apendi. A5.
^ Onai Apendi. A5.
^ Kana kuti: “cioneso.”
^ Onai Apendi. A5.
^ Onai Apendi. A5.
^ Onai Apendi. A5.
^ Onai Apendi. A5.
^ Onai Apendi. A5.
^ Onai Apendi. A5.
^ Cigrego: “mbeu yake.”
^ Onai Apendi. A5.
^ Onai Apendi. A5.
^ Onai Apendi. A5.
^ Cigrego: “nyanga ye ruponeso; Nyanga.” Onai pakazwi Kupanganidzwa ke Masoko.
^ Onai Apendi. A5.
