Akatarhwa na Ruka 10:1-42
10 Mumasure me izvona, Tenzi akasanangura afundi amweni 70 uye akaatuma mberi kake ari airi-airi mu mathaundi ese ne mbuto dzokuti iyena aizoendeyo.
2 Hino iyena akaabvunza kuti: “Zvezvirokwazvo basa re kukorora i guru, asi aseenzi ashoma. Ngokudaro, kumbirai muridzi we munda kuti atumire aseenzi amweni kuzokorora munda wake.
3 Endai! Ndiri kumutumai hinga mabira pakati pe mhumhi.
4 Musatore cibudu ce kukandira mare, kana cibudu ce kukandira zvokurhya, kana masandarya, uye musacungamidze* munhu mu gwanza.
5 Pa nyumba yese yamunoguma, tangai mati: ‘Pa nyumba pano ngapagare mu runyararo.’
6 Uye kana ipona pano shamwari ye runyararo, runyararo renyu ricagara paari. Asi kana pasina, ricahwirira kamuri.
7 Ngokudaro, garai pa nyumba iyona, mecirhya uye mecimwa zviro zvaanomupasai, ngokuti museenzi wakasisira kutambira mubairo wake. Musagare mecicinja-cinja pokugara.
8 “Uye kwese kamunonga mapinda mu thaundi uye motambirhwa zvakanaka, irhyai zvamunonga mapaswa,
9 poresai anorhwara anogara mu thaundi irona uye abvunzei kuti: ‘Umambo wa Mwari wakhwedera kamuri.’
10 Asi kwese kamunopinda mu thaundi uye anhu otama kumutambirai zvakanaka, endai mu makwanza makuru uye moti:
11 ‘Isusu tiri kugugudza kunyazi bukuta re mu thaundi renyu riri mu tsoka dzedu hinga upupuri kamuri. Asi ziyai kuti Umambo wa Mwari waapadhuze.’
12 Ndinomubvunzai kuti zvicaitika ku Sodhoma pa zuwa irona, zviri nani pane zvicaitika ku thaundi irona.
13 “Une nyathwa iwewe Korazini! Une nyathwa iwewe Bhetisaidha! Ngokuti kudai mabasa anoshamisa akaitika mamuri ainga aitika ku Tiro no Sidhoni, mathaundi aya angadai akacinyuka kare-kare, osimira masakhu uye ogara pa marota.
14 Ndiyo ndaa, pa zuwa ro kutongwa zvinonga zviri nani mu nyika yo Tiro no Sidhoni pane zvicaitika kamuri.
15 Uye iwewe Kafarnau, uri kuti ucakwidziridzwa kudenga here? Ucatoenda mu Guwa!*
16 “Uya anomupurutanai anondipurutanawo. Uye uya anomushorai anondishorawo. Uyezve, uya anondishora anoshorawo Uya akandituma.”
17 Afundi aya 70 akahwirira ecipfara, eciti: “Tenzi, kunyazi madhimoni ari kutizwira ngo kuseenzesa zina renyu.”
18 Ngokudaro, Djesu akaabvunza kuti: “Ndiri kuona Sathani watombwera hinga mheni yecibva kudenga.
19 Purutanai! Inini ndamupasai simba ro kutsika nyoka ne nyakon’a, no simba rese re kukunda muzondi, apana cicamukuwadzai.
20 Kunyazi zvakadaro, musapfare ngokuti mwiya iri kumuzwirai, asi pfarai ngokuti mazina enyu atarhwa kudenga.”
21 Pa nguwa iyona, mwiya mucena wakaita kuti Djesu apfare maningi uye akati: “Ndinomukudzai pamberi pe anhu Baba, Tenzi we denga no nyika, ngokuti zviro izvi amuzi kuzvipangidza ku anhu ano uzii no akangwara asi makazvipangidza ku ana adoko. Honde Baba, ngokuti ndiwona maitiro amunoda.
22 Zviro zvese ndakazvipaswa na Baba angu, akuna anonyasa kuziya Mwana kupinda Baba, uye akuna anonyasa kuziya Baba kupinda Mwana no uya wekuti Mwana anoda kumuziisa kuti Baba akaita kudini.”
23 Ngokudaro, iyena akatendeukira afundi ake uye akaabvunza ari oga kuti: “Anopfara madziso anoona zvamuri kuona.
24 Ndinomubvunzai kuti, aphorofita akawanda no madzimambo aida kuona zviro zvamuri kuona asi aazi kuzviona, uye aida kuzwa zvamuri kuzwa asi aazi kuzvizwa.”
25 Mwanarume umweni wainyasa kuziya Mutemo wakapurumuka kuti amuedze uye wakati: “Mufundisi, ndinodikana kuitei kuti ndione upenyu usikaperi?”
26 Iyena akamubvunzisa kuti: “Zvinyi zvakatarhwa mu Mutemo? Unoerenga kudini?”
27 Mwanarumewo wakamudaira kuti: “‘Ida Djehovha* Mwari wako no mwoyo wako wese, no upenyu* wako wese, no simba rako rese uye no ndangariro dzako dzese,’ uyezve ‘ida mudoni wako hinga mushobo waunodziita.’”
28 Djesu akamubvunza kuti: “Iwewe wadaira zvakanaka; rumbwa weciita izvona uye ucaona upenyu.”
29 Asi mwanarumewo ecida kupangidza kuti ndi munatsi, wakabvunzisa Djesu kuti: “Mudoni wangu ndiani kamare?”
30 Djesu akamudaira kuti: “Mwanarume umweni waibva ku Djerusarema eciteredza ku Djeriko, wakasongana no mabhinya, uye awona akamuponda, omutorera zvese uye akamusiya waakuda kufa.
31 Mupristi umweni waitopindawo hake eciteredza ngo gwanza irona, asi paakamuona, wakapinda ngo dii rimweni ro gwanza.
32 Ngo mushobo umwewo, Murevhi umweni paakagumawo ipona womuona, wakapinda ngo dii rimweni ro gwanza.
33 Asi Musamariya umweni paaiita rhwendo ngo gwanza irona, wakamugumirepo uye paakamuona wakamuzwira usisi.
34 Hino wakakhwedera paainga ari, wakakanda pa maronda ake mafuta no vhinyu. Uye pedzepo wakaapomboredza no zvidjira, hino wakamukwidza pa dhongi rake woenda naye ku nyumba inotambirhwa ari pa rhwendo uye womuriritira.
35 Pa zuwa rakazoteera wakabvisa madhenariyo* mairi, wopasa museenzi wo panyumbepo, womubvunza kuti: ‘Muriritire zvakanaka, ukaseenzesa mare yakawanda kupinda ii, ndinozokuhwirinzira ndikahwirira.’
36 Pa atatu aya, unorangarira kuti ndiupi wakapangidza kuti ndi mudoni we mwanarume wakasongana no mabhinya?”
37 Iyena wakadaira kuti: “Uya wakamuzwira usisi.” Hino Djesu akamubvunza kuti: “Enda uye itawo zvimwezvo.”
38 Djesu paainga aakuenda, akapinda mu mutanha umweni. Uye mwanakadzi umweni waizwi Marta wakamutambira pa nyumba pake.
39 Marta wainga ano hama yake yo mwanakadzi yaizwi Mariya, uye yainga yakagara pasi padhuze no tsoka dza Tenzi ecipurutana zvaaireketa.*
40 Asi Marta wainga wakaarairhwa ngo kubatikana no mabasa akawanda. Ngokudaro iyena wakaenda kuna Djesu uye wakati: “Tenzi, amuripi kuona kuti Mariya wandisiya kuti ndiite ndega mabasa? Mubvunzei kuti auye koondibetsera.”
41 Tenzi akamudaira kuti: “Marta, Marta, uri kudzirhya mwoyo uye uri kunetseka no zviro zvakawanda.
42 Asi, apadikani zviro zvakawanda, ciro cimwe basi cingakwana. Mariya pacake, wasanangura ciro cakanaka, uye apana acamutorera.”
Masoko ari pasi
^ Kana kuti: “musakhumbatire anhu pamunonga meciacungamidza.”
^ Kana kuti: “mu Hadhesi,” kureya guwa rinokandwa anhu ese. Onai pakazwi Kupanganidzwa ke Masoko.
^ Onai Apendi. A5.
^ Kana kuti: “mwiya.” Onai pakazwi Kupanganidzwa ke Masoko.
^ Onai Apendi. B14.
^ Cigrego: “masoko ake.”
