Akatarhwa na Ruka 11:1-54
11 Zuwa rimweni Djesu ainga ari pa mbuto imweni eciita munamato, paakapedza, umwe we afundi ake wakamubvunza kuti: “Tenzi, tifundiseiwo kunamata, hinga Juau paakafundisa afundi ake kunamata.”
2 Hino iyena akaabvunza kuti: “Pese pamunonamata, bhuyai kudai: ‘Baba, zina renyu ngariceneswe.* Umambo wenyu ngauuye.
3 Tipasei zvokurhya zvedu zve zuwa ne zuwa maererano no zvatinoda pa zuwa irona.
4 Tirekererei zvishaishi zvedu, ngokuti isusu tinorekererawo ese aya anotishaishira; uye musatirekere tecipinda mu muedzo.’”
5 Hino iyena akaabvunza kuti: “Ngatimboti umwe wenyu ano shamwari yake uye woipsvaka pakati po usiku, woibvunza kuti: ‘Shamwari, ndipasewo pau nhatu,
6 ngokuti shamwari yangu yaguma zvino kubva pa rhwendo uye inini andina cokuipasa.’
7 Asi iyena unodaira nge mumba eciti: ‘Usandinyangadze, musuwo wakatofungwa uye ana angu akawata na inini pa kama. Azviiti kuti ndimuke ndikupase ciro.’
8 Ndinomubvunzai kuti, zvezvirokwazvo iyena acamuka womupasa zvese zvaanoda, aamupasi nge kugara shamwari yake asi nge kurumbwa kake ecideketera.
9 Hino ndinomubvunzai kuti, rumbwai mecikumbira uye mucapaswa; rumbwai mecipsvaka uye mucaona; rumbwai mecigogodza uye mucafungurirhwa.
10 Ngokuti wese anokumbira anopaswa, wese anopsvaka anoona, uye wese anogogodza acafungurirhwa.
11 Zvezvirokwavo, ndiani wenyu wekuti kana mwana wake akamukumbira howe, anomupasa nyoka pane kumupasa howe?
12 Kana kuti akamukumbirawo zanda, anomupasa nyakon’a here?
13 Hino kana imwimwi mecikwanisa kupasa ana enyu zviro zvakanaka kunyazi muri anhu akashata, zvakadiniwo na Baba enyu ari kudenga, angatamawo here kupasa mwiya mucena ku aya anoakumbira?”
14 Pa nguwa imweni, iyena akadzingira dhimoni raiitisa kuti munhu akonerhwe kureketa. Mumasure mekuti dhimoniro rabuda, mwanarumewo wakatanga kureketa, uye anhu akashamisika nazvo.
15 Asi anhu anganani akati: “Iyena anodzingira madhimoni no simba ra Bherizebhu,* mutongi we madhimoni.”
16 Uye amweni kuti amuedze, akatanga kukumbira cipangidzo ce kudenga.
17 Eciziya ngezve marangariro awo, iyena akati kaari: “Umambo wese usikazi kubatana unozopera, uye nyumba yese isikazi kubatana inozombwera.
18 Ngo mushobo umwewo, kana Sathani asikazi kubatana pacake, Umambo wake ungarumbwa kudini wakaima? Ngokuti imwimwi mabhuya kuti inini ndinodzingira madhimoni no simba ra Bherizebhu.
19 Kana ndecidzingira madhimoni no simba ra Bherizebhu, ana enyu anoadzingira no simba raani? Ndiyo ndaa acamutongai.
20 Asi kana ndecidzingira madhimoni no cikunwe ca Mwari, Umambo wa Mwari waguma kamuri.
21 Kana mwanarume ano simba, ano zvokurhwa nazvo zvakakwana akacengeta nyumba yake, apana anotora zviro zvake.
22 Asi kana munhu umweni ano simba kupinda iyena akamurhwisa uye womukunda, anomutorera zviro zvese zvokurhwa nazvo zvaaigonda, wokowanisa zvese zvaamutorera.
23 Munhu wese asiripi ku dii rangu anorhwisana na inini, uye wese asikaunganidzi anhu na inini anoparadzanisa.
24 “Mwiya wakashata paunobuda pa munhu, unopinda nge mbuto isina mvura wecipsvaka mbuto ye kuzororera, kana ukaikonerhwa unoti: ‘Ndicahwirira kumba kangu kandakabva.’
25 Paunoguma, unogumira nyumba iyona yakapsvairhwa uye yakarongwa zvakanaka.
26 Hino uwona unoenda, wounzisa mwiya 7 yakashata kudarika uwona, uye inopinda yotanga kugaremo. Mugariro we munhu uu unonyanya kushata kudarika pakutanga.”
27 Paainga ecireketa, mwanakadzi umweni wakakhuwa pakati pe anhu no izwi guru eciti: “Inopfara ndani yakamubarai uye mazamu akamuamwisai!”
28 Asi iyena akati: “Haiwa, pane kudaro, anopfara ndi uya anozwa soko ra Mwari uye oriseenzesa!”
29 Anhu paainga eciungana, iyena akatanga kubhuya kuti: “Mubarirhwana uu wakashata; uri kupsvaka cipangidzo, asi apana cipangidzo caucapaswa kunza ke cipangidzo ca Djona.
30 Ngokuti kuitawo hingana Djona wainga ari cipangidzo ku Aninivhi, ndizvoo zvicaita Mwana we munhu ku mubarirhwana uu.
31 Mambokadzi we kakutsi anozomutswa pa kutongwa pamwepo no mubarirhwana uu uye anozoupasa ndaa, ngokuti iyena wakabva kure kuti azwe ungwaru wa Soromoni. Asi munhu mukuru kupinda Soromoni ari pano.
32 Anhu e ku Ninivhi anozomutswa pa kutongwa pamwepo no anhu e mubarirhwana uu oupasa ndaa, ngokuti awona akacinyuka no masoko akaparidzirhwa na Djona. Asi munhu mukuru kupinda Djona ari pano.
33 Mumasure me kubakidza cibani, apana anocikanda pakaigika kana kucidumhaidza nge citengu,* asi anocikanda pakanyasa kukwirira, kuti ese anopindemo avhenekerhwe.
34 Ruvheneko re mwiri i dziso. Kana dziso rako rakaringira ciro cimwe basi, mwiri wako wese unogara wakadjeka; asi kana dziso rako rino bibvu,* mwiri wako wese unozogara mu cidima.
35 Ndiyo ndaa, ngwarira kuti ruvheneko riri mauri risagare cidima.
36 Hino, kana mwiri wako wese wakadjeka usina kana pano cidima, wese unonga wakadjeka kuitawo hingana cibani pacinokuvhenekera.”
37 Mumasure me kubhuya izvi, Mufarisi umweni wakamukumbira kuti arhye pamwepo naye. Ngokudaro, iyena akapinda uye ogara pa meza.
38 Asi Mufarisiwo wakashamiswa nge kuona kuti Djesu aazi kukarawa nyara* asati arhya.
39 Asi Tenzi akamubvunza kuti: “Imwi Afarisi, munosuka nge cekunza kopo no paratu, asi mukati menyu makadzara no makaro uye ushaishi.
40 Mapenzi! Uya akaita kunza, akaitawo mukati, andizvopi?
41 Hino pasai arombo zvecibva mukati menyu, uye zviro zvese zvinocokuita na imwimwi zvinozoceneswa.
42 Mune nyathwa imwimwi Afarisi, ngokuti munopasa cegumi ce minti, arudha* no mishobo yese yo masakani, asi munosiya kutonga no unatsi uye rudo ra Mwari! Zviro izvi maidikana kuzviita, asi musikasii kuita zvimweni zvakhona.
43 Mune nyathwa imwimwi Afarisi, ngokuti munoda kugara pa mbuto dzekutanga* mu masinagoga uye kucungamidzwa mu mabazari!
44 Mune nyathwa imwimwi, ngokuti makaita hingana makuwa* asikanyasi kuoneka* uye anhu anohamba pa musoro pawo asikazvizii!”
45 Umwe wainyasa kuziya Mutemo wakamudaira kuti: “Mufundisi, pamuri kubhuya zviro izvi, muri kutitukawo.”
46 Hino Djesu akati: “Mune nyathwa imwimwiwo azii e Mutemo, ngokuti munopasa anhu mutoro unoshupha kuthwara, asi imwimwi amutoupsvasi kunyazi no cikunwe!
47 “Mune nyathwa imwimwi, ngokuti munowaka makuwa* e aphorofita, asi madzitsekuru enyu ndiwo akaauraya!
48 Zvezvirokwazvo, imwimwi muri apupuri e zviya zvakaizwa no madzitsekuru enyu, asi kunyazi zvakadaro munotenderana nazvo, ngokuti awona akauraya aphorofita, asi imwimwi muri kuwaka makuwa awo.
49 Ndiyo ndaa Mwari no ungwaru wake akati: ‘Ndicaatumira aphorofita no aphostori, uye awona acaauraya no kuteerera anganani awo,
50 kuti anhu e mubarirhwana uu agare no ndaa yo ngazi yo aphorofita ese akafa kubvira pakutanga ke nyika,
51 kubvira ku ngazi ya Abheri dakara ku ngazi ya Zakariya, wakauraiwa pakati pe artari no nyumba.* Honde, ndinomubvunzai kuti, mubarirhwana uu ucagara no ndaa yo ngazi.
52 “Mune nyathwa imwimwi azii e Mutemo, ngokuti makatora shavhi yo uzii. Imwimwi wene amuzi kupinda, uye munoedza kuita kuti anoda kupinda asapinde!”
53 Paakabuda ipona, atari no Afarisi akatanga kumuitira hasha ecimubvunzisa zviro zvakawanda,
54 ecimuteyera murau kuti amubate pa masoko ake.
Masoko ari pasi
^ Kureya kuti rinodikana kukudzwa kana kureremedzwa ngokuti irona rakacena.
^ Iri i zina rinopaswa Sathani.
^ Kana kuti: “citengu ce kupima naco.”
^ Cigrego: “rakashata.”
^ Kureya kuti aazi kukarawa nyara maererano no tsika dze Adjudha.
^ Izvi zvaikandwa mu zvokurhya kuti zvinuhwirire uye zvinake.
^ Kana kuti: “dzakanakisisa.”
^ Kana kuti: “makuwa e anoedzurirhwa.”
^ Kana kuti: “asina zvipangidzo.”
^ Kana kuti: “makuwa e anoedzurirhwa.”
^ Kana kuti: “tempro.”
