Akatarhwa na Ruka 14:1-35
14 Pa zuwa rimweni, iyena akaenda koorhya pa nyumba pe mutungamiriri umweni we Afarisi mu Sabudu, uye awona ainga ecinyasa kumuringira.
2 Uye pamberi pake painga pano mwanarume umweni wainga uno nhenda ye kuzvimba mwiri.*
3 Ngokudaro, Djesu akabvunzisa azii e Mutemo no Afarisi kuti: “Zvinotenderhwa here kana kuti haiwa kuporesa munhu mu Sabudu?”
4 Asi awona akarumbwa akanyarara. Hino iyena akabata mwanarumewo, omuporesa, uye omubvunza kuti aende.
5 Hino iyena akati kaari: “Ndiani wenyu, wekuti kana mwana wake kana kuti n’ombe yake ikambwerera mu cimbo mu Sabudu, aaibvisimo nokukasika?”
6 Awona aazi kukwanisa kumudaira.
7 Djesu paakaona kuti anhu ainga apikwa aidzisanangurira mbuto dzakakwirira, iyena akaaitira muezaniso. Oabvunza kuti:
8 “Kana ukapikwa pa mabiko e mucato, usagare pa mbuto yakakwirira. Pamweni munhu umweni wakakwirira kupinda iwewe wapikwawo.
9 Uya wamupikai acauya kauri, wokubvunza kuti: ‘Siya kuti mwanarume uu agare pawakagara,’ iwewe ucabudepo woenda koogara ku mbuto yokupedzesera wecipsveruka.
10 Asi kana ukapikwa, enda koogara ku mbuto yokupedzesera, kuitira kuti munhu akupika azokubvunze kuti: ‘Shamwari, enda koogara pa mbuto yakakwirira.’ Hino iwewe ucareremedzwa pamberi pe anhu ese.
11 Ngokuti munhu wese anodzikudza acadodoswa, uya anodzidodosa acakudzwa.”
12 Akabvunzawo mwanarume wainga wamupika kuti: “Paunogadzirira kuti upike anhu kuti auye koosvusvura kana kurarira pa nyumba pako, usapike shamwari dzako, kana hama dzako, kana anyaukama ako, kana anyacigarisano ako akapfuma. Kana ukadaro, awona anozokwanisawo kukupika, zvoita hingana kuti ari kukuripa ngo zviya zvawaaitira.
13 Asi paunopika anhu kuti auye ku mabiko, pika arombo, zvigono, anokhabinya, no mapofu;
14 uye iwewe ucapfara, ngokuti aana caanozokuripa naco. Ngokuti iwewe ucariphwa pacamutswa anatsi.”
15 Paakazwa izvi, umwe we aya ainga apikwa wakamubvunza kuti: “Anopfara uya anorhya* mu mabiko e Umambo wa Mwari.”
16 Djesu akamubvunza kuti: “Mwanarume umweni wainga ecigadzirira mabiko akakura, uye wakapika anhu akawanda.
17 Iyena wakatuma muranda wake pa nguwa yokurhya kuti abvunze aya ainga apikwa kuti: ‘Uyai, ngokuti zviro zvese zvapera kugadzirirhwa.’
18 Asi ese akatanga kuramba. Wokutanga wakabhuya kuti: ‘Ndatenga munda wangu, ndinodikana kuenda koouona; ungandirekererawo hako.’
19 Uye umweni wakati: ‘Ndatenga n’ombe gumi dzokurima nadzo uye ndiri kuenda koonyasa kudziona; ungandirekererawo hako.’
20 Umwenizve wakati: ‘Ndabva kucata zvino, ndiyo ndaa andikwanisi kuuyeyo.’
21 Hino muranda uya wakahwirira, wobvunza tenzi wake zvese. Muridzi we nyumba wakanyangadzwa uye wakati ku muranda wake: ‘Enda nokukasika mu makwanza makuru no madoko e muthaundi, uunzise arombo, akaremara, mapofu no anokhabinya.’
22 Paakahwirira, muranda uya wakati: ‘Tenzi, zvamabhuya kuti zviizwe zvaizwa, asi pacino mbuto.’
23 Hino tenziwo wakati ku muranda wake: ‘Enda mu makwanza makuru no madoko ubambidzire anhu kuti auye kuno, kuti nyumba yangu idzare.
24 Ngokuti ndinomubvunzai kuti, apana kunyazi umwe we aya ainga apikwa acaraira zvokurhya zvangu.’”
25 Anhu akawanda ainga eciita rhwendo naye, iyena akaringira sure, oabvunza kuti:
26 “Kana munhu akauya kandiri uye wotama kuzonda baba ake, mai ake, mukadzi wake, ana ake, hama dzake, hanzvadzi dzake, honde, kunyazi upenyu* wake kamare, aangakwanisi kugara mufundi wangu.
27 Munhu wese asikathwari mutanda wake we kutambudzikira* wotama kunditeera, aangakwanisi kugara mufundi wangu.
28 Hinga muezaniso, ndiani wenyu wekuti kana ecida kuwaka nyumba aambotangi kugara pasi omboerenga zvaanazvo kuti aone kuti ano zvinokwana here kuti apedze kuiwaka?
29 Akatama kuita kudaro, angatanga kuiwaka ozokonerhwa kuipedzesa, ese anozozviona anozotanga kumuseka,
30 eciti: ‘Mwanarume uu watanga kuwaka nyumba asi aazi kukwanisa kuipedzesa.’
31 Kana kuti ndi mambo upi anoti kana ecida kuenda koorhwisana na mambo umweni asikatangi agara pasi opangana mazano no amweni kuti aone kana ecikwanisa kurhwisa masurudado 20 000 nepoo iyena ano masurudado 10 000?
32 Kana akaona kuti aazvikwanisi, paanonga aciri kure, anotuma aimiriri kuti aende kookumbira kuti agarisane mu runyararo.
33 Ngo mushobo umwewo, garai makaziya kuti apana kana umwe wenyu angakwanisa kugara mufundi wangu kana akatama kusiya zviro zvake zvese.
34 “Zvezvirokwazvo, munyu wakanaka. Asi kana munyu ukatama kurungura, ndiani ucaita kuti urungurezve?
35 Auzoseenzi ciro kana ku mataka kana kuita ndimo. Anhu anozoupsveta. Ano nzee dzo kuzwa, ngaazwe.”
Masoko ari pasi
^ Mu Ciputukezi nhenda ii inozwi idropiziya kana kuti edhema.
^ Cigrego: “anorhya pau.”
^ Kana kuti: “mwiya.”
^ Onai pakazwi Kupanganidzwa ke Masoko.
