Ruka 16:1-31
16 Hino iyena akabvunzawo afundi ake kuti: “Mupfumi umweni wainga uno muonereri* wake waipambadzirhwa kuti waishaisha kuseenzesa upfumi wa tenzi wake.
2 Hino iyena wakamudainza uye wakamubvunza kuti: ‘Zvinyi izvi zvandiri kuzwa nge zvako? Enda kootara zvawatara zvinopangidza maseenzesere awakaita mare yangu, ngokuti andicadi kuti uonerere nyumba yangu.’
3 Muonereriwo wakareketa nge ce mu mwoyo kuti: ‘Zvino ndicaitei, sezvo tenzi wangu ari kundibvisa pa basa re kuonerera nyumba? Inini andina simba re kurima, uye ndinopsveruka kuhamba ndecikumbira zviro.
4 Yaa! Ndaziya zvandicaita kuti kana ndikabviswa pa basa rangu re kuonerera nyumba, anhu azonditambire pa nyumba dzawo.’
5 Uye iyena wakadainza aya aifiyari tenzi wake uye wakabvunzisa wekutanga kuti: ‘Uri kufiyari tenzi wangu mutengoi?’
6 Iyena wakamudaira kuti: ‘Ndiri kufiyari mipimo* 100 ye mafuta e miorivhi.’ Muonereriwo wakamubvunza kuti: ‘Tora nokukasika phepha rawakasinari, utare 50.’
7 Uye wakabvunzisazve umweni kuti: ‘Kuzotiwo iwewe, uri kufiyari mutengoi?’ Iyena wakadaira kuti: ‘Mipimo mikuru* 100 yo trigu.’ Muonereriwo wakamubvunza kuti: ‘Tora phepha rawakasinari, utare 80.’
8 Muonereriwo wakasimbwa na tenzi wake, kunyazi hazvo aazi kuita zve unatsi, ngokuti wakaseenzesa ungwaru;* ana e nyika ino* anopangidza ungwaru ku mubharirhwana wawo kudarika aseenzi a Mwari.
9 “Ndinomubvunzaiwo kuti: Itai ushamwari no amweni meciseezesa upfumi we nyika ino yakashata, kuitira kuti kana ukapera, ozomutambirai mu mbuto dzo kugara nokusikaperi.
10 Munhu akatendeka pa zviro zvidoko akatendekawo pa zviro zvakawanda, munhu asikazi kutendeka pa zviro zvidoko aazi kutendekawo pa zviro zvakawanda.
11 Ngokudaro, kana imwimwi mukatama kupangidza kuti makatendeka pa kuseenzesa upfumi we nyika ino yakashata, ndiani acazomupasai basa re kuonerera upfumi we zvirokwazvo?
12 Uye kana imwimwi mukatama kupangidza kuti makatendeka pa kuseenzesa zviro zve munhu umweni, ndiani acamupasai upfumi wenyu kamare?
13 Apana munhu angakwanisa kuseenzera madzitenzi mairi, ngokuti anozozonda umwe, oda umweni, kana kuti anozoreremedza umwe, oshora umweni. Amukwanisi kugara aseenzi a Mwari no e upfumi.”
14 Afarisi aidisa maningi mare, aipurutana zvese izvi, uye awona akatanga kumuseka.
15 Hino iyena akati kaari: “Imwimwi muri aya anodziita anatsi pamberi pe anhu, asi Mwari anoziya zviri mu mwoyo menyu. Ngokuti zviro zvinooniwa nge anhu kuti zvakanaka kuna Mwari azvizi kunaka.
16 “Mutemo no aphorofita zvakagumira dakara pana Juau. Kubvira ipona, Umambo wa Mwari uri kuziiswa hinga masoko akanaka, Umambo uu ndiwona uri kupsvakisiswa no anhu e madzinza ese.
17 Zvezvirokwazvo, zviri nyore kuti denga no nyika zvidarike pane kuti karetra kamwe basi ke Mutemo katame kudzadzika.
18 “Munhu wese anoramba mukadzi wake owaka umweni ari kuita upombwe,* uye munhu wese anowaka mukadzi wakarambwa no mwamuna wake ari kuita upombwe.
19 “Kainga kuno mwanarume umweni wakapfuma waipfeka macira e kupsvukirira anodhura, nguwa dzese waipfadzwa no upenyu eciita mabiko.
20 Asi painga pano mwanarume umweni waigara ecikumbira zviro waizwi Razaro, iyena wainga wakadzara no maronda uye waikandwa pa musuwo pe mupfumiwo,
21 iyena waida kurhya zviro zvaimbwera pa meza yo mupfumiwo. Kunyazi imbwa dzaiuya koonanzva zvironda zvake.
22 No kuhamba ke nguwa mwanarume uya waikumbira zviro wakazofa, woendeswa no ngirozi pa dii ra Abrahamu.*
“Mupfumi uya wakazofawo wokotswa.
23 Ari mu Guwa* ecitambudzika wakamutsa madziso ake, uye wakaona Abrahamu nge kure na Razaro pa dii rake.*
24 Hino wakadainzira eciti: ‘Baba Abrahamu, ndizwireiwo usisi, uye tumai Razaro kuti anyike cikunwe cake mu mvura kuti atonhodze rurimi rangu, ngokuti ndiri kutambudzika mu muriro uno.’
25 Asi Abrahamu wakati: ‘Mwanangu, edzurira kuti iwewe wakaona zviro zvakanaka mu upenyu wako wese, asi Razaro wakaona zviro zvakashata. Zvino iyena waakunyaradzwa kuno, asi iwewe uri kutambudzika.
26 Uye kupinda zvese izvi, pakati pedu pano rindi rakadzikisisa, zvekuti aya ari kuno aakwanisi kuuya ikona, uye aya ari ikona aakwanisi kuuya kuno.’
27 Mupfumiwo wakati: ‘Kana zvakadaro, ndinomukumbirai baba, kuti mumutume ku nyumba ya baba angu,
28 ngokuti ndino hama dzinokwana 5, iyena unodikana kuabvunza kuitira kuti asauyewo ku mbuto ino ye kutambudzika.’
29 Asi Abrahamu wakati: ‘Awona ano matarhwa a Mozesi no e Aphorofita; hino ngaapurutane zvaanoreketa.’
30 Iyena wakadaira kuti: ‘Haiwa baba Abrahamu, kana munhu anobva ku akafa akaenda kaari, awona anozocinyuka pa zvitema zvawo.’
31 Asi Abrahamu wakati kaari: ‘Kana awona asikapurutani zvakatarhwa na Mozesi no Aphorofita, aazopurutani kunyazi munhu wamutswa ku akafa.’”
Masoko ari pasi
^ Kana kuti: “muonereri we pa nyumba.”
^ Cigrego: “bhato.” Bhato rainga rakaita hinga hari yaipinda maritru anokwana 22.
^ Cigrego: “koro.” Koro wainga uri mudziyo waipinda maritru 220.
^ Kana kuti: “ungwaru unobetsera.”
^ Onai pakazwi Kupanganidzwa ke Masoko.
^ Onai pakazwi Kupanganidzwa ke Masoko.
^ Cigrego: “pa diti ra Abrahamu.”
^ Kana kuti: “Hadhesi” Onai pakazwi Kupanganidzwa ke Masoko.
^ Cigrego: “pa diti rake.”
