Ruka 17:1-37
17 Hino iyena akati ku afundi ake: “Nguwa dzese zviro zvinokuhunyisa zvicaoneka. Kunyazi zvakadaro, ane nyathwa munhu anozvikonzera!
2 Zviri nani kuti iyena asungirhwe mu mutsipa make gwiyo uye wokhandirhwa mu bahari pane kuti akuhunyise umwe we adoko aya.
3 Dzingwarirei pacenyu. Kana hama yako ikakushaishira, isumurure, uye kana iyona ikacinyuka, irekerere.
4 Kunyazi kana ikakushaishira kanokwana ka 7 pa zuwa, yohwirira kauri kanokwana ka 7, yeciti: ‘Ndirekererewo,’ unodikana kuirekerera.”
5 Hino aphostori akati kuna Tenzi: “Titunhudzireiwo kutenda.”
6 Hino Tenzi akati: “Kudai mainga muno kutenda kakaezana no tsangu yo mostardha, maizoti ku muamori uu wekusvipa: ‘Dzibvite woenda koodzisima mu bahari!’ Uye uwona waizomuzwirai.
7 “Ndiani wenyu ano muranda wake anonga ecirima kana kuti eciusha zvipfuyo anoti kaari kana akahwirira kumba: ‘Uya kuno nokukasika, ugare pasi urhye’?
8 Ndati anoti kaari: ‘Ndigadzirire zvokurhya zvangu kuti ndirarire, upfeke macira ako o kubika nawo, wondiseenzera dakara ndapedza kurhya no kumwa, pedzepo iwewewo ucazorhya no kumwa’?
9 Iyena angatenda muranda wake here ngo kuita basa raanodikana kuita?
10 Ngo mushobo umwewo, kana mukapedza kuita zvese zvamabvunzwa kuti muite, bhuyai kuti: ‘Tiri aranda asina basa. Zvataita ndizvo zvataidikana kuita.’”
11 Paaienda ku Djerusarema, iyena akapinda ngo pakati pe Samariya uye Garireya.
12 Paakapinda mu mutanha umweni, anarume anokwana kuita 10 ainga ano mapere akauya kaari, asi akaima nge cekure.
13 Uye awona akadainzira eciti: “Djesu, Mufundisi, tizwireiwo usisi!”
14 Paakaaona, akati kaari: “Endai koodzipangidza ku apristi.” Awona paainga ecienda, akaporeswa.
15 Umwe wawo paakaona kuti wainga waporeswa, wakahwirira ecikudza Mwari no izwi guru.
16 Iyena wakahwarara pa tsoka dza Djesu, ecimutenda. Uye iyena wainga ari Musamariya.
17 Djesu akamubvunzisa kuti: “Mwese 10 maporeswa, andizvopi? Hino amweni 9 aripi?
18 Apana kana umwe wawo wahwirira kuzokudza Mwari, asi mwanarume uu basi we nyika imweni ndiyena wahwirira.”
19 Hino iyena akamubvunza kuti: “Purumuka uende; kutenda kako kakuporesa.”
20 Afarisi akamubvunzisa kuti Umambo wa Mwari waizouya rini, uye iyena akaadaira kuti: “Umambo wa Mwari auzouyi ngo mushobo unonyasa kuoneka;
21 uye anhu aazobhui kuti: ‘Onai, uri pano!’ Kana kuti: ‘Uri apo!’ Asi ziyai kuti Umambo wa Mwari uri pakati penyu.”
22 Hino iyena akabvunza afundi ake kuti: “Pacaguma nguwa yekuti mucada kuona rimwe re mazuwa e Mwana we munhu, asi amuzorioni.
23 Uye anhu acamubvunzai kuti: ‘Onai, ari apo!’ Kana kuti: ‘Onai, ari pano!’ Musabude kana kuateera.
24 Ngokuti hinga kucetuka kunoita mheni kudenga ku dii rimwe dakara ku dii rimweni, ndizvoo zvicaita Mwana we munhu pa zuwa rake.
25 Asi anodikana kutanga asongana no matambudziko akawanda, orambwa no mubarirhwana uno.
26 Uyezve, hinga zvakaitika mu mazuwa a Nowa, ndizvoo zvicaitika mu mazuwa e Mwana we munhu:
27 Anhu airhya, aimwa, anarume aiwaka, uye anakadzi aiwakwa dakara pa zuwa rakapinda Nowa mu areka, uye Ndambi huru youya, yotsakatisa ese.
28 Ngo mushobo umwewo, zvicaita hinga zvaiitika mu mazuwa a Roti: Anhu airhya, aimwa, aitenga, aitengesa, aisima uye aiwaka nyumba.
29 Asi pa zuwa rakabuda Roti mu Sodhoma, kudenga kakanaya muriro no enshofre* uye zvakatsakatisa ese.
30 Ndizvo zvicaitikawo pa zuwa ricapangidzwa Mwana we munhu.
31 “Pa zuwa irona, munhu anonga ari padenga pe nyumba ngaasacite kuti aende kootora zviri mumba make, uye munhu anonga ari mu munda ngaasahwirire kuenda kootora zviro zvaasiya sure.
32 Edzurirai zvakaitika no mukadzi wa Roti.
33 Uya anopsvaka kuponesa upenyu* wake anozouruza, asi uya anoruza upenyu wake acauponesa.
34 Ndinomubvunzai kuti, pa usiku iwona anhu airi anonga ari pa kama; umwe ucatorhwa, asi umweni ucasiiwa.
35 Pacange pano anakadzi airi anonga ecikwiya pa gwiyo rimwero; umwe ucatorhwa, asi umweni ucasiiwa.”
36 ——
37 Hino anhu akamubvunzisa kuti: “Kupi Tenzi?” Iyena akati kaari: “Panonga pano mutumbi, ndipoo pacaungana makodzi.”
